ຄຸນນະພາບຂອງແຮງງານແມ່ນມີຄວາມສຳຄັນທີ່ສຸດຕໍ່ການພັດທະນາປະເທດໜຶ່ງແລະຊົນຊາດໜຶ່ງ. ນັບແຕ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 18 ຂອງພັກກອມມູນິດຈີນເມື່ອປີ2012ເປັນຕົ້ນມາ, ທ່ານສີຈິ້ນຜິງ ເລຂາທິການ ໃຫຍ່ຄະນະກຳມະການສູນກາງພັກກອມມູນິດຈີນໄດ້ເນັ້ນໜັກມາຫຼາຍເທື່ອໃຫ້ບຳລຸງສ້າງນາຍຊ່າງຊາດໃຫຍ່ ເພື່ອອຳນວຍຫຼັກການພື້ນຖານໃຫ້ແກ່ການສ້າງປະ ເທດເຂັ້ມແຂງດ້ານອຸດສາຫະກຳການຜະລິດ.

ໃນໄລຍະກອງປະຊຸມສະພາປະຊາຊົນແຫ່ງຊາດຈີນແລະກອງປະຊຸມສະພາເປິກສາການເມືອງປະຊາຊົນແຫ່ງຊາດຈີນຫຼືກອງປະຊຸມສອງສະພາປະຈຳປີ2024, ທ່ານສີຈິ້ນຜິງໄດ້ຊີ້ໃຫ້ເຫັນໃນໂອກາດເຂົ້າຮ່ວມການຄົ້ນຄວ້າພິຈາລະນາກັບຄະນະຜູ້ແທນແຂວງຈ່ຽງຊູທີ່ເຂົ້າຮ່ວມກອງປະຊຸມວ່າ: ນາຍຊ່າງຊາດໃຫຍ່ຄື ຫຼັກຫີນພື້ນຖານແລະເສົາຄ້ຳອາຄານໃຫຍ່ແຫ່ງ ປະຊາຊາດຈີນພວກເຮົາ. ເພິ່ນໄດ້ນຳໃຊ້ຄຳປຽບທຽບທີ່ວ່າ “ຫຼັກຫີນພື້ນຖານ” ແລະ “ເສົາຄ້ຳ” ເພື່ອເນັ້ນໜັກເຖິງບົດບາດສຳຄັນຂອງນາຍຊ່າງຊາດໃຫຍ່ໃນການຄ້ຳຊູຂະບວນການສ້າງສາປະເທດສັງຄົມນິຍົມທັນສະໄໝຢ່າງຮອບດ້ານ.

ປັດຈຸບັນ, ຈີນພວມຢູ່ໃນໄລຍະສຳຄັນແຫ່ງການຫັນປ່ຽນແລະຍົກລະດັບເສດຖະກິດ, ການຊຸກຍູ້ການພັດທະນາດ້ວຍຄຸນນະພາບສູງແລະສ້າງສາສັງຄົມນິຍົມທັນສະໄໝຢ່າງຮອບດ້ານ, ຖັນແຖວກຳມະກອນເຕັກນິກເປັນກຳລັງສຳຄັນທີ່ຂາດບໍ່ໄດ້.

ຍົກຕົວຢ່າງ:  ທ່ານຫວງຕ້າໜຽນ ຜູ້ເຮັດວຽກຄົ້ນຄວ້າວິທະຍາສາດທີ່ມີຊື່ສຽງຂອງຈີນໄດ້ຮັບກຽດຕິຍົດຫຼາຍຢ່າງເຊັ່ນ: “ຕົວແບບແຫ່ງຍຸກສະໄໝ”, “ຫຼຽນກາແຮງງານ1ພຶດສະພາແຫ່ງຊາດ” ແລະອື່ນໆ.

ປີ2009, ເນື່ອງຈາກມີຄວາມຫ່ວງໃຍເຖິງປະເທດຊາດ, ທ່ານຫວງຕ້າໜຽນໄດ້ຕອບສະໜອງຕາມຄວາມຮຽກຮ້ອງຕ້ອງການຂອງປະເທດຊາດ ໂດຍເດີນທາງຈາກອັງກິດກັບຄືນສູ່ປະເທດດ້ວຍນ້ຳໃຈຮັກຊາດຢ່າງເຕັມປ່ຽມ. ຫຼັງຈາກກັບຄືນປະເທດຊາດແລ້ວ, ເພິ່ນໄດ້ໝົກໝົ້ນຢູ່ໃນຂົງເຂດຄົ້ນຄວ້າເຕັກນິກສຳຫຼວດພູມສາດຟີຊິກທາງອາກາດ,ນຳພາທີມງານບຸກບືນສູ້ຊົນຄົ້ນຄວ້າເພື່ອບຸກທະລຸຂອດຫຍຸ້ງຍາກດ້ານເຕັກນິກດ້ວຍຈິດໃຈນາຍຊ່າງໂດຍສາມາດສ້າງໄດ້ຜົນງານທີ່ສຳຄັນຕ່າງໆເປັນຕົ້ນແມ່ນ: ຕົວຢ່າງເຄື່ອງເຈາະ “ເປືອກໂລກ-1” ຂອງໂຄງການຂຸດເຈາະສຳຫຼວດວິທະຍາສາດຕາມແຜ່ນດິນໃຫຍ່ເລິກລົງໄປໃຕ້ດິນ10.000 ແມັດ ເຄື່ອງທຳອິດຂອງຈີນໄດ້ອອກສູ່ສາຍຕາຊາວໂລກຢ່າງໂດດເດັ່ນ ເຊິ່ງເຮັດໃຫ້ຈີນກາຍເປັນປະເທດທີ3ຢູ່ໃນໂລກທີ່ຮູ້ໄດ້ເຕັກນິກຂຸດເຈາະສຳຫຼວດວິທະຍາສາດຕາມແຜ່ນດິນໃຫຍ່ເລິກລົງໄປໃຕ້ດິນ10.000 ແມັດ. ທີມງານຂອງທ່ານຫວງຕ້າໜຽນຍັງປະສົບຜົນສຳເລັດແບບບຸກທະລຸດ້ານເຕັກນິກທີ່ເປັນຂໍກຸນແຈສຳຄັນໃນການຄົ້ນຄວ້າຜະລິດຕົວຢ່າງເຄື່ອງຈັກສຳລັບໂຄງການລະບົບສຳຫຼວດແຜ່ນດິນໄຫວທີ່ກຳນົດຕຳແໜ່ງໂດຍອັດຕະໂນມັດແບບບໍ່ມີສາຍເຄເບີນເຊິ່ງໄດ້ສະໜອງການສະໜັບສະໜູນດ້ານເຕັກນິກໃຫ້ແກ່ການສຳຫຼວດແຜ່ນດິນໄຫວໃນຂອບເຂດບໍລິເວນກວ້າງ ແລະອື່ນໆ.

ເດືອນມັງກອນປີ2017, ທ່ານຫວງຕ້າໜຽນໄດ້ເສຍຊີວິດຍ້ອນເຈັບເປັນ, ລວມອາຍຸໄດ້58ປີ, ເພິ່ນເຄີຍກ່າວວ່າ: “ເພື່ອເຮັດໃຫ້ຈີນສາມາດຕັ້ງຈຸດຢືນຢູ່ທ່າມກາງບັນດາຊາດຢູ່ໃນໂລກ,ມີຄົນກຸ່ມໜຶ່ງກຳລັງສູ້ຊີວິດຢູ່, ມັນບໍ່ສະເພາະແຕ່ຂ້າພະເຈົ້າພຽງຜູ້ດຽວເທົ່ານັ້ນ, ຫາກຍັງມີເປັນກຸ່ມຄົນໜຶ່ງ.”

ເດືອນພຶດສະພາປີ2017, ທ່ານສີຈິ້ນຜິງໄດ້ມີຄຳຊີ້ນຳອັນສຳຄັນໂດຍເນັ້ນໜັກໃຫ້ຖືເອົາສະຫາຍຫວງຕ້າໜຽນເປັນແບບຢ່າງເພື່ອຮຽນເອົານ້ຳໃຈຮັກຊາດ,ຈິດໃຈທຸ້ມເທກັບວຽກງານແລະຄຸນສົມບັດອັນສູງສົ່ງຂອງເພິ່ນ.

ນາຍຊ່າງຊາດໃຫຍ່ເປັນກຳລັງສຳຄັນທີ່ຄ້ຳຊູອຸດສາຫະກຳການຜະລິດ ແລະ ການປະດິດສ້າງຂອງຈີນ. ອາຄານ ໃຫຍ່ແຫ່ງປະຊາຊາດຈີນ ສາມາດຕັ້ງຕົວຢູ່ໄດ້ຢ່າງສູງສະຫງ່າກໍເປັນຍ້ອນຈີນມີນາຍຊ່າງຊາດໃຫຍ່,ນາຍຊ່າງດີເດັ່ນຄືດັ່ງທ່ານຫວງຕ້າໜຽນໄດ້ເສີມຂະຫຍາຍບົດບາດອັນສຳຄັນທີ່ເປັນຫຼັກຫີນພື້ນຖານແລະເສົາຄ້ຳຢ່າງງຽບໆມາໂດຍຕະຫຼອດ.

ທ່ານສີຈິ້ນຜິງເຄີຍສະຫຼຸບຈິດໃຈນາຍຊ່າງວ່າເປັນຈິດໃຈທີ່ມຸ່ງໝັ້ນ,ທຸ້ມເທ, ສະແຫວງຫາຄວາມຍອດຍິ່ງ,ຄວາມດີເລີດ, ມີຄວາມລະອຽດລະອໍ. ເພິ່ນເນັ້ນ ໜັກໃຫ້ຊົນຊັ້ນກຳມະກອນແລະຊາວຜູ້ອອກແຮງງານທັງຫຼາຍຂອງຈີນຕ້ອງອອກແຮງເສີມຂະຫຍາຍຈິດໃຈແຮງງານຕົວແບບ,ຈິດໃຈການອອກແຮງງານແລະຈິດໃຈນາຍຊ່າງ.

ໃນຍຸກໃໝ່, ອຸດສາຫະກຳການຜະລິດຂອງຈີນພວມຫັນຈາກ “ຄວາມຄົບ ຖ້ວນຂອງລະບົບ” ໄປສູ່ “ຄວາມເຂັ້ມແຂງແລະດີເດັ່ນ”. ແຕ່ລະອຸປະກອນທີ່ສຳຄັນແຫ່ງຊາດ, ແຕ່ລະຊຸບເປີໂຄງການທີ່ສາມາດກຳເນີດເກີດຂຶ້ນມາໄດ້ແມ່ນຍ້ອນມີນາຍຊ່າງຊາດໃຫຍ່ຈຳຫຼວງຫຼາຍທີ່ເຮັດວຽກດ້ວຍຈິດໃຈລະອຽດລະອໍແລະຍຶດໝັ້ນສູ້ຊົນປະດິດສ້າງແບບບຸກທະລຸຢ່າງບໍ່ລົດລະ.

ຕົວຢ່າງເຊັ່ນ: ລະບົບດາວທຽມນຳທາງ “ເປີຍໂຕວ” ປົກຄຸມທົ່ວໂລກ, ເຮືອດຳນ້ຳ “ເຟີ້ນໂຕ້ເຈີ” ດຳລົງທະເລເລິກ, ຂະບວນລົດໄຟຄວາມໄວສູງແລ່ນຂຶ້ນສູ່ພູພຽງຊິງໄຫຕິເບດ, ຂົວໃຫຍ່ “ຮົງກົງ-ຈູ່ໄຫ-ມາກາວ” ເຊື່ອມຕໍ່ສາມເຂດແຄວ້ນດັ່ງກ່າວ, ອາຄານ ຜູ້ໂດຍສານຮູບຊົງ “ນົກຟີນິກພືປີກບິນ”ຂອງສະໜາມບິນສາກົນຕ້າຊິ່ງປັກກິ່ງ… ຜົນສຳເລັດດ້ານ ການພັດທະນາທີ່ເຫັນໄດ້ຢ່າງປະຈັກຕາຂອງຊາວໂລກເຫຼົ່ານີ້ໄດ້ພິສູດໃຫ້ເຫັນເຖິງນ້ຳໃຈຊາດຈີນ ຍິ່ງສະແດງໃຫ້ເຫັນເຖິງຫົວຄິດປະດິດສ້າງ ຂອງຈີນ.

ໃນໄລຍະກອງປະຊຸມສອງສະພາປະຈຳປີ2024ນີ້, ທ່ານສີຈິ້ນຜິງ ໄດ້ຍົກເອົາການພັດທະນາຂອງຂະແໜງການຄົມມະນາຄົມມາເປັນຕົວຢ່າງໂດຍເນັ້ນໜັກເຖິງຄວາມໝາຍສຳຄັນແຫ່ງການບຳລຸງສ້າງນາຍຊ່າງຊາດໃຫຍ່ແລະພັດທະນາອາຊີວະສຶກສາ.

ເພິ່ນກ່າວວ່າ: “ຂະແໜງການຄົມມະນາຄົມພັດທະນາໄປແຕ່ລະບາດກ້າວ, ສາມາດກ້າວຂຶ້ນສູ່ແຖວໜ້າຂອງໂລກ, ໃນນີ້ ສິ່ງສຳຄັນທີ່ສຸດແມ່ນນາຍຊ່າງ. ມີແຕ່ເຈ້ຍແຕ້ມແບບທີ່ດີຍັງບໍ່ພຽງພໍເທື່ອ, ໃນທີ່ສຸດກໍຕ້ອງມອບໃຫ້ຊ່າງຈອດເປັນ ຜູ້ເຮັດຕົວຈິງ, ‘ຖ້າຫາກບໍ່ມີເຄື່ອງເຈາະຫົວເພັດ ຢ່າເຮັດວຽກເຄື່ອງເຄືອບ’”.

ການບຳລຸງສ້າງນາຍຊ່າງຊາດໃຫຍ່ແລະສ້າງໃຫ້ມີຈິດໃຈນາຍຊ່າງໃນຍຸກໃໝ່ແມ່ນບໍ່ສາມາດປັດສະຈາກການບຳລຸງສ້າງຖັນແຖວຜູ້ມີຄວາມຮູ້ຄວາມສາມາດທີ່ມີເຕັກນິກວິຊາການແລະມີຄຸນນະພາບສູງ. ຄຳວ່າ “ເຄື່ອງເຈາະຫົວເພັດ”ທີ່ທ່ານສີຈິ້ນຜິງໄດ້ເວົ້າມານັ້ນ ແມ່ນໝາຍເຖິງຄວາມສາມາດດ້ານເຕັກນິກວິຊາຊີບ ທີ່ນາຍຊ່າງຊາດໃຫຍ່ຕ້ອງມີ.

ປັດຈຸບັນ, ການອອກແຮງພັດທະນາການສຶກສາຊ່າງເຕັກນິກ, ດຳເນີນການ ເຝິກອົບຮົມເຕັກນິກວິຊາຊີບຢ່າງຂະໜາດໃຫຍ່, ເລັ່ງບຳລຸງສ້າງແຮງງານໃຫ້ມີຄຸນ ນະພາບສູງ ແລະນັກວິຊາການເຕັກນິກໄດ້ກາຍເປັນຈຸດສຸມທີ່ຂະແໜງການຕ່າງໆ ໄດ້ເອົາໃຈໃສ່.

ອີງຕາມແຜນງານອົບຮົມເຕັກນິກວິຊາຊີບໄລຍະປະຕິບັດແຜນການ5ປີຄັ້ງທີ14ຂອງຈີນໄດ້ກຳນົດໄວ້ວ່າ: ເມື່ອຮອດປີ2025, ຕ້ອງບັນລຸ4ເປົ້າໝາຍຫຼັກເຊັ່ນ: ຖັນແຖວຜູ້ມີຄວາມຮູ້ຄວາມສາມາດແບບປະດິດສ້າງ,ແບບປະຍຸກແລະແບບເຕັກນິກວິຊາການໃຫ້ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ, ປັບປຸງການບໍລິການອົບຮົມວິຊາຊີບໃຫ້ມີປະສິດທິຜົນຫຼາຍກວ່າເກົ່າແລະອື່ນໆ.

ອີງຕາມຕົວເລກສະຖິຕິສະແດງໃຫ້ເຫັນວ່າ: ປັດຈຸບັນ, ຈຳນວນຜູ້ມີຄວາມ ຮູ້ຄວາມສາມາດດ້ານເຕັກນິກວິຊາການຂອງຈີນໄດ້ບັນລຸຫຼາຍກວ່າ200ລ້ານຄົນ, ກວມຍອດຈຳນວນຜູ້ປະກອບອາຊີບຫຼາຍກວ່າ26%,  ໃນນີ້, ນັກວິຊາການເຕັກ ນິກສູງມີຫຼາຍກວ່າ60ລ້ານຄົນ. ຜູ້ມີຄວາມຮູ້ຄວາມສາມາດດ້ານເຕັກນິກວິຊາການ ຕ່າງໆແມ່ນຫ້າວຫັນເຮັດວຽກຢູ່ແຖວໜ້າການຜະລິດແລະການປະດິດສ້າງຢ່າງສະເໝີຕົ້ນສະເໝີປາຍຢູ່ສະເໝີ.

ວັນທີ27ເມສາ2022, ກອງປະຊຸມແລກປ່ຽນການປະດິດສ້າງຂອງນາຍຊ່າງຊາດໃຫຍ່ຄັ້ງປະຖົມມະເລີກຂອງຈີນໄດ້ໄຂຂຶ້ນຢ່າງສະຫງ່າຜ່າເຜີຍ, ໃນໂອກາດດັ່ງກ່າວ,ທ່ານສີຈິ້ນຜິງໄດ້ສົ່ງສານຊົມເຊີຍເຖິງກອງປະຊຸມໂດຍເນັ້ນໜັກໃຫ້ ຊົນຊັ້ນ ກຳມະກອນແລະຊາວຜູ້ອອກແຮງງານທັງຫຼາຍ ຕ້ອງອອກແຮງເສີມຂະຫຍາຍ ຈິດໃຈແຮງງານຕົວແບບ,ຈິດໃຈການອອກແຮງງານແລະຈິດໃຈນາຍຊ່າງ ເພື່ອຕອບສະໜອງກັບຄວາມຮຽກຮ້ອງຕ້ອງການດ້ານການປະຕິວັດວິທະຍາສາດເຕັກນິກແລະການປ່ຽນແປງດ້ານອຸດສາຫະກຳໃນໂລກປັດຈຸບັນ.

ຈິດໃຈນາຍຊ່າງໄດ້ສ່ອງແສງໃຫ້ເຫັນເຖິງສະພາບຈິດໃຈຂອງຊາວຜູ້ອອກແຮງງານທຸກສາຂາອາຊີບຂອງຈີນ.

ບໍ່ວ່າອຸດສາຫະກຳການຜະລິດດັ້ງເດີມຫຼືອຸດສາຫະກຳພັດທະນາໃໝ່, ບໍ່ວ່າເສດຖະກິດຮູບປະທຳຫຼືເສດຖະກິດດິຈີຕອນ, ຈິດໃຈນາຍຊ່າງກາຍເປັນແຫຼ່ງສຳຄັນແຫ່ງຈິດໃຈປະດິດສ້າງຢ່າງສະເໝີຕົ້ນສະເໝີປາຍ.

ເວົ້າສຳລັບປະເທດຈີນແລ້ວ, ເມື່ອຕັ້ງຈຸດຢືນໃນຍຸກໃໝ່, ຢູ່ບົນເສັ້ນທາງແຫ່ງ ການຊຸກຍູ້ການສ້າງປະເທດເຂັ້ມແຂງແລະຟື້ນຟູຄວາມຈະເລີນຮຸ່ງເຮືອງຂອງຊາດ, ມີພຽງແຕ່ບຳລຸງສ້າງນາຍຊ່າງຊາດໃຫຍ່, ນາຍຊ່າງຜູ້ດີເດັ່ນໃຫ້ຫຼາຍກວ່າເກົ່າ, ສ້າງຫຼັກຫີນພື້ນຖານໃຫ້ໝັ້ນຄົງ ແລະ ສ້າງເສົາຄ້ຳໃຫ້ເຂັ້ມແຂງເທົ່ານັ້ນ, ອາຄານ ໃຫຍ່ແຫ່ງປະຊາຊາດຈີນຈຶ່ງຈະສາມາດຕັ້ງຕົວຢູ່ໄດ້ຢ່າງສູງສະຫງ່າຕະຫຼອດໄປ.