ວັນທີ 8 ມິຖຸນານີ້, ຜູ້ປະທ້ວງຈາກທ້ອງຖິ່ນຕ່າງໆຂອງອາເມຣິກາຫຼາຍພັນຄົນໄດ້ໂຮມຊຸມນຸມຢູ່ນອກທຳທຽບຂາວທີ່ນະຄອນຫຼວງວໍຊິງຕັນຂອງອາເມຣິກາ, ພວກເຂົາເຈົ້າໄດ້ນຸ່ງຊຸດສີແດງ, ຖືປ້າຍຄຳຂວັນສີແດງ ແລະ ຮ້ອງຄຳຂວັນວ່າ “ພວກເຮົາກໍແມ່ນເສັ້ນແດງ” ເພື່ອສະແດງຄວາມປະທ້ວງຕໍ່ທ່ານໂຈ ໄບເດັນ ປະທານາທິບໍດີອາເມຣິກາ ທີ່ປ່ອຍປະລະເລີຍຕໍ່ອິດສະຣາແອນດຳເນີນການເຄື່ອນໄຫວທາງທະຫານຢູ່ເຂດກາຊາ ແລະ ເຮັດໃຫ້ມີຜູ້ເສຍຊີວິດ ແລະ ບາດເຈັບຢ່າງຫຼວງຫຼາຍ ເຊິ່ງໄດ້ຢຽບ “ເສັ້ນແດງ” ຂອງທ່ານໂຈ ໄບເດັນເລື້ອຍໆ.

ເມື່ອຕົ້ນເດືອນມີນາປີນີ້, ທ່ານໂຈ ໄບເດັນເຄີຍກ່າວຢ່າງເປີດເຜີຍວ່າ: ຖ້າກອງທັບອິດສະຣາແອນບຸກໂຈມຕີເມືອງຣາຟາ ທາງພາກໃຕ້ເຂດກາຊາ ກໍຈະເປັນການກະທຳທີ່ຢຽບ “ເສັ້ນແດງ”. ນັບແຕ່ຕົ້ນເດືອນພຶດສະພາປີນີ້ເປັນຕົ້ນມາ, ອິດສະຣາແອນບໍ່ເອົາຫົວຊາຕໍ່ຄຳຕັກເຕືອນຫຼາຍເທື່ອຈາກປະຊາຄົມໂລກ, ໄດ້ຊຸກຍູ້ການເຄື່ອນໄຫວທາງທະຫານພາກພື້ນດິນຕໍ່ເມືອງຣາຟາຢ່າງຕໍ່ເນື່ອງ, ສົ່ງຜົນເຮັດໃຫ້ມີຄົນເສຍຊີວິດແລະບາດເຈັບເປັນຈຳນວນຫຼວງຫຼາຍ. ໂດຍປະເຊີນໜ້າກັບໄພພິບັດດ້ານມະນຸດສະທຳທີ່ນັບມື້ນັບຮ້າຍແຮງຂຶ້ນຢູ່ເມືອງຣາຟາ ກໍຄືທົ່ວເຂດກາຊາ, ອາເມຣິກາກໍຍັງຍຶດໝັ້ນວ່າ: ກອງທັບອິດສະຣາແອນບໍ່ໄດ້ຢຽບ “ເສັ້ນແດງ” ແລະ ໃຫ້ການຊ່ວຍເຫຼືອທາງທະຫານແກ່ອິດສະຣາແອນຄືເກົ່າ.