ໃນລະຫວ່າງວັນທີ 15 ຫາ 18 ມິຖຸນານີ້, ທ່ານຫຼີສຽງ ນາຍົກລັດຖະມົນຕີຈີນໄດ້ເດີນທາງໄປຢ້ຽມຢາມອົດສະຕຣາລີຢ່າງເປັນທາງການ. ສອງປະເທດໄດ້ອອກຖະແຫຼງການຮ່ວມວ່າດ້ວຍຜົນສຳເລັດແຫ່ງການພົບປະປະຈຳປີລະຫວ່າງນາຍົກລັດຖະມົນຕີຈີນ ແລະ ນາຍົກລັດຖະມົນຕີອົດສະຕຣາລີ ໂດຍໄດ້ບັນລຸການຮ່ວມມືຕ່າງໆໃນຂົງເຂດເສດຖະກິດການຄ້າ, ວັດທະນະທຳ ແລະອື່ນໆ.

ເມື່ອປັບຕົວ ແລະ ອອກເດີນທາງອີກຄັ້ງໃໝ່, ຈີນ ແລະ ອົດສະຕຣາລີເຮັດແນວໃດຈຶ່ງຈະສາມາດຮັກສາ ແລະ ພັດທະນາທ່ວງທ່າທີ່ດີແຫ່ງການພົວພັນລະຫວ່າງສອງປະເທດ? ບົດຮຽນອັນສຳຄັນທີ່ສຸດກໍຄື ຕ້ອງຍຶດໝັ້ນການເຄົາລົບເຊິ່ງກັນແລະກັນ, ສະແຫວງຫາສິ່ງທີ່ຄືກັນ ແລະ ສະຫງວນສິ່ງທີ່ຕ່າງກັນ, ຮ່ວມມືກັນແບບຕ່າງຝ່າຍຕ່າງໄດ້ຮັບຜົນປະໂຫຍດ.

ໃນການພົວພັນລະຫວ່າງສອງປະເທດ, ຂໍກຸນແຈແມ່ນຕ້ອງເຄົາລົບສະພາບການ ແລະ ຜົນປະໂຫຍດແກນກາງຂອງກັນແລະກັນ. ໃນການພົບປະລະຫວ່າງນາຍົກລັດຖະມົນຕີຈີນ ແລະ ອົດສະຕຣາລີໃນຄັ້ງນີ້, ອົດສະຕຣາລີລະບຸວ່າ: ຈະຍຶດໝັ້ນນະໂຍບາຍປະເທດຈີນດຽວ, ບໍ່ສະໜັບສະໜູນ “ການແບ່ງແຍກໄຕ້ຫວັນອອກເປັນເອກະລາດ” ; ບໍ່ໃຫ້ສິ່ງທີ່ຕ່າງກັນເປັນໂຕກຳນົດການພົວພັນສອງປະເທດ, ຊຸກຍູ້ການພົວພັນລະຫວ່າງຈີນ-ອົດສະຕຣາລີໃຫ້ໄດ້ຮັບການປັບປຸງ ແລະ ພັດທະນາຢ່າງຕໍ່ເນື່ອງ. ຖ້າຄຳລະບຸດັ່ງກ່າວໄດ້ຮັບການຈັດຕັ້ງປະຕິບັດຢ່າງແທ້ຈິງ ຈະເປັນການເສີມສ້າງຄວາມໜັກແໜ້ນຂອງພື້ນຖານແຫ່ງຄວາມເຊື່ອໝັ້ນເຊິ່ງກັນແລະກັນລະຫວ່າງຈີນກັບອົດສະຕຣາລີຢ່າງບໍ່ຢຸດຢັ້ງ.

ຈີນ ແລະ ອົດສະຕຣາລີມີທ່າແຮງຕາບຈູນກັນທາງດ້ານເສດຖະກິດ ເພາະເປັນຄູ່ຮ່ວມມືໂດຍທຳມະຊາດ. ຈີນ ແລະ ອົດສະຕຣາລີໄດ້ເຊັນບົດບັນທຶກຄວາມເຂົ້າໃຈວ່າດ້ວຍການຊຸກຍູ້ການປະຕິບັດສັນຍາການຄ້າເສລີຈີນ-ອົດສະຕຣາລີໃນຄັ້ງນີ້ ໂດຍຖືເອົາ “ການຊຸກຍູ້” ແລະ “ການປະຕິບັດ” ເປັນຄຳສັບສຳຄັນ ເຊິ່ງບໍ່ພຽງແຕ່ມີຜົນດີຕໍ່ສອງປະເທດໃນການປະຕິບັດສັນຍາການຄ້າເສລີຢ່າງແທ້ຈິງເທົ່ານັ້ນ, ຍັງໄດ້ສ່ອງແສງໃຫ້ເຫັນເຖິງຄວາມຕັດສິນໃຈ ແລະ ຄວາມພະຍາຍາມໃນການຊຸກຍູ້ການສ້າງເສດຖະກິດໂລກແບບເປີດປະຕູສູ່ພາຍນອກ.

ນອກນີ້, ຈີນຍັງໄດ້ຈັດໃຫ້ອົດສະຕຣາລີເຂົ້າໃນຂອບເຂດປະເທດຍົກເວັ້ນວີຊາແຕ່ຝ່າຍດຽວ, ສອງຝ່າຍເຫັນດີອອກວີຊາເຂົ້າອອກເມືອງຫຼາຍຄັ້ງໄລຍະ 3 ຫາ 5 ປີຂອງກັນແລະກັນສຳລັບນັກທ່ອງທ່ຽວ, ນັກທຸລະກິດ ແລະ ບຸກຄົນຢ້ຽມຢາມຍາດຕິພີ່ນ້ອງ ເຊິ່ງເປັນການສ່ອງແສງໃຫ້ເຫັນເຖິງຄວາມພະຍາຍາມຂອງຈີນ ແລະ ອົດສະຕຣາລີໃນການຊຸກຍູ້ການໄປມາຫາສູ່ກັນລະຫວ່າງປະຊາຊົນ.

ຈີນ ແລະ ອົດສະຕຣາລີລ້ວນແຕ່ເປັນປະເທດພາກພື້ນອາຊີປາຊີຟິກ, ບໍ່ມີບັນຫາຄົງຄ້າງໃນປະຫວັດສາດ ແລະ ກໍບໍ່ມີຄວາມຂັດແຍ້ງດ້ານຜົນປະໂຫຍດພື້ນຖານ, ແຕ່ຫາກມີຄວາມຮັບຮູ້ທີ່ເປັນເອກະພາບກັນຢ່າງກວ້າງຂວາງ. ສອງປະເທດຄວນປະສານສົມທົບກັນ ແລະ ຮ່ວມມືກັນ ເພື່ອຮັກສາສັນຕິພາບ ແລະ ສະຖຽນລະພາບຂອງພາກພື້ນ.