ວັນທີ7ພຶດສະພານີ້, ທ່ານ ວະລາດີເມຍ ປູຕິນ ໄດ້ສາບານຕົວຂຶ້ນຮັບຕຳແໜ່ງປະທານາທິບໍດີສະຫະພັນຣັດເຊຍຊຸດທີ8.

    ຫຼັງຈາກສາບານຕົວ, ທ່ານປູຕິນໄດ້ກ່າວຄຳປາໄສຂຶ້ນຮັບຕຳແໜ່ງໂດຍກ່າວຢືນຢັນວ່າ: ການປົກປ້ອງຣັດເຊຍພ້ອມທັງຮັບໃຊ້ປະຊາຊົນເປັນກຽດຕິຍົດແລະໜ້າທີ່ອັນໃຫຍ່ຫຼວງແລະເປັນພັນທະອັນສັກສິດຂອງຕົນ, ຜົນປະໂຫຍດແລະຄວາມປອດໄພຂອງປະຊາຊົນຣັດເຊຍແມ່ນຢູ່ເໜືອກວ່າທຸກສິ່ງຢ່າງ. ຣັດເຊຍຍ່ອມຈະສາມາດຜ່ານຜ່າໄລຍະລຳບາກໄດ້ຢ່າງມີກຽດສັກສີແນ່ນອນພ້ອມທັງຈະສາມາດຈັດຕັ້ງປະຕິບັດແຜນການໄລຍະຍາວ ແລະໂຄງການທີ່ຍິ່ງໃຫຍ່ໃຫ້ເກີດມີປະສິດທິຜົນທີ່ດີແລະບັນລຸເປົ້າໝາຍການພັດທະນາ.ພ້ອມດຽວກັນນັ້ນ, ຣັດເຊຍຍັງຈະສືບຕໍ່ເພີ່ມທະວີສາຍພົວພັນທີ່ດີງາມກັບທຸກປະເທດທີ່ຖືຣັດເຊຍເປັນຄູ່ຮ່ວມມືທີ່ໜ້າໄວ້ໃຈໄດ້, ຂະນະດຽວກັນຈະບໍ່ປະຕິເສດການສົນທະນາບັນຫາຕ່າງໆເຊິ່ງລວມທັງບັນຫາຄວາມໝັ້ນຄົງກັບປະເທດຕາເວັນຕົກ, ແຕ່ເງື່ອນໄຂເບື້ອງຕົ້ນຕ້ອງມີຄວາມສະເໝີພາບແລະເຄົາລົບເຊິ່ງກັນແລະກັນ. ຣັດເຊຍຈະຮ່ວມກັບຄູ່ຮ່ວມມືສືບຕໍ່ສຸມກຳລັງເຂົ້າໃນການສ້າງລະບຽບໂລກຫຼາຍຂົ້ວແລະລະບົບຄວາມໝັ້ນຄົງທີ່ສະເໝີພາບ.