ວັນທີ 26 ເມສານີ້, ໃນໂອກາດເຂົ້າຮ່ວມກອງປະຊຸມພິຈາລະນາບັນຫາທໍ່ສົ່ງອາຍແກັສທຳມະຊາດ Nord Stream ຂອງສະພາຄວາມໝັ້ນຄົງອົງການສະຫະປະຊາຊາດ, ທ່ານເກີງສວງ ຮອງຜູ້ຕາງໜ້າຖາວອນຈີນປະຈຳອົງການສະຫະປະຊາຊາດໄດ້ປະກອບຄຳເຫັນໂດຍຮຽກຮ້ອງໃຫ້ເລີ່ມ ການສືບສວນສາກົນທີ່ນຳພາໂດຍອົງການສະຫະປະຊາຊາດກ່ຽວກັບເຫດການລະເບີດທໍ່ສົ່ງອາຍແກັສທຳມະຊາດ Nord Stream ໂດຍໄວ.

ທ່ານເກີງສວງ ກ່າວວ່າ: ນັບແຕ່ທໍ່ສົ່ງອາຍແກັສທຳມະຊາດ Nord Stream ເກີດການລະເບີດມາຮອດປັດຈຸບັນແມ່ນດົນຫຼາຍກວ່າ 1 ປີເຄິ່ງແລ້ວ, ແຕ່ຍັງບໍ່ມີຜົນການສືບສວນທີ່ຈະແຈ້ງກ່ຽວກັບເລື່ອງນີ້, ເຮັດໃຫ້ຄົນທັງຫຼາຍຮູ້ສຶກຜິດຫວັງຫຼາຍ. ຈີນພົບເຫັນວ່າ, ຊູແອັດ ແລະ ດານມາກໃນຖານະເປັນຝ່າຍສຳຄັນທີ່ກ່ຽວຂ້ອງ, ໄດ້ປະກາດຢຸດການສືບສວນໃນເດືອນກຸມພາປີນີ້ພາຍຫຼັງດຳເນີນການສືບສວນມາເປັນເວລາ 1 ປີກວ່າ. ການສືບສວນຂອງສອງປະເທດດັ່ງກ່າວບໍ່ໄດ້ເປີດເຜີຍຂໍ້ມູນທີ່ແທ້ຈິງ, ບໍ່ໄດ້ແຈ້ງຄວາມຄືບໜ້າລະອຽດ, ແລະບໍ່ມີຂໍ້ສະຫຼຸບທີ່ຈະແຈ້ງ.

ທ່ານເກິງສວງ ກ່າວຕື່ມວ່າ: ຣັດເຊຍເປັນໜຶ່ງໃນຝ່າຍສຳຄັນທີ່ກ່ຽວຂ້ອງຂອງເຫດການລະເບີດທໍ່ສົ່ງອາຍແກັສທຳມະຊາດ Nord Stream, ຈີນຮຽກຮ້ອງໃຫ້ປະເທດທີ່ກ່ຽວຂ້ອງຈົ່ງຕັ້ງໜ້າຮ່ວມມືກັບຣັດເຊຍ, ຮ່ວມກັນດຳເນີນການແລະສືບສວນ.