ຕອນຄ່ຳວັນທີ8ພຶດສະພານີ້, ທ່ານສີຈິ້ນຜິງ ປະທານປະເທດຈີນໄດ້ເດີນທາງດ້ວຍເຮືອບິນພິເສດເຖິງນະຄອນຫຼວງບູດາເປດເພື່ອດຳເນີນການຢ້ຽມຢາມຮົງກາລີທາງລັດຖະກິດ.

   ໃນໂອກາດດັ່ງກ່າວ, ທ່ານສີຈິ້ນຜິງໄດ້ກ່າວຄຳປາໄສທາງລາຍລັກອັກສອນຢູ່ສະໜາມບິນໂດຍຊີ້ໃຫ້ເຫັນວ່າ: ສອງປະເທດຈີນ-ຮົງກາລີເປັນເພື່ອນມິດທີ່ດີ ຄູ່ຮ່ວມມືທີ່ດີທີ່ໄວ້ເນື້ອເຊື່ອໃຈກັນ. ໃນຊຸມປີຜ່ານມານີ້, ການນຳຂັ້ນສູງຂອງສອງປະເທດໄດ້ໄປມາຫາສູ່ກັນຢ່າງໃກ້ຊິດ, ໄດ້ຍົກລະດັບຄວາມໄວ້ເນື້ອເຊື່ອໃຈກັນໃຫ້ສູງຂຶ້ນຢ່າງບໍ່ຢຸດຢັ້ງ.

    ປີນີ້ເປັນປີຄົບຮອບ75ປີແຫ່ງການສ້າງຕັ້ງສາຍພົວພັນທາງການທູດຈີນ-ຮົງກາລີ, ການຂະຫຍາຍສາຍພົວພັນຂອງສອງປະເທດໄດ້ມີໂອກາດອັນສຳຄັນ. ຂ້າພະເຈົ້າເຊື່ອໝັ້ນວ່າ: ບໍ່ວ່າສະພາບສາກົນຈະຜັນແປໄປຄືແນວໃດກໍຕາມ, ສອງປະເທດຈີນ-ຮົງກາລີຍ່ອມຈະຍຶດໝັ້ນກຳແໜ້ນແລະປະຕິບັດຕໍ່ສາຍພົວພັນສອງຝ່າຍດ້ວຍມູມມອງທີ່ກວ້າງຂວາງແລະສາຍຕາເບິ່ງກວ້າງມອງໄກ, ບຸກບືນກ້າວໄປຂ້າງໜ້າດ້ວຍຄວາມອາດຫານ, ຮ່ວມກັນສ້າງປະຊາຄົມຮ່ວມຊາຕາກຳຂອງມວນມະນຸດ, ປະກອບສ່ວນຕາມສິ່ງທີ່ຄວນເຂົ້າໃນການສົ່ງເສີມສັນຕິພາບ ສະຖຽນລະພາບແລະການພັດທະນາຂອງໂລກໃຫ້ມີຄວາມຈະເລີນຮຸ່ງເຮືອງ. ເຊື່ອໝັ້ນວ່າ ພາຍໃຕ້ຄວາມພະຍາຍາມຮ່ວມຂອງສອງຝ່າຍ, ການຢ້ຽມຢາມເທື່ອນີ້ຈະປະສົບຜົນສຳເລັດຢ່າງຈົບງາມແນ່ນອນ ແລະຊຸກຍູ້ໃຫ້ສາຍພົວພັນຈີນ-ຮົງກາລີຂະຫຍາຍຕົວໄປສູ່ອະນາຄົດທີ່ດີງາມກວ່າເກົ່າ.