ຕອນບ່າຍວັນທີ 26 ພຶດສະພານີ້, ທ່ານຫຼີຊຽງ ນາຍົກລັດຖະມົນຕີຈີນໄດ້ພົບປະກັບທ່ານຢຸນຊົກເຢວ ປະທານາທິບໍດີ ສ.ເກົາຫຼີ ໃນໄລຍະເຂົ້າຮ່ວມກອງປະຊຸມສຸດຍອດຈີນ, ຍີ່ປຸ່ນ ແລະ ສ.ເກົາຫຼີຢູ່ນະຄອນຫຼວງເຊອຸນຂອງ ສ.ເກົາຫຼີ.

ທ່ານຫຼີຊຽງກ່າວວ່າ: ນັບແຕ່ຈີນ ແລະ ສ.ເກົາຫຼີສ້າງຕັ້ງສາຍພົວພັນທາງການທູດເປັນເວລາ 30 ກວ່າປີມານີ້, ການພົວພັນລະຫວ່າງສອງປະເທດໄດ້ຂະຫຍາຍຕົວຢ່າງວ່ອງໄວ, ການຮ່ວມມືດ້ານເສດຖະກິດການຄ້າລະຫວ່າງສອງປະເທດໄດ້ປະສົບຜົນສຳເລັດຢ່າງໃຫຍ່ຫຼວງ ເຊິ່ງໄດ້ນຳເອົາຜົນປະໂຫຍດຕົວຈິງມາໃຫ້ແກ່ປະຊາຊົນສອງຊາດ. ສອງຝ່າຍໄດ້ຍຶດໝັ້ນເຄົາລົບເຊິ່ງກັນແລະກັນ, ມີຄວາມເປີດກວ້າງ ແລະ ກວມລວມ ແລະ ຮ່ວມມືກັນແບບຕ່າງຝ່າຍຕ່າງໄດ້ຮັບຜົນປະໂຫຍດ, ບົດຮຽນອັນລ້ຳຄ່າເຫຼົ່ານີ້ ເປັນຕາໃຫ້ສອງຝ່າຍທະນຸຖະໜອມ ແລະ ຍຶດໝັ້ນເປັນໄລຍະຍາວນານ. ຕ່ອງໂສ້ອຸດສາຫະກຳ ແລະ ຕ່ອງໂສ້ການສະໜອງຂອງຈີນ ແລະ ສ.ເກົາຫຼີໄດ້ເຊື່ອມຈອດກັນຢ່າງເລິກເຊິ່ງ, ການຮ່ວມມືດ້ານເສດຖະກິດການຄ້າມີພື້ນຖານທີ່ໜັກແໜ້ນ ແລະ ມີຄວາມສາມາດບົ່ມຊ້ອນອັນໃຫຍ່ຫຼວງ. ສອງຝ່າຍຄວນຮ່ວມກັນເປີດກວ້າງຂົງເຂດໃໝ່, ເປີດກວ້າງພື້ນທີ່ການຮ່ວມມື, ຮ່ວມກັນກຳໂອກາດການພັດທະນາໃຫ້ໄດ້ຫຼາຍກວ່າເກົ່າ, ຕໍ່ຕ້ານການຫັນບັນຫາເສດຖະກິດການຄ້າເປັນບັນຫາການເມືອງ ແລະ ບັນຫາຄວາມໝັ້ນຄົງ ເພື່ອຮັບປະກັນໃຫ້ຕ່ອງໂສ້ອຸດສາຫະກຳ ແລະ ຕ່ອງໂສ້ການສະໜອງຂອງສອງປະເທດ ແລະ ທົ່ວໂລກມີຄວາມໝັ້ນທ່ຽງ ແລະ ລຸລ່ວງດີ.

ທ່ານຢຸນຊົກເຢວກ່າວວ່າ: ສ.ເກົາຫຼີ ແລະ ຈີນຮັກສາການຮ່ວມມືຢ່າງແໜ້ນແຟ້ນ ບໍ່ພຽງແຕ່ມີຄວາມໝາຍສຳຄັນຕໍ່ການຊຸກຍູ້ການພົວພັນລະຫວ່າງສອງປະເທດເທົ່ານັ້ນ, ຫາກຍັງມີຄວາມໝາຍສຳຄັນຕໍ່ສັນຕິພາບ ແລະ ຄວາມຈະເລີນຮຸ່ງເຮືອງຂອງໂລກອີກດ້ວຍ. ສ.ເກົາຫຼີຍຶດໝັ້ນຫຼັກການປະເທດຈີນດຽວ, ຍິນດີຮັກສາການໄປມາຫາສູ່ລະຫວ່າງການນຳຂັ້ນສູງ ແລະ ທຸກຂັ້ນກັບຈີນຢ່າງແໜ້ນແຟ້ນ ບົນພື້ນຖານເຄົາລົບເຊິ່ງກັນແລະກັນ, ເປີດກວ້າງການຮ່ວມມືດ້ານເສດຖະກິດການຄ້າ, ເພີ່ມທະວີການໄປມາຫາສູ່ກັນດ້ານວັດທະນະທຳ, ເປີດກວ້າງຜົນປະໂຫຍດຮ່ວມຂອງສອງປະເທດ, ລົງເລິກການຮ່ວມມືລະຫວ່າງ ສ.ເກົາຫຼີ, ຈີນ ແລະ ຍີ່ປຸ່ນ ແລະ ຊຸກຍູ້ໃຫ້ການພົວພັນສ.ເກົາຫຼີກັບຈີນຂະຫຍາຍຕົວຕື່ມອີກ.