ວັນທີ 16 ພຶດສະພານີ້, ທ່ານສີຈິ້ນຜິງ ປະທານປະເທດຈີນໄດ້ພົບປະ ແລະ ສົນທະນາວົງແຄບກັບທ່ານວະລາດີເມຍ ປູຕິນ ປະທານາທິບໍດີຣັດເຊຍທີ່ເດີນທາງມາຢ້ຽມຢາມຈີນ. ຜູ້ນຳທັງສອງປະເທດໄດ້ສະຫຼຸບບົດຮຽນທີ່ໄດ້ຮັບຕະຫຼອດໄລຍະ 75 ປີທີ່ຜ່ານມາ ນັບແຕ່ຈີນ ແລະ ຣັດເຊຍໄດ້ສ້າງຕັ້ງສາຍພົວພັນທາງການທູດເປັນຕົ້ນມາ, ແລກປ່ຽນຄວາມເຫັນຢ່າງເລິກເຊິ່ງກ່ຽວກັບການພົວພັນສອງຝ່າຍ ກໍຄືບັນຫາພາກພື້ນ ແລະ ສາກົນທີ່ສອງປະເທດມີຄວາມສົນໃຈຮ່ວມກັນ, ຮ່ວມກັນວາງແຜນການຮ່ວມມືໃໝ່ລະຫວ່າງສອງປະເທດ. ຈີນ ແລະ ຣັດເຊຍຍັງໄດ້ອອກຖະແຫຼງການຮ່ວມ ແລະ ເຊັນເອກະສານຮ່ວມມືຫຼາຍສະບັບ ເຊິ່ງໄດ້ສ້າງພະລັງຂັບເຂື່ອນໃໝ່ໃຫ້ແກ່ການລົງເລິກການພົວພັນສອງປະເທດ.

ເມື່ອສັງເກດເບິ່ງຂອບເຂດທົ່ວໂລກແລ້ວ, ການພົວພັນຈີນ-ຣັດເຊຍແມ່ນມີເອກະລັກພິເສດ. ຈີນ ແລະ ຣັດເຊຍໄດ້ຍຶດໝັ້ນ “ບໍ່ຮ່ວມກຸ່ມ, ບໍ່ເປັນປໍລະປັກກັນ, ບໍ່ແນໃສ່ຝ່າຍທີສາມ”, ເປັນສາຍພົວພັນທີ່ກ້າວຂ້າມພັນທະມິດດ້ານການທະຫານ ແລະ ການເມືອງໃນສະໄໝສົງຄາມເຢັນ, ໄດ້ສ້າງແບບຢ່າງໃຫ້ແກ່ການພົວພັນສາກົນແບບໃໝ່ ແລະ ນຳເອົາຄວາມໝັ້ນທ່ຽງອັນລ້ຳຄ່າມາໃຫ້ແກ່ໂລກທີ່ມີຄວາມວຸ້ນວາຍປັ່ນປ່ວນ.

ນັບແຕ່ປີ 2013 ເປັນຕົ້ນມາ, ປະມຸກລັດຈີນ ແລະ ຣັດເຊຍໄດ້ພົບປະກັນເຖິງ 40 ກວ່າຄັ້ງແລ້ວ. ພາຍໃຕ້ການນຳພາທາງຍຸດທະສາດລະຫວ່າງຜູ້ນຳຂອງສອງປະເທດ, ການພົວພັນຂອງສອງປະເທດໄດ້ບັນລຸລະດັບສູງສຸດໃນປະຫວັດສາດ. ສະນັ້ນ, ເຄັດລັບແຫ່ງຄວາມສຳເລັດຂອງການຮ່ວມມືຈີນ-ຣັດເຊຍແມ່ນຫຍັງ? “ພວກເຮົາຕ້ອງປະຕິບັດຕາມຫຼັກການ 5 ປະການຢູ່ຮ່ວມກັນໂດຍສັນຕິຢ່າງສະເໝີຕົ້ນສະເໝີປາຍ, ເຄົາລົບເຊິ່ງກັນແລະກັນ, ສະເໝີພາບ, ໄວ້ເນື້ອເຊື່ອໃຈກັນ, ເອົາໃຈໃສ່ຄວາມເປັນຫ່ວງຂອງກັນແລະກັນ, ຍູ້ໜູນກັນໃນການພັດທະນາ ແລະ ຄວາມຈະເລີນຮຸ່ງເຮືອງຂອງແຕ່ລະຝ່າຍຢ່າງແທ້ຈິງ”, ນີ້ຄືເສັ້ນທາງແຫ່ງການຢູ່ຮ່ວມກັນຢ່າງຖືກຕ້ອງລະຫວ່າງຈີນກັບຣັດເຊຍທີ່ສະຫຼຸບໂດຍທ່ານປະທານສີຈິ້ນຜິງ.

ເມື່ອຫວນຄືນປະຫວັດສາດແລ້ວເຫັນວ່າ ການຢູ່ຮ່ວມກັນລະຫວ່າງປະເທດໃຫຍ່ເປັນບັນຫາຫຍຸ້ງຍາກ. ປັດຈຸບັນ, ປະເທດຕາເວັນຕົກຈຳນວນໜຶ່ງໄດ້ຊຸກຍູ້ “ການແຂ່ງຂັນລະຫວ່າງປະເທດໃຫຍ່”, ຍຸແຫຍ່ການແບ່ງແຍກ ແລະ ການເປັນປໍລະປັກກັນຢູ່ໃນໂລກ. ແຕ່ການພົວພັນຈີນ-ຣັດເຊຍຍັງສາມາດຮັກສາການພັດທະນາຢ່າງໝັ້ນທ່ຽງ ແລະ ຕໍ່ເນື່ອງ ເຊິ່ງສະແດງໃຫ້ເຫັນວ່າ: ປະເທດໃຫຍ່ສາມາດຄົ້ນພົບເສັ້ນທາງແຫ່ງການຢູ່ຮ່ວມກັນຢ່າງຖືກຕ້ອງ ພ້ອມທັງນຳໃຊ້ການພົວພັນສອງຝ່າຍທີ່ເຂັ້ມແຂງເພື່ອນຳເອົາການພັດທະນາ, ການຮ່ວມມື ແລະ ຄວາມໝັ້ນຄົງມາໃຫ້ແກ່ໂລກ.