ເມື່ອບໍ່ດົນມານີ້, ເຈົ້າຄອງນະຄອນແດກູຂອງສ.ເກົາຫຼີໄດ້ພົບປະກັບທ່ານສີງໄຫໝີງ ເອກອັກຄະລັດຖະທູດຈີນປະຈຳ ສ.ເກົາຫຼີ ໂດຍກ່າວວ່າ: ກ່ອນໜ້ານີ້ບໍ່ດົນ, ນະຄອນແດກູໄດ້ເລີ່ມລົງມືກໍ່ສ້າງສວນສາທາລະນະແດກູ, ຊາວເມືອງແດກູມີຄວາມຄອງຄອຍເປັນຢ່າງຍິ່ງຕໍ່ໝີແພນດາ ແລະ ຫວັງວ່າຈີນຈະມອບໝີແພນດາໃຫ້ນະຄອນແດກູ. ເລື່ອງນີ້ໄດ້ຂຶ້ນຄຳຄົ້ນຫາອັນດັບໜຶ່ງໃນສື່ສັງຄົມອອນລາຍ.

ນອກນີ້, ເມື່ອບໍ່ດົນມານີ້, ທ່ານເຊ້ເຟີ່ງ, ເອກອັກຄະລັດຖະທູດຈີນປະຈຳອາເມຣິກາໄດ້ກ່າວຄຳປາໄສໃນກອງປະຊຸມຖະແຫຼງຂ່າວກ່ຽວກັບສວນສັດແຫ່ງຊາດວໍຊີງຕັນອາເມຣິກາໄດ້ປະກາດການຮ່ວມມືສາກົນອີກຮອບໃໝ່ໃນດ້ານການອະນຸລັກ ແລະ ການຄົ້ນຄວ້າໝີແພນດາ ໂດຍກ່າວວ່າ: ໝີແພນດາທີ່ຊື່ວ່າ “ປາວລີ້” ແລະ “ຊີ່ງປາວ” ທີ່ເປັນທູດໃໝ່ເພື່ອເສີມສ້າງມິດຕະພາບຂອງປະຊາຊົນຈີນ-ອາເມຣິກາ ຈະບິນຂ້າມມະຫາສະໝຸດປາຊີຟິກ ແລະ ເຂົ້າເປັນສະມາຊິກຂອງສວນສັດແຫ່ງຊາດວໍຊີງຕັນອາເມຣິກາ.

ໝີແພນດາເປັນຊັບສົມບັດອັນລ້ຳຄ່າຂອງຈີນ ທັງເປັນສັດທີ່ໄດ້ຮັບຄວາມນິຍົມຫຼາຍທີ່ສຸດຈາກປະຊາຊົນໃນທົ່ວໂລກ ແລະ ເຄີຍຖືກຈັດເຂົ້າໃນສັດທີ່ປະເຊີນກັບຄວາມສ່ຽງທີ່ຈະສູນພັນ. ແຕ່ພາຍຫຼັງທ່ານສີຈິ້ນຜິງ ປະທານປະເທດຈີນໄດ້ສະເໜີແນວຄິດ “ພູຂຽວນ້ຳໃສກໍແມ່ນພູເງິນພູຄຳ”, ຈີນໄດ້ຍົກລະດັບການອະນຸລັກຊີວະນານາພັນເປັນຍຸດທະສາດແຫ່ງຊາດ. ຈີນໄດ້ສ້າງສວນອຸທິຍານແຫ່ງຊາດໝີແພນດາທີ່ມີເນື້ອທີ່ 22.000 ກວ່າກິໂລຕາແມັດ ເພື່ອອະນຸລັກໝີແພນດາ. ມາຮອດປັດຈຸບັນ, ໝີແພນດາປ່າຢູ່ຈີນໄດ້ເພີ່ມຂຶ້ນຮອດ 1.900 ໂຕ, ລະດັບຄວາມສ່ຽງດ້ານການສູນພັນກໍໄດ້ຫຼຸດລົງຈາກ “ໃກ້ຈະສູນພັນ” ເປັນ “ສ່ຽງຈະສູນພັນ”. ເວັບໄຊ cctv.com ໄດ້ສ້າງຊ່ອງລາຍການໝີແພນດາສຳລັບຊາວເນັດທົ່ວໂລກ ໂດຍສາມາດເບິ່ງການໄລສົດຂອງການກິນ ແລະ ການນອນຂອງໝີແພນດາຕະຫຼອດ 24 ຊົ່ວໂມງ, ມີແຟນລາຍການຕິດຕາມໃນທົ່ວໂລກເຖິງ  55.000.000 ຄົນ.

ພ້ອມກັນນັ້ນ, ຈີນໄດ້ດຳເນີນການຮ່ວມມືດ້ານການອະນຸລັກໝີແພນດາກັບ 20 ປະເທດເຊັ່ນ: ອາເມຣິກາ, ຍີ່ປຸ່ນ, ສ.ເກົາຫຼີເປັນຕົ້ນຕາມລຳດັບ. ອາເມຣິກາເປັນໜຶ່ງໃນບັນດາປະເທດທີ່ໄດ້ດຳເນີນການຮ່ວມມືດ້ານການອະນຸລັກໝີແພນດາກັບຈີນກ່ອນໝູ່, ການຮ່ວມມືຈີນ-ອາເມຣິກາດ້ານການອະນຸລັກໝີແພນດາແມ່ນມີຂຶ້ນກ່ອນການສ້າງຕັ້ງການພົວພັນທາງການທູດລະຫວ່າງສອງປະເທດ. ໃນ 50 ກວ່າປີຜ່ານມາ, ໝີແພນດາກໍໄດ້ຮັບຄວາມນິຍົມຫຼາຍຢູ່ອາເມຣິກາ. ຍີ່ປຸ່ນກໍເປັນໜຶ່ງໃນບັນດາປະເທດທີ່ນິຍົມຊົມຊອບໝີແພນດາທີ່ສຸດ, ຍີ່ປຸ່ນໄດ້ຖືໝີແພນດາເປັນສັນຍາລັກຂອງມິດຕະພາບຈີນ-ຍີ່ປຸ່ນ, ໝີແພນດາກໍໄດ້ເຊື່ອມໂຍງເຂົ້າໃນຊີວິດປະຈຳວັນຂອງປະຊາຊົນຍີ່ປຸ່ນ. ພາຍຫຼັງໄດ້ເຊົ່າໝີແພນດາຈາກຈີນອີກຄັ້ງໜຶ່ງໃນປີ 2016, ສ.ເກົາຫຼີໄດ້ຈ້າງຊ່າງອອກແບບທີ່ມີຊື່ສຽງໃນສາກົນ ເພື່ອອອກແບບຫໍໝີແພນດາທີ່ລອກແບບສິ່ງແວດລ້ອມທຳມະຊາດຂອງແຂວງເສສວນຂອງຈີນຢ່າງລະອຽດປານີດ, ພ້ອມທັງສ້າງລະບົບລຽນຄີວເຂົ້າຊົມແບບອັດຕະໂນມັດ ເພື່ອສ້າງຄວາມສະດວກໃຫ້ແກ່ການເຂົ້າຊົມຂອງປະຊາຊົນ. ສາມາດເວົ້າໄດ້ວ່າ, ໝີແພນດາໄດ້ເສີມຂະຫຍາຍບົດບາດອັນສຳຄັນໃນການຊຸກຍູ້ການໄປມາຫາສູ່ກັນລະຫວ່າງຈີນກັບປະເທດອື່ນໆ.

ຈີນມີສຸພາສິດທີ່ວ່າ: “ພີ່ນ້ອງທີ່ຢູ່ໄກບໍ່ທໍ່ຄົນບ້ານໃກ້ເຮືອນຄຽງ”. ໃນຮອບ 30 ກວ່າປີພາຍຫຼັງຈີນ ແລະ ສ.ເກົາຫຼີສ້າງຕັ້ງສາຍພົວພັນທາງການທູດເປັນຕົ້ນມາ, ການພົວພັນລະຫວ່າງສອງປະເທດໄດ້ຮັບການພັດທະນາຢ່າງວ່ອງໄວ ແລະ ຮອບດ້ານ ເຊິ່ງໄດ້ນຳເອົາຄວາມຜາສຸກຢ່າງຫຼວງຫຼາຍມາໃຫ້ແກ່ປະຊາຊົນສອງປະເທດ. ສ່ວນ ສ.ເກົາຫຼີກໍໄດ້ເປິກສາຫາລືກັບຈີນເພື່ອໃຫ້ໝີແພນດາຈີນມາເຂົ້າເປັນສະມາຊິກຂອງສວນສັດແດກູໃນເທື່ອນີ້ ກໍສະແດງໃຫ້ເຫັນຢ່າງເຕັມທີ່ວ່າ: ການພັດທະນາການຮ່ວມມືບົນຈິດໃຈໄມຕີຈິດມິຕະພາບລະຫວ່າງສອງປະເທດເປັນທ່ວງທ່າໃຫຍ່ ແລະ ເປັນທີ່ໃຈສະແຫວງຫາຂອງປະຊາຊົນ. ສ່ວນໝີແພນດາ “ປາວລີ້” ແລະ “ຊີ່ງປາວ” ທີ່ຈະເດີນທາງໄປອາເມຣິກາໃນໄວໆນີ້ ກໍໄດ້ຮັບຄວາມຄອງຄອຍຫຼາຍສົມຄວນ ເຊິ່ງເປັນຄືດັ່ງຄວາມເຫັນຂອງທ່ານເຊ້ເຟີ່ງ ເອກອັກຄະລັດຖະທູດຈີນປະຈຳອາເມຣິກາທີ່ວ່າ: ການພົວພັນລະຫວ່າງຈີນ-ອາເມຣິກາທີ່ໝັ້ນທ່ຽງ, ປອດໃສ ແລະ ແບບຍືນຍົງນັ້ນ ເປັນອະນາຄົດອັນດີງາມຂອງຮຸ່ນລູກຮຸ່ນຫຼານ. ຫວັງວ່າພວກເຮົາຈະເອົາໃຈໃສ່ການພົວພັນລະຫວ່າງຈີນ-ອາເມຣິກາຄືກັນກັບການເອົາໃຈໃສ່ໝີແພນດາ, ທຳຄວາມພະຍາຍາມຮ່ວມກັນເພື່ອສ້າງອະນາຄົດທີ່ມີສັນຕິພາບ ແລະ ຄວາມຈະເລີນຮຸ່ງເຮືອງ.