ຕອນທ່ຽງວັນທີ 8 ພຶດສະພານີ້, ພາຍຫຼັງພົບປະເຈລະຈາກັນ, ທ່ານສີຈິ້ນຜິງ ປະທານປະເທດຈີນ ແລະ ທ່ານອາເລັກຊານດາ ວູຊິກ ປະທານາທິບໍດີແຊັກບີໄດ້ຮ່ວມກັນຖະແຫຼງຂ່າວຕໍ່ສື່ມວນຊົນຢູ່ຫໍລັດຖະສະພາແຊັກບີໃນນະຄອນຫຼວງແບນກຣາດ.

ໃນໂອກາດດັ່ງກ່າວ, ທ່ານສີຈິ້ນຜິງຊີ້ໃຫ້ເຫັນວ່າ: ເມື່ອຫວນຄືນປະຫວັດສາດຈະເຫັນໄດ້ວ່າ: ມິດຕະພາບຈີນ-ແຊັກບີແມ່ນກຳເນີດເກີດຂຶ້ນຈາກການສູ້ຊົນອັນຍິ່ງໃຫຍ່ແຫ່ງການຮ່ວມກັນປົກປັກຮັກສາສັນຕິພາບແລະການພັດທະນາຂອງໂລກ, ຊຸບຫຼໍ່ດ້ວຍເນື້ອເລືອດແລະຊີວິດ. ເມື່ອຈ້ອງມອງເບິ່ງອະນາຄົດ, ການສ້າງຄູ່ຮ່ວມຊາຕາກຳຈີນ-ແຊັກບີໃນຍຸກໃໝ່ແມ່ນທາງເລືອກຍຸດທະສາດຂອງສອງຝ່າຍ, ເຊິ່ງມີເປົ້າໝາຍເພື່ອເຮັດໃຫ້ຄວາມປາດຖະໜາຂອງປະຊາຊົນສອງຊາດທີ່ຢາກມີຊີວິດອັນດີງາມໃຫ້ບັນລຸຜົນເປັນຈິງ, ພື້ນຖານແລະແຮງຂັບເຄື່ອນເພື່ອບັນລຸເປົ້າໝາຍດັ່ງກ່າວ ແມ່ນເກີດມາຈາກການສະໜັບສະໜູນຢ່າງເດັດດ່ຽວແລະການມີສ່ວນຮ່ວມຢ່າງກວ້າງຂວາງຂອງປະຊາຊົນສອງຊາດ. ຈີນຍິນດີຮ່ວມກັບແຊັກບີຈັບມືກັນ ແລະ ຄຽງບ່າຄຽງໄຫຼ່ກັນກ້າວຂຶ້ນສູ່ເສັ້ນທາງຂະບວນການໃໝ່ແຫ່ງການສ້າງຄູ່ຮ່ວມຊາຕາກຳຈີນ-ແຊັກບີໃນຍຸກໃໝ່, ເພື່ອເຮັດໃຫ້ສາຍພົວພັນລະຫວ່າງສອງປະເທດເກີດຄວາມສະຫງ່າງາມໃໝ່ຢ່າງບໍ່ຢຸດຢັ້ງ.