ວັນທີ 18 ມິຖຸນານີ້, ທ່ານ ສີຈິ້ນຜິງ ເລຂາທິການໃຫຍ່ຄະນະກໍາມະການສູນກາງພັກກອມມູນິດຈີນໄດ້ລົງຢ້ຽມຢາມ ແລະ ເຮັດວຽກຢູ່ແຂວງຊິງໄຫຈີນ. ຕອນບ່າຍມື້ດຽວກັນ, ທ່ານ ສີຈິ້ນຜິງ ໄດ້ໄປຢ້ຽມຢາມໂຮງຮຽນມັດທະຍົມຊົນເຜົ່າໂກໂລ້ຊີໜິງ ແລະ ໄດ້ກວດກາເບິ່ງເງື່ອນໄຂການຮັບປະທານອາຫານຂອງນັກຮຽນຢູ່ໂຮງອາຫານຂອງໂຮງຮຽນດ່ັງກ່າວ, ໃນໂອກາດນີ້, ທ່ານ ສີຈິ້ນຜິງ ໄດ້ຊີ້ນໍາໃຫ້ພະນັກງານໂຮງອາຫານຕ້ອງຮັບປະກັນຄວາມປອດໄພດ້ານອາຫານການກິນ ແລະ ຮັບປະກັນໃຫ້ນັກຮຽນສາມາດກິນອາຫານທັງແຊບທັງມີໂພຊະນາການ.

   ບັນຫາດ້ານສຸຂະພາບຂອງເດັກນ້ອຍເປັນ “ເລື່ອງເລັກນ້ອຍແຕ່ສໍາຄັນ” ທີ່ທ່ານ ສີຈິ້ນຜິງ ເປັນຫ່ວງເປັນໃຍມາໂດຍຕະຫຼອດ.

    ທ່ານ ສີຈິ້ນຜິງ ເຄີຍກ່າວວ່າ: “ຕ້ອງຈັດຕັ້ງປະຕິບັດການເຄື່ອນໄຫວ ຄາບອາຫານໂພຊະນາການ ຫຼື ເຄື່ອງກິນດື່ມທີ່ມີໂພຊະນາການໃຫ້ແກ່ນັກຮຽນຢູ່ເຂດທຸກຍາກຢ່າງມີຈຸດສຸມເພື່ອຮັບປະກັນການເຕີບໃຫຍ່ດ້ານຮ່າງກາຍຂອງເຂົາເຈົ້າ.” ໃນເວລາທີ່ທ່ານ ສີຈິ້ນຜິງ ລົງຢ້ຽມຢາມ ແລະ ເຮັດວຽກຢູ່ທ້ອງຖິ່ນຕ່າງໆ, ເພິ່ນເຄີຍເຂົ້າໄປໂຮງອາຫານຂອງໂຮງຮຽນປະຖົມ ແລະ ມັດທະຍົມຕ່າງໆຫຼາຍຄັ້ງເພື່ອຮັບຮູ້ສະພາບການທີ່ກ່ຽວຂ້ອງ. ການຮັບປະກັນໃຫ້ເດັກນ້ອຍ-ເຍົາວະຊົນທຸກຄົນສາມາດເຕີບໃຫຍ່ຂຶ້ນຢ່າງແຂງແຮງນັ້ນ, ເປັນຄວາມຫ່ວງໃຍຂອງທ່ານສີຈິ້ນຜິງ, ເພິ່ນກ່າວເນັ້ນໜັກວ່າ: “ພວກເຮົາຕ້ອງຍຶດໝັ້ນຖືເອົາເລື່ອງເລັກນ້ອຍຂອງປະຊາຊົນໃຫ້ກາຍເປັນເລື່ອງສໍາຄັນຂອງຕົນເອງ.”