ໃນກອງປະຊຸມຖະແຫຼງຂ່າວປະຈຳວັນທີ 9 ກຸມພານີ້, ທ່ານນາງຊູ້ເຈຖິງ ໂຄສົກກະຊວງ ການຄ້າຈີນໄດ້ກ່າວວ່າ: ຝ່າຍຈີນຄັດຄ້ານຝ່າຍອາເມຣິກາທີ່ຂະຫຍາຍນິຍາມຄວາມໝັ້ນຄົງແຫ່ງຊາດມາໂດຍຕະຫຼອດ， ລະເມີດຫຼັກການເສດຖະກິດຕະຫຼາດ ແລະ ກົດລະບຽບເສດຖະກິດການຄ້າສາກົນ，ລົງໂທດ ແລະ ກົດດັນວິສາຫະກິດຈີນຢ່າງບໍ່ມີເຫດຜົນ， ທຳລາຍຄວາມໝັ້ນທ່ຽງຂອງຕ່ອງໂສ້ອຸດສາຫະກຳ， ຕ່ອງໂສ້ການສະໜອງໃນທົ່ວໂລກ ແລະ ການປະດິດສ້າງໃໝ່ດ້ານເຕັກນິກຂອງທົ່ວໂລກ， ຝ່າຍຈີນຈະປົກປ້ອງສິດ ແລະ ຜົນປະໂຫຍດທີ່ຊອບດ້ວຍກົດໝາຍຂອງວິສາຫະກິດຈີນຢ່າງເດັດດ່ຽວ.

ທ່ານນາງຊູ້ເຈຖິງກ່າວຕື່ມວ່າ: ໃນຊຸມປີຜ່ານມານີ້, ຝ່າຍອາເມຣິກາໄດ້ຂະຫຍາຍນິຍາມຄວາມໝັ້ນຄົງແຫ່ງຊາດຢ່າງບໍ່ຢຸດຢັ້ງ, ນຳໃຊ້ມາດຕະການຄວບຄຸມການສົ່ງອອກເກີນຂອບເຂດ, ຂົ່ມຂູ່ ແລະ ບັງຄັບປະເທດອື່ນນຳໃຊ້ມາດຕະການປົກປ້ອງການຄ້າ,ແລະ ຂັດຂວາງການຄ້າສາກົນທີ່ເປັນປົກກະຕິດ້ານຜະລິດຕະພັນເຊມິຄອນດັກເຕີເປັນຕົ້ນ.

ທ່ານນາງຊູ້ເຈຖິງໄດ້ຊີ້ໃຫ້ເຫັນວ່າ: ຝ່າຍຈີນໄດ້ເອົາໃຈໃສ່ກ່ຽວກັບອັນທີ່ເອີ້ນວ່າ ບັນຊີລາຍຊື່“ຕະຫຼາດທີ່ມີຊື່ສຽງຊົ່ວຮ້າຍ”ທີ່ອາເມຣິກາປະກາດໃນຫວ່າງມໍ່ໆມານີ້. ຝ່າຍຈີນເຫັນວ່າ: ສະພາບທີ່ບົດລາຍງານກ່າວເຖິງນັ້ນບໍ່ໄດ້ຜ່ານການສຳຫຼວດ ແລະ ຢັ້ງຢືນ, ຜົນສະຫຼຸບບໍ່ມີສັດຈະວິພາກ ແລະ ບໍ່ຍຸຕິທຳ.