ຕອນເຊົ້າວັນທີ 24 ສິງຫານີ້ຕາມເວລາທ້ອງຖິ່ນ, ທ່ານສີຈິ້ນຜິງ, ປະທານປະເທດຈີນໄດ້ເຂົ້າຮ່ວມງານສົນທະນາລະຫວ່າງຜູ້ນຳປະເທດບຣິກສ໌-ປະເທດອາຟຣິກາພ້ອມດ້ວຍປະເທດຕະຫຼາດຈະເລີນໃໝ່ແລະປະເທດກຳລັງພັດທະນາອື່ນໆຢູ່ນະຄອນໂຈຮັນເນັສເບີກຂອງອາຟຣິກາໃຕ້.

ທ່ານມາຕາເມລາ ຊີຣີວ ຣາມາໂຟຊາ ປະທານາທິບໍດີສາທາລະນະລັດອາຟຣິກາໃຕ້ເປັນປະທານກອງປະຊຸມ, ມີທ່ານລູິອິສ ອິນາຊີໂອ ລູລາ ດາຊິນວາ, ປະທານາດີບໍດີບຣາຊິນ, ທ່ານນາເຣັນດຣາ ໂມດີ  ນາຍົກລັດຖະມົນຕີອິນເດຍ, ທ່ານວະລາດີເມຍ ປູຕິນ ປະທານາທິບໍດີຣັດເຊຍ( ຜ່ານທາງອອນລາຍ ), ຜູ້ນຳ ຫຼືຜູ້ຕາງໜ້າຂອງບັນດາປະເທດອາຟຣິກາ, ປະເທດຕະຫຼາດຈະເລີນໃໝ່ແລະປະເທດທີ່ກຳລັງພັດທະນາອື່ນໆ 60 ກວ່າທ່ານ, ພ້ອມດ້ວຍທ່ານອັນໂຕນີໂອ ກູເຕີເຣັສ, ເລຂາທິການໃຫຍ່ອົງການສະຫະປະຊາຊາດແລະຜູ້ຮັບຜິດຊອບອົງການຈັດຕັ້ງສາກົນແລະພາກພື້ນອື່ນໆໄດ້ເຂົ້າຮ່ວມ.

ທ່ານສີຈິ້ນຜິງໄດ້ກ່າວປາຖະກະຖາທີ່ມີຫົວຂໍ້ວ່າ “ມີຈິດໜຶ່ງໃຈດຽວ ຮ່ວມມືເດີນຕາມທິດທາງດຽວກັນ ກ້າວເຂົ້າສູ່ປະຊາຄົມຮ່ວມພັດທະນາ”.

ທ່ານສີຈິ້ນຜິງກ່າວເນັ້ນວ່າ: ຈີນແມ່ນເພື່ອນມິດທີ່ເພິ່ງພາອາໄສໄດ້ຂອງທະວີບອາຟຣິກາ, ໃນຮອບ 10 ປີຜ່ານມາໄດ້ສະໜອງການຊ່ວຍເຫຼືອດ້ານການພັດທະນາຢ່າງຫຼວງຫຼາຍໃຫ້ແກ່ທະວີບອາຟຣິກາ. ໃນໄລຍະຕໍ່ໜ້ານີ້, ຈີນຈະດຳເນີນການຮ່ວມມື ກັບປະເທດອາຟຣິກາຢ່າງຫຼວງຫຼາຍກວ່າເກົ່າ, ເຊິ່ງລວມທັງການສະໜອງຜະລິດຕະພັນແລະຂໍ້ມູນຄົບຊຸດດ້ານການວັດແທກຜ່ານຂອງດາວທຽມແລະອື່ນໆ, ຕັ້ງໜ້າສະໜັບສະໜູນໃຫ້ທະວີບອາຟຣິກາບັນລຸການພັດທະນາແບບຍືນຍົງ, ຮ່ວມກັນສ້າງປະຊາຄົມໂລກຮ່ວມພັດທະນາ.