ວັນທີ4ມິຖຸນານີ້, ທ່ານສີຈິ້ນຜິງ ປະທານປະເທດຈີນໄດ້ສົ່ງໂທລະເລກເຖິງທ່ານນາງ ຄລາວເດຍ ຊີນບອມ ປາຣໂດ   ເພື່ອຊົມເຊີຍທ່ານນາງໄດ້ຮັບເລືອກຕັ້ງເປັນປະທານາທິບໍດີສະຫະລັດເມັກຊິກ.

   ເນື້ອໃນໂທລະເລກຊົມເຊີຍຂອງທ່ານສີຈິ້ນຜິງໄດ້ລະບຸວ່າ: ເມັກຊິກເປັນປະເທດໃຫຍ່ຢູ່ພາກພື້ນອາເມຣິກາລາຕິນແລະ ປະເທດທີ່ເປັນຕະຫຼາດຈະເລີນໃໝ່ອັນສຳຄັນ. ຈີນແລະເມັກຊິກເປັນຄູ່ຮ່ວມຍຸດທະສາດຮອບດ້ານ. ປັດຈຸບັນ, ສາຍພົວພັນຈີນ-ເມັກຊິກໄດ້ຮັກສາທ່ວງທ່າຂະຫຍາຍຕົວເປັນຢ່າງດີ, ແລະສາຍພົວພັນລະຫວ່າງສອງປະເທດໄດ້ປາກົດໃຫ້ເຫັນລັກສະນະຍຸດທະສາດ, ລັກສະນະຊ່ວຍຊູຍູ້ໜູນກັນແລະລັກສະນະຕ່າງຝ່າຍຕ່າງໄດ້ຮັບຜົນປະໂຫຍດຢ່າງບໍ່ຢຸດຢັ້ງ, ເຊິ່ງພວມຢູ່ໃນໄລຍະສຳຄັນທີ່ສືບທອດມູນເຊື້ອຈາກຍຸກກ່ອນ ແລະ ເປີດຍຸກໃໝ່. ຂ້າພະເຈົ້າໃຫ້ຄວາມສຳຄັນເປັນຢ່າງສູງຕໍ່ການຂະຫຍາຍສາຍພົວພັນຈີນ-ເມັກຊິກ, ຍິນດີຮ່ວມກັບທ່ານປະທານາທິບໍດີ ຊີນບອມເພີ່ມທະວີການແລກປ່ຽນຄວາມເຫັນທາງຍຸດທະສາດ, ນຳພາສາຍພົວພັນລະຫວ່າງສອງປະເທດໃຫ້ຂະຫຍາຍຕົວຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ ເພື່ອສ້າງຄວາມຜາສຸກໃຫ້ແກ່ປະຊາຊົນສອງຊາດໃຫ້ດີກວ່າເກົ່າ.