ວັນທີ 30 ມີນານີ້, ປະຊາຊົນເຢຍລະມັນປະມານ 3500 ຄົນໄດ້ຈັດການແຫ່ຂະບວນຢູ່ນະຄອນຫຼວງແບັກແລັງ ເພື່ອກ່າວປະນາມກຸ່ມນາໂຕທີ່ເພີ່ມລາຍຈ່າຍດ້ານ ການທະຫານ ເຊິ່ງຈະສ້າງວິກິດການໃຫ້ແກ່ສັນຕິພາບຂອງພາກພື້ນ ທັງຮຽກຮ້ອງໃຫ້ແກ້ໄຂການປະທະກັນຢູ່ພາກພື້ນດ້ວຍສັນຕິວິທີທາງການທູດ.

   ຜູ້ປະທ້ວງຊີ້ໃຫ້ເຫັນວ່າ: ນະໂຍບາຍເພີ່ມລາຍຈ່າຍການທະຫານຂອງກຸ່ມນາໂຕ ເປັນການຂົ່ມຂູ່ຕໍ່ສັນຕິພາບ, ກຸ່ມນາໂຕຢູ່ຝ່າຍກົງກັນຂ້າມຂອງສັນຕິພາບ, ໄດ້ເຮັດເລື່ອງຜິດພາດຫຼາຍເລື່ອງ. ນາໂຕບໍ່ໄດ້ເຮັດເລື່ອງໃດໆເພື່ອສັນຕິພາບ, ແຕ່ເລື່ອງທຸກຢ່າງທີ່ໄດ້ເຮັດ ພັດເຮັດໃຫ້ສະພາບການຮຸນແຮງຂຶ້ນ. ພວກເຮົາສັງເກດອອກໄດ້ວ່າ, ນາໂຕກຳລັງທຳການແກ່ງແຍ່ງກັນດ້ານການທະຫານ.

   ຜູ້ປະທ້ວງກ່າວຕື່ມວ່າ: ຢາກສິ້ນສຸດສະພາບການທີ່ເຄັ່ງຕຶງຢູ່ເຂດເອີຣົບ ກໍຕ້ອງຟື້ນຟູສາຍພົວພັນສັນຕິພາບແລະໄມຕີຈິດມິດຕະພາບລະຫວ່າງບັນດາປະເທດຢູ່ເອີຣົບ, ໂດຍສະເພາະແມ່ນສາຍພົວພັນລະຫວ່າງບັນດາປະເທດຢູ່ເອີຣົບກັບຣັດເຊຍ, ເຊິ່ງຕ້ອງການແກ້ໄຂໂດຍຜ່ານການເຈລະຈາທາງການທູດ ຫາກບໍ່ແມ່ນນຳໃຊ້ພາຫະນະທາງການທະຫານ. ຄົນທັງຫຼາຍລ້ວນແຕ່ບໍ່ຢາກເກີດສົງຄາມ, ຫາກແມ່ນຢາກໄດ້ການພັດທະນາ, ຢາກມີສັນຕິພາບ.