ຕອນເຊົ້າວັນທີ 6 ພຶດສະພານີ້, ທ່ານນາງເຜີງລີ້ຢວນ ພັນລະຍາຂອງທ່ານສີຈິ້ນຜິງ ປະທານປະເທດຈີນ, ທູດພິເສດດ້ານການຊຸກຍູ້ການສຶກສາເພື່ອເດັກຍິງແລະແມ່ຍິງຂອງອົງການເພື່ອການສຶກສາ, ວິທະຍາສາດ ແລະ ວັດທະນະທຳແຫ່ງສະຫະປະຊາຊາດ ຫຼື UNESCO ໄດ້ຢ້ຽມຢາມສຳນັກງານໃຫຍ່ອົງການ UNESCO ທີ່ນະຄອນຫຼວງປາຣີປະເທດຝຣັ່ງຕາມຄຳເຊີນ.

ໃນເວລາພົບປະກັບທ່ານນາງອາຊູໄລ ຜູ້ອຳນວຍການໃຫຍ່ອົງການ UNESCO, ທ່ານນາງເຜີງລີ້ຢວນໄດ້ແນະນຳຄວາມຄືບໜ້າຫຼ້າສຸດຂອງຈີນໃນການຊຸກຊູ້ວຽກງານການສຶກສາເພື່ອເດັກນ້ອຍແລະແມ່ຍິງ. ທ່ານນາງເຜີງລີ້ຢວນກ່າວວ່າ: ຈີນຍິນດີພະຍາຍາມຮ່ວມກັບອົງການ UNESCO, ຊຸກຍູ້ໃຫ້ຝ່າຍຕ່າງໆເພີ່ມງົບປະມານເຂົ້າໃນການສຶກສາເພື່ອເດັກຍິງແລະແມ່ຍິງໃນທົ່ວໂລກ ເພື່ອຊ່ວຍເຫຼືອເພດຍິງຫຼາຍກວ່າເກົ່າໃຫ້ໄດ້ຮັບສິດທິດ້ານການສຶກສາທີ່ສະເໝີພາບ, ຮ່ວມກັນສ້າງອະນາຄົດທີ່ດີງາມ.

ທ່ານນາງອາຊູໄລໄດ້ຕີລາຄາສູງຕໍ່ວຽກງານແລະການປະກອບສ່ວນຂອງທ່ານນາງເຜີງລີ້ຢວນນັບແຕ່ເປັນທູດພິເສດເປັນຕົ້ນມາ ແລະຢືນຢັນວ່າ: ອົງການ UNESCO ຍິນດີຮ່ວມກັບຈີນເພີ່ມທະວີການແລກປ່ຽນແລະການຮ່ວມມື, ຊຸກຍູ້ໃຫ້ວຽກງານການສຶກສາເພື່ອເດັກຍິງແລະແມ່ຍິງໃນທົ່ວໂລກມີການພັດທະນາໃໝ່.