ວັນທີ 18 ກັນຍານີ້, ທ່ານນັດເຊີ ການານີ ໂຄສົກກະຊວງການຕ່າງປະເທດອີຣານກ່າວໃນກອງປະຊຸມຖະແຫຼງຂ່າວປະຈຳອາທິດທີ່ຈັດຂຶ້ນຢູ່ນະຄອນຫຼວງເຕຮາຣານປະເທດອີຣານວ່າ: ປະຊາຊົນອີຣານ 5 ຄົນທີ່ຖືກກັກຂັງຢູ່ໃນຄຸກຂອງອາເມຣິກາຈະໄດ້ຮັບການປ່ອຍຕົວ. ຂະນະທີ່ນັກໂທດອາເມຣິກາ 5 ຄົນທີ່ຖືກກັກຂັງຢູ່ໃນຄຸກຂອງອີຣານກໍຈະໄດ້ຮັບການປ່ອຍຕົວເຊັ່ນດຽວກັນ.

ອີງຕາມລາຍງານຂ່າວຈາກສຳນັກຂ່າວສານອີຣານຫຼື IRNA ໃຫ້ຮູ້ວ່າ: ທ່ານການານີກ່າວວ່າ: ປະຊາຊົນອີຣານ 2 ຄົນທີ່ໄດ້ຮັບການປ່ອຍຕົວຈະກັບຄືນອີຣານ, ອີກ 2 ຄົນຈະດຳລົງຊີວິດຢູ່ອາເມຣິກາ ແລະອີກ 1 ຄົນຈະເຕົ້າໂຮມກັບຄອບຄົວຢູ່ຕ່າງປະເທດ. ທ່ານຍັງກ່າວຕື່ມວ່າ: ເງິນຈຳນວນ 6 ຕື້ໂດລາຂອງອີຣານທີ່ຖືກອາຍັດຢູ່ທະນາຄານສອງແຫ່ງຂອງສ.ເກົາຫຼີຈະຖືກຍົກເລີກການອາຍັດ ແລະໂອນເຂົ້າບັນຊີຂອງປະເທດເພື່ອນມິດອີຣານ.