ວັນທີ 28 ມິຖຸນານີ້, ອົງການສະຫະປະຊາຊາດໄດ້ເປີດເຜີຍບົດລາຍງານກ່ຽວກັບເປົ້າໝາຍການພັດທະນະແບບຍືນຍົງປີ 2024. ບົດລາຍງານລະບຸວ່າ: ຫ່າງຈາກເວລາກຳນົດທີ່ໃຫ້ບັນລຸເປົ້າໝາຍການພັດທະນະແບບຍືນຍົງເຫຼືອພຽງແຕ່ 6 ປີເທົ່ານັ້ນ ແຕ່ຄວາມຄືບໜ້າທີ່ໄດ້ຮັບໃນປັດຈຸບັນ ເມື່ອທຽບກັບຄວາມຮຽກຮ້ອງຕ້ອງການໃນການບັນລຸເປົ້າໝາຍດັ່ງກ່າວແລ້ວແມ່ນຍັງໄກກັນຫຼາຍ.

ບົດລາຍງານດັ່ງກ່າວສະແດງໃຫ້ເຫັນວ່າ: ເມື່ອທຽບກັບປີ 2019, ໃນປີ 2022, ຜູ້ທີ່ຕົກເຂົ້າໃນຄວາມທຸກຍາກສຸດຂີດ ໄດ້ເພີ່ມໃໝ່ 23 ລ້ານຄົນ, 100 ລ້ານກວ່າຄົນປະສົບຄວາມອຶດຫິວ. ໃນປີ 2023, ປະຊາຊົນທີ່ເສຍຊີວິດໃນການປະທະກັນດ້ວຍກຳລັງອາວຸດໄດ້ເພີ່ມຂຶ້ນຢ່າງຫຼວງຫຼາຍ. ປີ 2023 ກໍແມ່ນປີທີ່ມີອາກາດຮ້ອນທີ່ສຸດໃນປະຫວັດສາດ, ອຸນຫະພູມໃນທົ່ວໂລກໄດ້ເພີ່ມຂຶ້ນເກືອບ 1,5°C ທີ່ເປັນຈຸດວິກິດ.

ບົດລາຍງານດັ່ງກ່າວໄດ້ຮຽກຮ້ອງໃຫ້ລະດົມທຶນເພື່ອການບັນລຸເປົ້າໝາຍພັດທະນາແບບຍືນຍົງສຳລັບປະເທດພວມພັດທະນາ, ປະຕິຮູບໂຄງປະກອບການເງິນທົ່ວໂລກ; ແກ້ໄຂການປະທະກັນດ້ວຍຊ່ອງທາງການທູດ ແລະ ການສົນທະນາ; ຊຸກຍູ້ການຫັນປ່ຽນຮູບແບບອຸດສາຫະກຳທີ່ສຳຄັນ.