ມີນັກຂ່າວຖາມວ່າ: ມີຂ່າວລາຍງານວ່າ, ຫວ່າງມໍ່ໆມານີ້, ອົງການອານຟາຕາ ແລະ ກຸ່ມຮາມາສ ທີ່ເປັນສອງພັກຝ່າຍຢູ່ໃນປະເທດປາແລັດສະຕິນ ໄດ້ເປິກສາຫາລືກັນຢູ່ນະຄອນຫຼວງປັກກິ່ງ ເພື່ອຄວາມປອງດອງກັນພາຍໃນປາແລັດສະຕິນ. ທ່ານໂຄສົກສາມາດແນະນຳສະພາບການອັນລະອຽດໄດ້ຫຼືບໍ່?

ທ່ານຫຼິນຈ້ຽນ ໂຄສົກກະຊວງການຕ່າງປະເທດຈີນກ່າວວ່າ: ໂດຍຕອບສະໜອງຕາມຄຳເຊື້ອເຊີນຂອງຝ່າຍຈີນ, ຜູ້ຕາງໜ້າອົງການອານຟາຕາ ແລະ ກຸ່ມຮາມາສຂອງປາແລັດສະຕິນໄດ້ເດີນທາງມາເປິກສາຫາລືກັນຢູ່ນະຄອນຫຼວງປັກກິ່ງ ໂດຍໄດ້ລົງເລິກສົນທະນາກັນຢ່າງກົງໄປກົງມາກ່ຽວກັບຄວາມປອງດອງກັນຢູ່ພາຍໃນປະເທດປາແລັດສະຕິນ, ສອງຝ່າຍໄດ້ສະແດງຄວາມປາຖະໜາທາງການເມືອງ ເພື່ອບັນລຸຄວາມປອງດອງກັນໂດຍຜ່ານການສົນທະນາກັນ, ໄດ້ເປິກສາຫາລືກັນກ່ຽວກັບບັນຫາລະອຽດຕ່າງໆ ແລະ ໄດ້ຮັບຄວາມຄືບໜ້າອັນຕັ້ງໜ້າ, ສອງຝ່າຍເປັນເອກະພາບກັນເຫັນດີຈະສືບຕໍ່ຂະບວນການສົນທະນາດັ່ງກ່າວ ແລະ ພະຍາຍາມບັນລຸຄວາມສາມັກຄີ ແລະ ເອກະພາບກັນພາຍໃນປາແລັດສະຕິນ. ສອງຝ່າຍໄດ້ຕີລາຄາຢ່າງສູງຕໍ່ຈີນທີ່ໄດ້ຍຶດໝັ້ນສະໜັບສະໜູນພາລະກິດອັນຊອບທຳຂອງປະຊາຊົນປາແລັດສະຕິນ ໃນການຟື້ນຟູສິດທິຊອບດ້ວຍກົດໝາຍຂອງຊາດ. ຂອບໃຈຄວາມພະຍາຍາມຂອງຈີນໃນການຊຸກຍູ້ໃຫ້ປາແລັດສະຕິນເພີ່ມທະວີຄວາມສາມັກຄີພາຍໃນ ແລະ ໄດ້ກ້າວເຖິງຂັ້ນມີຄວາມເປັນເອກະພາບກັນກ່ຽວກັບໂຄງຄວາມຄິດໃນການສົນທະນາຂັ້ນຕໍ່ໄປ.