ວັນທີ21ພຶດສະພາ2024 ເປັນວັນຊາສາກົນຄົບຮອບ5ປີ.

ຊາ ມີຕົ້ນກຳເນີດຢູ່ປະເທດຈີນ ແຕ່ໄດ້ຮັບຄວາມນິຍົມໄປທົ່ວໂລກ. ຕຳລາບູຮານຈີນທີ່ມີຊື່ວ່າ “ຕຳລາຊາ”ໄດ້ລະບຸວ່າ: “ຊາກາຍເປັນເຄື່ອງດື່ມໃນຊີວິດປະຈຳວັນຂອງຜູ້ຄົນແມ່ນເລີ່ມມາແຕ່ເສິນໜົງຊື”, ທີ່ນີ້ ເສີນໜົງຊື ເປັນເຈົ້າກົກເຫຼົ່າທີ່ມີຊື່ສຽງໃນສະໄໝດຶກດຳບັນຂອງຈີນທີ່ຫ່າງຈາກປັດຈຸບັນປະມານ5000ປີ, ສາມາດເວົ້າໄດ້ວ່າ: ຊາເປັນຂອງຄູ່ກັນກັບອະລິຍະທຳຈີນທີ່ມີປະຫວັດຄວາມເປັນມາ5.000ປີ.

ໃບຊານ້ອຍໆແມ່ນມີຄວາມສຳຄັນຫຼາຍຢູ່ໃນໃຈຂອງທ່ານສີຈິ້ນຜິງ ປະທານປະເທດຈີນ. ເພິ່ນໃຫ້ຄວາມສຳຄັນຕໍ່ການພັດທະນາທຸລະກິດໃບຊາ, ຊຸກຍູ້ອຸດສາຫະກຳໃບຊາເພື່ອປະກອບສ່ວນເຂົ້າໃນການພັດທະນາຊົນນະບົດໃຫ້ຈະເລີນ. ເພິ່ນເຄີຍຖືຊາເປັນຫົວຂໍ້ໂດຍເນັ້ນໜັກໃຫ້ເສີມຂະຫຍາຍວັດທະນະທຳຈີນທີ່ມູນເຊື້ອອັນດີງາມ ແລະຍັງເຄີຍພົບປະໂອ້ລົມກັບຜູ້ນຳຕ່າງປະເທດດ້ວຍການດື່ມຊາທ່າມກາງບັນຍາກາດມ່ວນຊື່ນສະບາຍໃຈເພື່ອເຊື່ອມສານມິດຕະພາບ.

ມື້ໜຶ່ງຂອງປີ2020,  ຝົນຍາມລະດູໃບໄມ້ປົ່ງຫາກໍເອື້ອນ, ສວນຊາຢູ່ເທິງພູຂອງເຂດນິຄົມສາທິດອຸດສາຫະກຳໃບຊາທັນສະໄໝນວີວ່າເຟີ້ງຫວງເມືອງຜິງລີ້ແຂວງສ້ານຊີ່ແມ່ນຂຽວອຸ່ມທຸ່ມສວຍງາມຫຼາຍ, ທ່ານສີຈິ້ນຜິງທີ່ກຳລັງເຄື່ອນໄຫວຢ້ຽມຢາມແລະເຮັດວຽກຢູ່ແຂວງສ້ານຊີ່ໄດ້ເດີນທາງໄປເຖິງສວນຊາແຫ່ງນີ້. ເພິ່ນໄດ້ຍ່າງໄປຕາມເສັ້ນທາງນ້ອຍທີ່ເປັນດິນຕົມມຸ່ງໜ້າໄປຫາຊາວກະສິກອນທັງຫຼາຍທີ່ກຳລັງເຮັດວຽກຢູ່ໃນສວນຊາ.

ເພິ່ນໄດ້ກວດເບິ່ງສະພາບການເຕີບໃຫຍ່ຂອງຕົ້ນຊາຢ່າງລະອຽດ, ພ້ອມທັງໂອ້ລົມສົນທະນາຢ່າງສະໜິດສະໜົມກັບຊາວສວນຊາທັງຫຼາຍໂດຍໄດ້ສອບຖາມສະພາບການຕ່າງໆເຊັ່ນ: ຜົນຜະລິດ, ລາຄາຂອງໃບຊາ, ການໂອນສິດນຳໃຊ້ທີ່ດິນ, ການປັນຜົນກຳໄລແລະລາຍໄດ້ຈາກການເປັນແຮງງານຮັບຈ້າງແລະອື່ນໆຂອງຊາວບ້ານທັງຫຼາຍ. ເພິ່ນໄດ້ຊີ້ນຳໃຫ້ຊາວບ້ານທັງຫຼາຍວ່າ: “ກ້າວເດີນໄປຕາມເສັ້ນທາງພັດທະນາແບບສີຂຽວ ແລະຖືສິ່ງແວດລ້ອມນິເວດເປັນບຸລິມະສິດຢ່າງເດັດດ່ຽວໜຽວແໜ້ນ, ສ້າງຄວາມຮັ່ງມີດ້ວຍໃບຊາ ແລະພັດທະນາທຸລະກິດໃບຊາ ເພື່ອຫຼຸດພົ້ນອອກຈາກຄວາມທຸກຍາກ ແລ້ວມຸ່ງໜ້າສູ່ຊີວິດການເປັນຢູ່ທີ່ອີ່ມໜຳສຳລານ”.

ໃບຊານ້ອຍໆໄດ້ພິສູດໃຫ້ເຫັນເຖິງຄວາມຫວັງເປັນຢ່າງຍິ່ງຂອງທ່ານສີຈິ້ນຜິງທີ່ມີຕໍ່ການຊຸກຍູ້ການພັດທະນາຊົນນະບົດໃຫ້ຈະເລີນ, ເຊິ່ງສາມາດເຫັນໄດ້ຈາກການລົງເຄື່ອນໄຫວຢ້ຽມຢາມແລະເຮັດວຽກຢູ່ທ້ອງຖິ່ນຕ່າງໆໃນຫຼາຍປີຜ່ານມາ, ຕົວຢ່າງເຊັ່ນ:

ຢູ່ແຂວງເສສວນ, ເພິ່ນໄດ້ກວດເບິ່ງກຳມະວິທີແບບດັ້ງເດີມແຫ່ງການຜະລິດຊາດຳ ພ້ອມທັງໄດ້ສຳຜັດຕົວຈິງກັບຂັ້ນຕອນການຜະລິດຊານ້ຳມັນເບີ, ເພິ່ນໄດ້ຊີ້ນຳວ່າ ການພັດທະນາອຸດສາຫະກຳໃບຊາຕ້ອງສະແຫວງຫາຄວາມຍອດຍິ່ງຢ່າງບໍ່ຢຸດຢັ້ງ, ສ້າງຍີ່ຫໍ້ທີ່ມີຊື່ສຽງ. ໃນເວລາລົງເຄື່ອນໄຫວຢ້ຽມຢາມແຂວງຟູຈ້ຽນ, ເພິ່ນໄດ້ໂອລົມສົນທະນາຢ່າງສະໜິດສະໜົມກັບນັກວິຊາການແລະຊາວສວນຊາທັງຫຼາຍໂດຍປຸກລະດົມຈິດໃຈໃຫ້ເຂົາເຈົ້າວາງແຜນງານການພັດທະນາວັດທະນະທຳດ້ານຊາ, ອຸດສາຫະກຳໃບຊາແລະເຕັກນິກວິທະຍາສາດດ້ານຊາໃຫ້ດີ. ສ່ວນຢູ່ແຂວງໄຫຫຼຳ, ເພິ່ນໄດ້ເຂົ້າຮ່ວມການຂົ້ວຊານຳຊາວບ້ານຢູ່ໂຮງຂົ້ວຊາດ້ວຍມືທີ່ດຳເນີນທຸລະກິດໂດຍຊາວບ້ານ ແລະຍັງໄດ້ຊື້ໃບຊາສອງຖົງ. ເພິ່ນໄດ້ໃຫ້ກຳລັງໃຈແກ່ຊາວບ້ານວ່າ ຈົ່ງເຮັດທຸລະກິດໃບຊາໃຫ້ດີ ເພື່ອສ້າງຊີວິດການເປັນຢູ່ໃຫ້ດີຂຶ້ນກວ່າເກົ່າ.

ວັນທີ22ມີນາ2021 ທ່ານສີຈິ້ນຜິງຢ້ຽມຢາມສວນຊານິເວດຢ້ຽນຈືເຄີ່ຕາແສງຊິ່ງຊຸ່ນເມືອງອູຢີຊ່ານນະຄອນນານຜິງແຂວງຟູຈ້ຽນ

   ໃບຊາຂຽວອ່ອນເປັນພຽງພືດກະສິກຳທຳມະດາຂອງບ້ານພູດອຍນ້ອຍໆເທົ່ານັ້ນ ແຕ່ຢູ່ໃນສາຍຕາຂອງທ່ານສີຈິ້ນຜິງ, ມັນເປັນ “ໃບຊາຄຳ”ທີ່ສາມາດຊ່ວຍປະຊາຊົນຫຼຸດພົ້ນອອກຈາກຄວາມທຸກຍາກໄດ້.

   ປີ2023, ປະລິມານການຜະລິດໃບຊາແຫ້ງຂອງແຂວງຢູນນານບັນລຸເຖິງ557.000 ໂຕນ, ສາມາດສ້າງມູນຄ່າຕ່ອງໂສ້ອຸດສາຫະກຳຄົບວົງຈອນໄດ້ເຖິງ 150,42 ຕື້ຢວນ, ລາຍໄດ້ຈາກອຸດຫາຫະກຳໃບຊາຂອງຊາວສວນຊາສະເລ່ຍຕໍ່ຫົວຄົນບັນລຸເຖິງ 5.530 ຢວນ,  ລາຍໄດ້ຂອງຊາວສວນຊາໄດ້ເພີ່ມຂຶ້ນທຸກປີ. ປີ2023 , ມູນຄ່າສັງລວມຂອງອຸດສາຫະກຳໃບຊາຢູ່ແຂວງກຸ້ຍໂຈ່ວບັນລຸເຖິງ 90 ຕື້812 ລ້ານຢວນ, ສາມາດສ້າງວຽກເຮັດງານທຳໃຫ້ແກ່ປະຊາຊົນໄດ້ເຖິງ3.224.000 ຄົນ, ຊາວກະສິກອນທີ່ມີສ່ວນກ່ຽວຂ້ອງກັບອຸດສາຫະກຳໃບຊາມີລາຍໄດ້ສະເລ່ຍປະມານ 15.337ຢວນຕໍ່ຄົນຕໍ່ປີ. ການພັດທະນາອຸດສາຫະກຳໃບຊາໄດ້ເປັນຕົວຢ່າງທີ່ມີຊີວິດຊີວາທີ່ພິສູດໃຫ້ເຫັນແນວຄິດ “ພູຂຽວນ້ຳໃສກໍແມ່ນພູເງິນພູຄຳ”. ຕົ້ນຊາແຕ່ລະຕົ້ນ, ສວນຊາແຕ່ລະແຫ່ງລ້ວນແຕ່ເປັນສ່ວນປະກອບເຂົ້າໃນການປູເສັ້ນທາງອັນກວ້າງຂວາງສູ່ອະນາຄົດທີ່ສົດໃສແຫ່ງການພັດທະນາຊົນນະບົດໃຫ້ຈະເລີນ.

ວັນທີ24ເມສາ2024 ຊາວບ້ານກຳລັງເກັບຊາຢູ່ສວນຊາສະຫະກອນປູກຊາຈ່ຽງໂຖກົ້ງຕາແສງໂຫຼງຖັງເມືອງເຫລີຍຢາງນະຄອນເຫີງຢາງແຂວງຫູນານ

   ໃບຊານ້ອຍໆບໍ່ພຽງແຕ່ສາມາດຊ່ວຍໃຫ້ປະຊາຊົນຫຼຸດພົ້ນອອກຈາກຄວາມທຸກຍາກ, ພັດທະນາກະສິກຳແລະສ້າງຄວາມຮັ່ງມີໃຫ້ຊາວກະສິກອນເທົ່ານັ້ນ ແລະ ຍັງສ່ອງແສງໃຫ້ເຫັນເຖິງຄວາມອຸດົມສົມບູນແລະປະຫວັດສາດອັນດົນນານຂອງອະລິຍະທຳຈີນອີກດ້ວຍ.

ວັນທີ 21 ພຶດສະພາ2020, ທ່ານສີຈິ້ນຜິງໄດ້ສົ່ງສານຊົມເຊີຍວັນຊາສາກົນຄົບຮອບ1ປີ. ເນື້ອໃນສານຊົມເຊີຍລະບຸວ່າ: ອົງການສະຫະປະຊາຊາດກຳນົດ ວັນຊາສາກົນ ທີ 21 ພຶດສະພາ ໄດ້ສ່ອງແສງໃຫ້ເຫັນວ່າ: ປະຊາຄົມໂລກຍອມຮັບແລະໃຫ້ຄວາມສຳຄັນຕໍ່ຄຸນຄ່າຂອງໃບຊາ, ເຊິ່ງມີຄວາມໝາຍສຳຄັນຫຼາຍຕໍ່ການພັດທະນາອຸດສາຫະກຳໃບຊາແລະເສີມຂະຫຍາຍວັດທະນະທຳດ້ານຊາ.

ເດືອນເມສາປີ2014, ໃນເວລາຢ້ຽມຢາມປະເທດແບນຊິກ, ທ່ານສີຈິ້ນຜິງໄດ້ຍົກເອົາ “ຊາ” ກັບ “ເຫຼົ້າ” ມາປຽບທຽບການໄປມາຫາສູ່ກັນລະຫວ່າງຊາດ: “ຄືດັ່ງຄົນຈີນມັກຊາແຕ່ຄົນແບນຊິກມັກເບຍ, ລັກສະນະຄວາມອ່ອນໂຍນນຸ້ມນວນລໍ້າເລິກຂອງຜູ້ມັກຮັກການດື່ມຊາ ແລະ ລັກສະນະຫ້າວຫັນວ່ອງໄວຂອງຜູ້ມັກຮັກການດື່ມເຫຼົ້າເປັນຕົວແທນແຫ່ງສອງວິທີການທີ່ແຕກຕ່າງກັນຂອງການເຂົ້າໃຈຊີວິດ ແລະ ເຂົ້າໃຈໂລກ. ແຕ່ວ່າ ຊາ ກັບເຫຼົ້າ ບໍ່ແມ່ນວ່າຈະບໍ່ສາມາດເຊື່ອມໂຍງເຂົ້າກັນໄດ້, ຄົນເຮົາບໍ່ພຽງແຕ່ສາມາດດື່ມເຫຼົ້າກັບເພື່ອນມິດຢ່າງສຸດໃຈເທົ່ານັ້ນ ຍັງສາມາດດື່ມຊາກັບເພື່ອນມິດທັງສຳນຶກຮູ້ຊີວິດໄປພ້ອມ ”

ທ່ານສີຈິ້ນຜິງຊີ້ໃຫ້ເຫັນວ່າ:  ຈີນມີຈຸດຢືນທີ່ວ່າ  “ກົມກຽວແຕ່ມີຄວາມແຕກຕ່າງກັນ” ສ່ວນສະຫະພາບເອີຣົບແມ່ນເນັ້ນໜັກວ່າ “ຫຼາຍເຄົ້າແລະເຊື່ອມໂຍງເຂົ້າກັນ”. “ຈີນ-ເອີຣົບຄວນພະຍາຍາມຮ່ວມກັນເພື່ອສົ່ງເສີມໃຫ້ມາລາແຫ່ງອະລິຍະທຳຕ່າງໆຂອງມວນມະນຸດແຂ່ງຂັນກັນເບັ່ງບານເຮືອງເຮື່ອ.”

ທ່ານສີຈິ້ນຜິງໄດ້ບັນຍາຍຈຸດຢືນຂອງຈີນດ້ວຍວັດທະນະທຳດ້ານຊາ, ປຽບເໝືອນນຳເອົາ “ກິ່ນຫອມຂອງຊາຈີນ”ທີ່ຫອມຫວນຊື່ນໃຈໄປສູ່ໂລກ.