ການແຂ່ງຂັນບານບ້ວງ “ບ້ານBA” ສາມັກຄີຊົນເຜົ່າທົ່ວປະເທດຈີນຈະຈັດຂຶ້ນໃນໄວໆນີ້

2024-06-03 12:18:36 cri

ພາຍຫຼັງຈັດການແຂ່ງຂັນບານບ້ວງຊົນນະບົດສວຍງາມກົມກຽວທົ່ວປະເທດຈີນ(ຫຼື ບ້ານBA) ໃນປີ2023ຜ່ານມາແລ້ວ, ເມືອງຖາຍຈ່ຽງກິ່ງແຂວງປົກຄອງຕົນເອງເຜົ່າມົ້ງເຜົ່າຕົ້ງສຽນຕົ່ງນານແຂວງກຸ້ຍໂຈ່ວຈີນຈະຈັດການແຂ່ງຂັນລະດັບຊາດອີກຄັ້ງໜຶ່ງໃນວັນທີ9ມິຖຸນານີ້ຄື ການແຂ່ງຂັນບານບ້ວງ “ບ້ານBA” ສາມັກຄີຊົນເຜົ່າທົ່ວປະເທດຈີນ.

ຕາມແຫຼງຂ່າວໃຫ້ຮູ້ວ່າ: ການແຂ່ງຂັນບານບ້ວງ “ບ້ານBA” ສາມັກຄີຊົນເຜົ່າທົ່ວປະເທດຈີນ ເປັນໜຶ່ງໃນກິດຈະກຳຕ່າງໆພາຍໃຕ້ຫົວຂໍ້ “ຮ່ວມກັນຊື່ນໃຈ” ຂອງງານມະຫາກຳກິລາດັ້ງເດີມຊົນເຜົ່າສ່ວນໜ້ອຍທົ່ວປະເທດຈີນຄັ້ງທີ20ໂດຍມີຄະນະກຳມະການວຽກງານຊົນເຜົ່າແຫ່ງຊາດຈີນແລະອົງການກິລາແຫ່ງຊາດຈີນເປັນເຈົ້າພາບ. ໃນດ້ານນັກກິລາເຂົ້າຮ່ວມການແຂ່ງຂັນ, ການແຂ່ງຂັນຄັ້ງນີ້ຍັງສືບຕໍ່ປະຕິບັດຕາມຫຼັກການທີ່ຖືປະຊາຊົນເຂດຊົນນະບົດເປັນຫຼັກ, ຜູ້ເຂົ້າຮ່ວມການແຂ່ງຂັນມີອາຍຸລະຫວ່າງ18-50ປີ, ຕ້ອງມີສຳມາໂນຄົວຢູ່ໃນເມືອງດຽວກັນ ແລະເວລາຈົດທະບຽນສຳມະໂນຄົວຕ້ອງຄົບ3ປີ, ສ່ວນນັກກິລາທີ່ຍັງຫຼິ້ນຢູ່ແລະນັກກິລາທີ່ເຊົາຫຼິ້ນແລ້ວທີ່ໄດ້ຈົດທະບຽນໃນສະຫະພັນບານບ້ວງຈີນຫຼືCBA ແລະລີກບານບ້ວງແຫ່ງຊາດຈີນຫຼືNBL ແມ່ນບໍ່ໃຫ້ສະໝັກຊື່ເຂົ້າຮ່ວມການແຂ່ງຂັນ.