ວັນທີ 7 ພຶດສະພານີ້, ເນື່ອງໃນໂອກາດທີ່ທ່ານ ສີຈິ້ນຜິງ ປະທານປະເທດຈີນເດີນທາງໄປນະຄອນຫຼວງແບນກຣາດເພື່ອຢ້ຽມຢາມແຊັກບີທາງລັດຖະກິດ, ໜັງສືພິມການເມືອງຂອງແຊັກບີໄດ້ລົງບົດຄວາມຂອງທ່ານ ສີຈິ້ນຜິງ ທີ່ພາດຫົວຂໍ້ວ່າ: ໃຫ້ແສງສະຫວ່າງແຫ່ງໄມຕີຈິດມິດຕະພາບຢ່າງສະໜິດແໜ້ນເຍືອງທາງແຫ່ງການຮ່ວມມືລະຫວ່າງຈີນ-ແຊັກບີ.

   ເນື້ອໃນບົດຄວາມຂອງທ່ານ ສີຈິ້ນຜິງ ລະບຸວ່າ: ເຖິງວ່າຈີນກັບແຊັກບີຢູ່ຫ່າງໄກກັນກໍຕາມ, ແຕ່ຈິດໃຈຂອງປະຊາຊົນສອງປະເທດຊໍ້າພັດໄດ້ເຊື່ອມສານກັນມາໂດຍຕະຫຼອດ. ບໍ່ວ່າສະພາບການສາກົນຈະຜັນແປໄປແນວໃດກໍຕາມ, ແຕ່ຈີນ-ແຊັກບີຍາມໃດກໍເປັນເພື່ອນມິດທີ່ແທ້ຈິງທັງເປັນຄູ່ຮ່ວມມືທີ່ດີ. ຂ້າພະເຈົ້າຫວັງຢາກຜ່ານການຢ້ຽມຢາມຄັ້ງນີ້, ສຸມຄວາມພະຍາຍາມກັບແຊັກບີ, ເສີມຂະຫຍາຍໄມຕີຈິດມິດຕະພາບຢ່າງສະໜິດແໜ້ນລະຫວ່າງຈີນ-ແຊັກບີ, ສ້າງຄວາມຜາສຸກໃຫ້ແກ່ປະຊາຊົນສອງປະເທດດີຂຶ້ນກວ່າເກົ່າ, ສົ່ງເສີມສັນຕິພາບ ແລະ ການພັດທະນາຂອງໂລກ ເພື່ອຮ່ວມກັນຊຸກຍູ້ການສ້າງປະຊາຄົມຮ່ວມຊາຕາກໍາຂອງມວນມະນຸດ.

   ເນື້ອໃນບົດຄວາມຂອງທ່ານ ສີຈິ້ນຜິງ ລະບຸຕື່ມວ່າ: ພວກເຮົາຫຼົງລືມບໍ່ໄດ້ວ່າ: ກ່ອນໜ້ານີ້ 25 ປີ, ອົງການນາໂຕໄດ້ຖິ້ມລະເບີດໃສ່ສະຖານທູດຈີນປະຈໍາອະດີດສະຫະພັນຢູໂກສະລາວີຢ່າງບັງອາດ. ປະຊາຊົນຈີນທະນຸຖະໜອມສັນຕິພາບ, ແຕ່ບໍ່ຫ່ອນຈະອະນຸຍາດໃຫ້ເຫດການໂສກນາຕະກໍາໃນປະຫວັດສາດເກີດຂຶ້ນອີກເທື່ອໜຶ່ງຢ່າງເດັດຂາດ. ມິດຕະພາບທີ່ຊຸບຫຼໍ່ດ້ວຍເລືອດເນື້ອຂອງປະຊາຊົນຈີນ-ແຊັກບີໄດ້ກາຍເປັນຄວາມຊົງຈໍາຮ່ວມຂອງປະຊາຊົນສອງປະເທດ ເຊິ່ງຈະເປັນກໍາລັງໃຈໃຫ້ແກ່ສອງຝ່າຍໃນການກ້າວເດີນໄປຂ້າງໜ້າຮ່ວມກັນ. ພວກເຮົາຍິນດີຮ່ວມກັບເພື່ອນມິດແຊັກບີ, ບໍ່ລືມອຸດົມການແຕ່ຫົວທີ, ກ້າວໜ້າໄປພ້ອມກັນ ເພື່ອຮ່ວມກັນຂຽນປະຫວັດສາດໜ້າໃໝ່ແຫ່ງການພັດທະນາ ແລະ ຄວາມຈະເລີນຮຸ່ງເຮືອງຂອງປະເທດຊາດ ກໍຄືຮ່ວມກັນສ້າງຄູ່ຮ່ວມຊາຕາກໍາຈີນ-ແຊັກບີໃນຍຸກໃໝ່.