ວັນທີ 29 ພຶດສະພານີ້, ສຳນັກງານຂອງຈີນປະຈຳອົງການສະຫະປະຊາຊາດ ແລະ ອົງການຈັດຕັ້ງສາກົນອື່ນໆທີ່ນະຄອນເຊີແນວຂອງສະວິສລາຍງານໃຫ້ຮູ້ວ່າ: ຄະນະຜູ້ຕາງໜ້າຖາວອນຂອງຈີນໄດ້ໃຫ້ຄຳເຫັນໃນເວລາປະຕິບັດສິດອະພິປາຍ ໂດຍແນໃສ່ບາງປະເທດທີ່ກ່າວຖ້ອຍຄຳຜິດພາດໃນການອະພິປາຍທົ່ວໄປຢູ່ ກອງປະຊຸມໃຫຍ່ອົງການອະນາໄມໂລກຄັ້ງທີ 77.

ຜູ້ຕາງໜ້າຖາວອນຂອງຈີນກ່າວວ່າ: ບາງປະເທດໄດ້ກ່າວຖ້ອຍຄຳທີ່ໄຮ້ຄວາມຮັບຜິດຊອບໃນການອະພິປາຍທົ່ວໄປຢູ່ກອງປະຊຸມຄັ້ງນີ້ ເຊິ່ງເປັນການລ່ວງລ້ຳອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຈີນຢ່າງຮ້າຍແຮງ. ຈີນສະແດງການປະທ້ວງຢ່າງເຄັ່ງຂຶມ ແລະ ຄັດຄ້ານຢ່າງເດັດດ່ຽວຕໍ່ກັບເລື່ອງນີ້.

ຝ່າຍຈີນຊີ້ອອກວ່າ: ວັນທີ 27 ພຶດສະພານີ້, ກອງປະຊຸມໃຫຍ່ອົງການອະນາໄມໂລກໄດ້ຜ່ານຂໍ້ຕົກລົງວ່າດ້ວຍການປະຕິເສດຮ່າງມະຕິທີ່ພົວພັນກັບໄຕ້ຫວັນ. ຈີນຫວັງວ່າບາງປະເທດດັ່ງກ່າວຈະປະເຊີນໜ້າ ແລະ ຍອມຮັບຄວາມເປັນຈິງນີ້. ຂໍ້ຕົກລົງດັ່ງກ່າວໄດ້ສະແດງໃຫ້ເຫັນວ່າ: ຫຼັກການປະເທດຈີນດຽວໄດ້ຮັບການສະໜັບສະໜູນຢ່າງເດັດດ່ຽວຈາກປະເທດສ່ວນໃຫຍ່ທີ່ຍຶດຖືຄວາມຍຸຕິທຳຢູ່ໃນໂລກ, ທຸກໆກົນອຸບາຍທີ່ລະເມີດ ແລະ ທ້າທາຍຫຼັກການດັ່ງກ່າວຈະປະສົບຄວາມຫຼົ້ມແຫຼວຢ່າງແນ່ນອນໃນທີ່ສຸດ.