ອີງຕາມບໍລິສັດກະຈາຍສຽງໂກລົມບີອາເມຣິກາ ຫຼື CBS ລາຍງານໃຫ້ຮູ້ວ່າ, ຕອນເຊົ້າວັນທີ 3 ກຸມພານີ້ຕາມເວລາທ້ອງຖິ່ນ, ມີເຮືອບິນໂດຍສານ 2 ລຳໄດ້ເກີດອຸບັດເຫດຕຳກັນຢູ່ສະໜາມບິນແຫ່ງໜຶ່ງ ຢູ່ລັດນິວເຈີຊີ ຂອງອາເມຣິກາ, ປັດຈຸບັນ ສຳນັກງານຄຸ້ມຄອງການບິນພົນລະເຮືອນສະຫະລັດອາເມຣິກາ ຫຼື FAA ພວມດຳເນີນການສືບສວນ-ສອບສວນເຫດການດັ່ງກ່າວ.

ຂ່າວລາຍງານວ່າ, ເວລາປະມານ 8:45 ໂມງຂອງວັນທີ 3 ກຸມພານີ້, ຢູ່ສະໜາມບິນສາກົນນິວວາກ ລີເບີຕີ ລັດນິວເຈີຊີ, ເຮືອບິນໂດຍສານໂບອິງ 757 ລຳໜຶ່ງຂອງບໍລິສັດຢູໄນເຕັດແອລາຍອາເມຣິກາ ກຳລັງລໍຖ້າຂຶ້ນບິນ ເພື່ອບິນໄປສູ່ນະຄອນອໍລັນໂດ, ແຕ່ຖືກເຮືອບິນໂດຍສານໂບອີງ 787 ລໍາໜຶ່ງເຂົ້າມາຕຳໃສ່. ປີກເຮືອບິນເບື້ອງຊ້າຍຂອງເຮືອບິນໂດຍສານ 757 ຖືກຕຳແລະຫັກໄປສ່ວນໜຶ່ງ, ຕອນນັ້ນໃນເຮືອບິນລຳດັ່ງກ່າວມີຜູ້ໂດຍສານເຕັມລຳ.

ສື່ມວນຊົນອາເມຣິກາແຈ້ງໃຫ້ຮູ້ວ່າ, ໃນໄລຍະຜ່ານມາ, ຢູ່ອາເມຣິກາໄດ້ເກີດອຸບັດເຫດຢູ່ສະໜາມບິນເລື້ອຍໆ. ອີງຕາມຕົວເລກຂໍ້ມູນຈາກ FAA ໃຫ້ຮູ້ວ່າ, ໃນປີ 2022, ໃນທົ່ວປະເທດອາເມຣິກາໄດ້ເກີດອຸບັດເຫດ “ລ່ວງເຂົ້າທາງຂຶ້ນລົງສຳລັບເຮືອບິນ” ຄ້າຍຄືກັນກັບອຸບັດເຫດທີ່ເກີດຂຶ້ນຢູ່ສະໜາມບິນສາກົນ JFK ນິວຢອກແບບນັ້ນ 1.732 ເທື່ອ.