ວັນທີ 6 ພຶດສະພານີ້, ທ່ານສີຈິ້ນຜິງ ປະທານປະເທດຈີນ ໄດ້ພົບປະກັບທ່ານເອັມມານເອວ ມາຄຣົງ ປະທານາທິບໍດີຝຣັ່ງຢູ່ທີ່ນະຄອນຫຼວງປາຣີ, ສອງຝ່າຍໄດ້ບັນລຸຜົນສຳເລັດຢ່າງອຸດົມສົມບູນ. ຈີນ ແລະ ຝຣັ່ງໄດ້ສົ່ງສັນຍານການຮ່ວມມືກັນຢ່າງຊັດເຈນ, ເຊິ່ງພາໃຫ້ເກີດມີຫາງສຽງສົນໃຈໃນລະດັບສູງ. ທ່ານມາຄຣົງກ່າວວ່າ, ປັດຈຸບັນ ໂລກພວມປະເຊີນໜ້າກັບສິ່ງທ້າທາຍອັນໜັກໜ່ວງ, ຝຣັ່ງ ແລະ ສະຫະພາບເອີຣົບມີຄວາມຕ້ອງການເພີ່ມທະວີການຮ່ວມມືກັບຈີນຫຼາຍຂຶ້ນກວ່າທຸກໄລຍະທີ່ຜ່ານມາ, ເພາະເລື່ອງນີ້ພົວພັນເຖິງອະນາຄົດຂອງເອີຣົບ.
ໃນໂອກາດທີ່ເດີນທາງຢ້ຽມຢາມຝຣັ່ງທາງລັດຖະກິດຄັ້ງນີ້, ທ່ານປະທານສີຈິ້ນຜິງໄດ້ຂຽນບົດຄວາມລົງໃນສື່ມວນຊົນຂອງຝຣັ່ງໂດຍມີເນື້ອໃນລະບຸວ່າ: ຍິນດີຊຸກຍູ້ໃຫ້ສາຍພົວພັນຈີນ-ຝຣັ່ງສືບທອດລະຫວ່າງກ່ອນ ແລະ ຫຼັງຈາກອັນເກົ່າ ຂະຫຍາຍສູ່ອັນໃໝ່. ທ່ານປະທານາທິບໍດີມາຄຣົງກໍເຫັນດີນຳວ່າ, ສາຍພົວພັນຝຣັ່ງ-ຈີນພວມຢູ່ໃນໄລຍະສຳຄັນເປັນຂໍກຸນແຈທີ່ຈະຕ້ອງສືບຕໍ່ອັນເກົ່າ ຂະຫຍາຍອັນໃໝ່.
ບຸກຄົນວິເຄາະກໍເຫັນໄດ້ວ່າ, ໃນດ້ານໜຶ່ງ, ຈີນ ແລະ ຝຣັ່ງຕ້ອງການສະຫຼຸບບົດຮຽນທີ່ມີຜົນສຳເລັດໃນການສ້າງສາຍພົວພັນທາງການທູດ 60 ປີມານີ້, ຮ່ວມກັນວາງແຜນຜັງອັນໃໝ່ແຫ່ງການຮ່ວມມື, ເພີ່ມພະລັງຂັບເຄື່ອນອັນໃໝ່ເຂົ້າໃນສາຍພົວພັນຈີນ-ຝຣັ່ງ. ອີກດ້ານໜຶ່ງ, ໂລກໃນປັດຈຸບັນແມ່ນຍັງມີຄວາມປັ່ນປ່ວນ, ສອງຝ່າຍລ້ວນແຕ່ເຫັນພ້ອມກັນວ່າ, ການຂະຫຍາຍສາຍພົວພັນຈີນ-ຝຣັ່ງໃຫ້ດີ, ມີຄວາມໝາຍສຳຄັນເປັນຢ່າງຍິ່ງຕໍ່ການຊຸກຍູ້ການຮ່ວມມືຈີນ-ເອີຣົບ, ປົກປັກຮັກສາສັນຕິພາບ ແລະ ສະຖຽນລະພາບຂອງໂລກ.
ຄວນຈະວາງແຜນການຮ່ວມມືລະຫວ່າງຈີນ-ຝຣັ່ງແນວໃດໃນອີກຮອບ 60 ປີຕໍ່ໜ້ານີ້? ໃນໄລຍະຢ້ຽມຢາມຝຣັ່ງ, ທ່ານປະທານສີຈິ້ນຜິງໄດ້ສະເໜີວ່າ: “ສອງຝ່າຍຄວນຍຶດໝັ້ນອຸດົມການແຕ່ຫົວທີແຫ່ງການສ້າງສາຍພົວພັນທາງການທູດ, ເຊັ່ນ: ເອກະລາດ ເປັນເຈົ້າຕົນເອງ, ເຂົ້າໃຈເຊິ່ງກັນແລະກັນ, ເບິ່ງກວ້າງມອງໄກ, ຕ່າງຝ່າຍຕ່າງມີຜົນປະໂຫຍດ”, “ສ້າງສາຍພົວພັວຈີນ-ຝຣັ່ງໃຫ້ມີຄວາມໄວ້ເນື້ອເຊື່ອໃຈເຊິ່ງກັນແລະກັນຢ່າງໝັ້ນທ່ຽງ, ຍຶດໝັ້ນກ້າວໄປຕາມເສັ້ນທາງທີ່ຖືກຕ້ອງ, ສືບທອດໝາກຜົນຂອງການພັດທະນາສາຍພົວພັນສອງຝ່າຍທັງມີການປະດິດສ້າງໃໝ່, ແລະແບກຫາບຄວາມຮັບຜິດຊອບຢ່າງກ້າຫານ”, ສອງຝ່າຍຕ້ອງຊ່ວຍກັນປ້ອງກັນບໍ່ໃຫ້ເກີດ “ສົງຄາມເຢັນຄັ້ງໃໝ່” ຫຼື ການເປັນປໍລະປັກກັນລະຫວ່າງກຸ່ມກ້ອນ, ຊ່ວຍກັນຊຸກຍູ້ການຢູ່ຮ່ວມກັນຢ່າງກົມກຽວກັນຂອງໂລກທີ່ມີຫຼາກຫຼາຍສີສັນ, ຮ່ວມກັນຊຸກຍູ້ການຫັນເປັນຫຼາຍຂົ້ວຂອງໂລກທີ່ສະເໝີພາບ ແລະ ເປັນລະບຽບ, ຮ່ວມກັນຄັດຄ້ານ “ການຕັດຂາດສາຍສຳພັນທາງດ້ານເສດຖະກິດ”, ຈຸດຢືນເຫຼົ່ານີ້ໄດ້ຊີ້ທິດເຍືອງທາງໃຫ້ແກ່ການຂະຫຍາຍສາຍພົວພັນຈີນ-ຝຣັ່ງເພື່ອປັບປຸງຄວາມໄວ້ເນື້ອເຊື່ອໃຈດ້ານການເມືອງ, ເປີດກວ້າງການຮ່ວມມືຕົວຈິງ, ຮ່ວມກັນແບກຫາບຄວາມຮັບຜິດຊອບຂອງສາກົນ ແລະອື່ນໆ.
ຈີນ ແລະ ຝຣັ່ງພວມທີ່ຈະມຸ່ງໜ້າສູ່ອີກຮອບ 60 ປີຕໍ່ໜ້ານີ້, ສອງຝ່າຍຈະສືບຕໍ່ອັນເກົ່າຂະຫຍາຍອັນໃໝ່, ຈະໄດ້ສ້າງຜົນງານຢ່າງໃຫຍ່ຫຼວງ, ນີ້ບໍ່ພຽງແຕ່ຈະສ້າງຜົນປະໂຫຍດໃຫ້ກັບປະຊາຊົນສອງຊາດເທົ່ານັ້ນ, ແຕ່ຍັງຈະຊຸກຍູ້ໃຫ້ການຮ່ວມມືຈີນ-ເອີຣົບ, ກໍຄືຊຸກຍູ້ສັນຕິພາບ ແລະ ການພັດທະນາຂອງໂລກອີກດ້ວຍ.