ບາງຄົນຖາມວ່າ: ໃນເມື່ອບໍ່ສາມາດດັບສູນເຊື້ອພະຍາດໄດ້, ຄັນຊັ້ນ ການຮ່ວມແຮງຮ່ວມໃຈກັນຕ້ານກັບພະຍາດໂຄວິດ-19 ມາເປັນເວລາ 3 ປີແມ່ນເຮັດເພື່ອຫຍັງ?

ໃນໄລຍະ 3 ປີຜ່ານມານີ້, ລະບົບສາທາລະນະສຸກ ແລະ ການຄວບຄຸມພະຍາດຂອງຈີນໄດ້ຜ່ານການທົດສອບຈາກການແພ່ລະບາດຂອງພະຍາດໂຄວິດ-19, ໄດ້ຮັກສາສະພາບພື້ນຖານແຫ່ງການພັດທະນາເສດຖະກິດສັງຄົມໃຫ້ໝັ້ນທ່ຽງໃນລະດັບສູງສຸດ.

ປີ 2020, ຈີນໄດ້ນຳໜ້າຄວບຄຸມການແພ່ລະບາດຂອງພະຍາດໂຄວິດໄວ້, ໄດ້ຟື້ນຟູການເຮັດວຽກ ແລະ ການຜະລິດກ່ອນໝູ່, ໄດ້ນຳໜ້າບັນລຸການເຕີບໂຕດ້ານເສດຖະກິດຈາກລົບເປັນບວກ, ກາຍເປັນກຸ່ມເສດຖະກິດສຳຄັນພຽງໜຶ່ງດຽວຢູ່ໃນໂລກທີ່ບັນລຸການເຕີບໂຕໃນທາງບວກ; ປີ 2021, ຍອດມູນຄ່າເສດຖະກິດຂອງຈີນບັນລຸເຖິງ 114.400 ຕື້ຢວນ, ກວມອັດຕາຫຼາຍກວ່າ 18% ຂອງຍອດມູນຄ່າເສດຖະກິດໂລກ; ປີ 2022, ເສດຖະກິດແຫ່ງຊາດຈີນໄດ້ສືບຕໍ່ຮັກສາທ່າອ່ຽງຟື້ນຕົວຄືນໃຫມ່, ການພັດທະນາເສດຖະກິດສັງຄົມໄດ້ຮັກສາຄວາມໝັ້ນທ່ຽງໂດຍລວມ.

ໂດຍສະເພາະແມ່ນໃນຫຼາຍມື້ມໍ່ໆມານີ້, ແຫ່ງຕ່າງໆຂອງຈີນໄດ້ປັບປຸງມາດຕະການປ້ອງກັນ ແລະຄວບຄຸມພະຍາດໃຫ້ສົມເຫດສົມຜົນກວ່າເກົ່າ, ໄດ້ນຳໃຊ້ຫຼາຍມາດຕະການເພື່ອເລັ່ງລັດຟື້ນຟູການເຮັດວຽກ ແລະ ການຜະລິດ, ຕະຫຼາດມີຮ່ອງຮອຍຟື້ນຕົວຄືນໃຫມ່, ແລະ ມີພະລັງຊີວິດຊີວາພົ້ນເດັ່ນຂຶ້ນຕື່ມ.

ໃນເວລາພຽງເດືອນດຽວ, ຢູ່ແຂວງ ແລະ ເຂດປົກຄອງຕົນເອງຕ່າງໆຂອງຈີນ, ພາຍໃຕ້ການຈັດຕັ້ງຂອງອົງການປົກຄອງທ້ອງຖິ່ນ, ວິສາຫະກິດ 100 ກວ່າແຫ່ງໄດ້ເໝົາຍົນເດີນທາງໄປຫຼາຍປະເທດ, ເຊັ່ນ: ຍິ່ປຸ່ນ, ເຢຍລະມັນ, ຝຣັ່ງ, ອິນໂດເນເຊຍ, ມະເລເຊຍ, ສິງກະໂປ ແລະອື່ນໆ, ເພື່ອຊອກຫາໂອກາດໃໝ່ດ້ານການພັດທະນາ.

ວິສາຫະກິດໄດ້ຟື້ນຟູການຜະລິດໃຫ້ຫ້າວຫັນຂຶ້ນ,  ການບໍລິໂພກແບບເຊິ່ງໜ້າຫຼືທາງອອຟລາຍເລີ່ມມີຄວາມອົບອຸ່ນຂຶ້ນ, ການຈໍລະຈອນສິນຄ້າໄດ້ເລັ່ງລັດໄວຂຶ້ນ, ຈີນໄດ້ຈັດກອງປະຊຸມສົນທະນາລະດັບສູງກ່ຽວກັບການພັດທະນາຂອງໂລກຄັ້ງທຳອິດ ໂດຍມຸ່ງໜ້າສູ່ປະເທດພວມພັດທະນາ, ໄດ້ດຳເນີນການເຄື່ອນໄຫວທາງການທູດຂະໜາດໃຫຍ່ທີ່ສຸດ ແລະລະດັບສູງທີ່ສຸດຕໍ່ປະເທດອາຣັບ, ສິ່ງຕ່າງໆເຫຼົ່ານີ້ໄດ້ສະແດງໃຫ້ເຫັນວ່າ ,ຈີນມີຄວາມຮຽກຮ້ອງຕ້ອງການອັນຮີບດ່ວນກວ່າເກົ່າຕໍ່ການພັດທະນາຢ່າງມີຄຸນນະພາບສູງ.

ໃນໄລຍະ 3 ປີທີ່ຈີນຕ້ານກັບການແພ່ລະບາດຂອງພະຍາດໂຄວິດ-19, ສະພາບແວດລ້ອມພາຍນອກບໍ່ແມ່ນມີແຕ່ຄວາມສະຫງົບ, ແຕ່ປະເທດຈີນຍຶດໝັ້ນຊອກຫາຄວາມຫວັງໃນການໄປມາຫາສູ່ກັນກັບປະເທດໃຫຍ່, ພ້ອມທັງສ້າງ “ວົງເພື່ອນມິດ”ຢູ່ໃນໂລກທ່າມກາງຟ້າຝົນລົມແຮງ.