ອີງຕາມແຫຼ່ງຂ່າວຈາກເຈົ້າໜ້າທີ່ລະດັບສູງຂອງພາກສ່ວນຄວາມໝັ້ນຄົງເອຢິບແຈ້ງໃຫ້ຮູ້ເມື່ອວັນທີ 8 ເມສານີ້ວ່າ: ຄະນະຜູ້ແທນຂອງຝ່າຍຕ່າງໆທີ່ເຂົ້າຮ່ວມການເຈລະຈາຢຸດຍິງຢູ່ເຂດກາຊາເທື່ອນີ້ໄດ້ອອກຈາກນະຄອນຫຼວງເລີແກປະເທດເອຢິບເປັນການຊົ່ວຄາວແລ້ວ. ຝ່າຍຕ່າງໆຈະກັບຄືນມາພາຍໃນເວລາສອງວັນ ເພື່ອດໍາເນີນການເຈລະຈາອີກເທື່ອໜຶ່ງກ່ຽວກັບລາຍລະອຽດຂອງແຜນການຢຸດຢິງສະບັບສຸດທ້າຍ.

   ທ່ານ ມາຈິດ ອັນຊາຣີ ໂຄສົກກະຊວງການຕ່າງປະເທດກາຕາໄດ້ຢືນຢັນເມື່ອວັນທີ 8 ເມສານີ້ວ່າ: ເຖິງວ່າການເຈລະຈາຢຸດຍິງຍັງບໍ່ທັນສິ້ນສຸດເທື່ອກໍຕາມ, ແຕ່ກາຕາມີທ່າທີ “ເບິ່ງໄປໃນແງ່ດີຫຼາຍຂຶ້ນກວ່າເກົ່າ” ຕໍ່ການບັນລຸສັນຍາເມື່ອທຽບໃສ່ຫວ່າງຫຼາຍມື້ທີ່ຜ່ານມາ. ແຕ່ວ່າ, ອີງຕາມສື່ມວນຊົນຫຼາຍສໍານັກລາຍງານໃຫ້ຮູ້ວ່າ: ອິດສະຣາແອນ ກັບ ຂະບວນການຕໍ່ຕ້ານອິດສະລາມປາແລັດສະຕິນ ຫຼື ຮາມັສ ບໍ່ໄດ້ສະແດງໃຫ້ເຫັນເຖິງທ່າທີເບິ່ງໄປໃນທາງທີ່ດີໃນມື້ດຽວກັນເທື່ອ.

   ນອກນີ້, ອີງຕາມຜູ້ຮູ້ຂ່າວຄົນໜຶ່ງຂອງກຸ່ມຮາມັສແຈ້ງຕໍ່ສື່ມວນຊົນເມື່ອວັນທີ 8 ເມສານີ້ໃຫ້ຮູ້ວ່າ: ການເຈລະຈາຍັງບໍ່ທັນໄດ້ຮັບຄວາມຄືບໜ້າໃດໆເທື່ອ, ເນື່ອງຈາກຄະນະຜູ້ແທນອິດສະຣາແອນບໍ່ໄດ້ຕອບສະໜອງຕາມຄວາມຮຽກຮ້ອງໃດໆຂອງກຸ່ມຮາມັສ.