ທ່ານ ໂຕເລີ່ມ

   ຕາມແຫຼ່ງຂ່າວຈາກສຳນັກຂ່າວສານຫວຽດນາມແຈ້ງໃຫ້ຮູ້ວ່າ: ພາຍຫຼັງກອງປະຊຸມຄົບຄະນະບໍລິຫານງານສູນກາງພັກຄອມມູນິດຫວຽດນາມຄັ້ງທີ 9 ສະໄໝທີ 13 ໄດ້ປິດລົງຢ່າງເປັນທາງການແລ້ວ, ທ່ານຫງວຽນຟູຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກຄອມມູນິດຫວຽດນາມ ໄດ້ຈັດກອງປະຊຸມວົງແຄບກັບສະຫາຍການນຳສຳຄັນທ່ານອື່ນໆໂດຍກ່າວຢືນຢັນວ່າ: ກອງປະຊຸມຄົບຄະນະບໍລິຫານງານສູນກາງພັກຄອມມູນິດຫວຽດນາມຄັ້ງທີ 9ສະໄໝທີ 13 ໄດ້ຕົກລົງບັນຊີລາຍຊື່ປະທານປະເທດ ແລະ ປະທານສະພາແຫ່ງຊາດຄົນໃໝ່ເພື່ອສະເຫນີຕໍ່ສະພາແຫ່ງຊາດຫວຽດນາມ ໂດຍສະເໜີໃຫ້ທ່ານໂຕເລີ່ມ ກຳມະການກົມການເມືອງສູນກາງພັກຄອມມູນິດຫວຽດນາມ, ລັດຖະມົນຕີກະຊວງປ້ອງກັນຄວາມສະຫງົບດຳລົງຕຳແໜ່ງເປັນປະທານປະເທດຫວຽດນາມ, ແລະສະເໜີໃຫ້ທ່ານ ເຈີ້ນແທັງເມິນ ກຳມະການກົມການເມືອງສູນກາງພັກຄອມມູນິດຫວຽດນາມ, ຮອງປະທານຜູ້ປະຈຳການສະພາແຫ່ງຊາດຫວຽດນາມ ດຳລົງຕຳແໜ່ງເປັນປະທານສະພາແຫ່ງຊາດຫວຽດນາມ.

ທ່ານ ເຈີ້ນແທັງເມິນ

    ກອງປະຊຸມຄົບຄະນະບໍລິຫານງານສູນກາງພັກຄອມມູນິດຫວຽດນາມຄັ້ງທີ 9 ສະໄໝທີ 13 ໄດ້ຈັດຂຶ້ນລະຫວ່າງວັນທີ 16-18 ພຶດສະພານີ້ ຢູ່ນະຄອນຫຼວງຮ່າໂນ້ຍປະເທດຫວຽດນາມ.