ວັນທີ22ພຶດສະພານີ້, ທ່ານຈ່າງກົວຊີ່ງ ກຳມະການກົມການເມືອງສູນກາງພັກຄອມມູນິດຈີນ, ຮອງນາຍົກລັດຖະມົນຕີ, ຜູ້ຕາງໜ້າພິເສດຂອງທ່ານສີຈິ້ນຜິງ ປະທານປະເທດຈີນໄດ້ເຂົ້າຮ່ວມພິທີໄວ້ອາໄລທ່ານອິບຣາຮິມ ໄຣຊີ ປະທານາທິບໍດີອີຣານທີ່ເສຍຊີວິດຈາກອຸບັດເຫດເຮຣິກອບແຕຕົກທີ່ຈັດຂຶ້ນຢູ່ນະຄອນຫຼວງເຕຮາລານ, ພ້ອມທັງໄດ້ພົບປະກັບທ່ານໂມຮາມັດ ມອກເບີ ຮັກສາການປະທານາທິບໍດີອີຣານ.

   ທ່ານຈ່າງກົວຊີ່ງກ່າວວ່າ: ຂ້າພະເຈົ້າຂໍຕາງໜ້າທ່ານປະທານສີຈິ້ນຜິງສະແດງຄວາມເສົ້າສະຫຼົດໃຈແລະໄວ້ອາໄລຢ່າງສຸດຊຶ້ງຕໍ່ການເສຍຊີວິດຂອງທ່ານອິບຣາຮິມ ໄຣຊີ ປະທານາທິບໍດີອີຣານຈາກອຸບັດເຫດເຮຣິກອບແຕຕົກ, ສະແດງຄວາມເຫັນໃຈຢ່າງຈິງໃຈຕໍ່ລັດຖະບານແລະປະຊາຊົນອີຣານ ພ້ອມດ້ວຍຍາດພີ່ນ້ອງຂອງທ່ານໄຣຊີ. ໃນຍາມລຳບາກຄືແນວນີ້, ປະຊາຊົນຈີນຈະຢືນຢູ່ຄຽງຂ້າງປະຊາຊົນອີຣານຢ່າງເດັດດ່ຽວ.

   ທ່ານມອກເບີໄດ້ສະແດງຄວາມຂອບໃຈຕໍ່ທ່ານປະທານສີຈິ້ນຜິງທີ່ມອບໝາຍໃຫ້ທ່ານຈ່າງກົວຊີ່ງ ຮອງນາຍົກລັດຖະມົນຕີເປັນຜູ້ຕາງໜ້າພິເສດເດີນທາງມາເຂົ້າຮ່ວມພິທີໄວ້ອາໄລ, ທ່ານກ່າວວ່າ: ອີຣານຈະປະຕິບັດຄືໄລຍະຜ່ານມາໃນການຂະຫຍາຍສາຍພົວພັນກັບຈີນ, ຍິນດີຮ່ວມກັບຈີນພ້ອມກັນທຳຄວາມພະຍາຍາມລົງເລິກການຮ່ວມມືລະຫວ່າງສອງປະເທດໃນຂົງເຂດຕ່າງໆ, ຊຸກຍູ້ໃຫ້ການພົວພັນຄູ່ຮ່ວມຍຸດທະສາດຮອບດ້ານລະຫວ່າງອີຣານກັບຈີນຂຶ້ນສູ່ລະດັບໃໝ່.