ວັນທີ 10 ພຶດສະພານີ້, ກອງປະຊຸມວິສາມັນຂອງກອງປະຊຸມສະມັດຊາໃຫຍ່ອົງການສະຫະປະຊາຊາດຜ່ານມະຕິ ໂດຍມອບສິດແລະຜົນປະໂຫຍດຫຼາຍກວ່າເກົ່າໃຫ້ປາແລັດສະຕີນ, ຫຼັງຈາກນັ້ນ ທ່ານມາຮາໝຸດ ອັບບາສ ປະທານາທິບໍດີປາແລັດສະຕີນໄດ້ອອກຖະແຫຼງການ ເພື່ອຂອບໃຈບັນດາປະເທດທີ່ລົງຄະແນນສຽງສະໜັບສະໜູນປາແລັດສະຕີນ ໂດຍກ່າວວ່າ ນີ້ເປັນການສະໜັບສະໜູນຕໍ່ຄວາມເປັນຈິງແລະຄວາມເປັນທຳ.

    ຖະແຫຼງການຂອງທ່ານອັບບາສລະບຸວ່າ: ການລົງຄະແນນສຽງສະໜັບສະໜູນປາແລັດສະຕີນສ່ວນຫຼາຍຈາກທົ່ວໂລກໃນເທື່ອນີ້ໄດ້ສະແດງໃຫ້ເຫັນເຖິງຄວາມບໍ່ເຫັນດີຕໍ່ອິດສະຣາແອນທີ່ເຂົ້າໄປຍຶດຄອງດິນແດນແລະລ່ວງລ້ຳສິດປະຊາຊົນປາແລັດສະຕີນ. ໂດຍແນໃສ່ຜົນການລົງຄະແນນສຽງດັ່ງກ່າວນີ້, ປາແລັດສະຕີນຈະສືບຕໍ່ພະຍາຍາມຍາດໃຫ້ໄດ້ສິດເປັນປະເທດສະມາຊິກທາງການຂອງອົງການສະຫະປະຊາຊາດໂດຍຜ່ານການຕົກລົງຂອງສະພາຄວາມໝັ້ນຄົງ, ທັງຮຽກຮ້ອງໃຫ້ປະເທດທີ່ຍັງບໍ່ທັນໄດ້ຮັບຮອງປາແລັດສະຕີນໃຫ້ຄວາມເຫັນດີຮັບຮອງຕໍ່ເລື່ອງນີ້.