ວັນທີ 20 ພຶດສະພານີ້, ທ່ານວາງຢີ້ ກໍາມະການກົມການເມືອງສູນກາງພັກຄອມມູນິດຈີນ, ລັດຖະມົນຕີກະຊວງການຕ່າງປະເທດຈີນໄດ້ພົບປະກັບທ່ານ ເຊີເກ ລາຟໂຣຟ ລັດຖະມົນຕີກະຊວງການຕ່າງປະເທດຣັດເຊຍໃນໂອກາດເຂົ້າຮ່ວມກອງປະຊຸມລັດຖະມົນຕີການຕ່າງປະເທດຂອງອົງການຮ່ວມມືຊຽງໄຮຢູ່ນະຄອນຫຼວງອາສຕານາປະເທດກາຊັກສະຖານ.

    ທ່ານວາງຢີ້ກ່າວວ່າ: ພາຍໃຕ້ສະພາບການໃນປັດຈຸບັນ, ອົງການຮ່ວມມືຊຽງໄຮ້ທີ່ແໜ້ນແຟ້ນສາມັກຄີ ແລະ ຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດບໍ່ພຽງແຕ່ສອດຄ່ອງກັບຜົນປະໂຫຍດຮ່ວມຂອງປະເທດສະມາຊິກເທົ່ານັ້ນ, ຍັງສອດຄ່ອງກັບກະແສຫັນເປັນຫຼາຍຂົ້ວຂອງໂລກອີກດ້ວຍ. ຈີນຍິນດີຮ່ວມກັບຣັດເຊຍປະສານງານກັນຢ່າງໃກ້ຊິດ, ຮ່ວມກັບປະເທດສະມາຊິກອື່ນໆ, ຮ່ວມກັນປົກປັກຮັກສາຄວາມໝັ້ນຄົງ, ຄວາມໝັ້ນທ່ຽງ ແລະ ການພັດທະນາຂອງພາກພື້ນໃຫ້ດີ, ຊຸກຍູ້ໃຫ້ການບໍລິຫານທົ່ວໂລກພັດທະນາໄປຕາມທິດທາງທີ່ຍຸຕິທໍາ ແລະ ສົມເຫດສົມຜົນກວ່າເກົ່າ.

    ທ່ານເຊີເກ ລາຟໂຣຟກ່າວວ່າ: ພາຍຫຼັງໄດ້ຮັບເລືອກຕັ້ງເປັນປະທານາທິບໍດີອີກສະໄໝໜຶ່ງໄດ້ບໍ່ດົນ, ທ່ານວະລາດີເມຍ ປູຕິນໄດ້ມາຢ້ຽມຢາມຈີນ, ເຊິ່ງສະແດງໃຫ້ເຫັນເຖິງຄວາມພິເສດ ແລະ ຄວາມສໍາຄັນຂອງສາຍພົວພັນລະຫວ່າງຣັດເຊຍ ກັບ ຈີນ, ຂໍສະແດງຄວາມຂອບໃຈຕໍ່ເພື່ອນຈີນທີ່ໄດ້ຕ້ອນຮັບທ່ານວະລາດີເມຍ ປູຕິນຢ່າງສົມກຽດ. ປະມຸກລັກສອງປະເທດໄດ້ອອກຖະແຫຼງການຮ່ວມ, ໂດຍໄດ້ຍົກສູງສາຍພົວພັນຣັດເຊຍ-ຈີນຂຶ້ນສູ່ລະດັບໃໝ່, ທັງໄດ້ມອບໝາຍໜ້າທີ່ໃໝ່ໃຫ້ແກ່ພວກຂ້າພະເຈົ້າ.

    ສອງຝ່າຍຍັງໄດ້ແລກປ່ຽນຄໍາເຫັນກ່ຽວກັບບັນຫາສາກົນ ແລະ ພາກພື້ນທີ່ມີຄວາມສົນໃຈຮ່ວມກັນ ເຊັ່ນ: ສະຖານະການຕາເວັນອອກກາງ, ວິກິດການອູແກຣນ, ບັນຫາຢູ່ແຫຼມເກົາຫຼີ ແລະ ອື່ນໆ.