ເວລາ 8 ໂມງຂອງວັນທີ 28 ມິຖຸນາ2024, ການປ່ອນບັດເລືອກຕັ້ງປະທານາທິບໍດີອີຣານຊຸດທີ 14 ເລີ່ມຈັດຂຶ້ນຢ່າງເປັນທາງການ. ການເລືອກຕັ້ງເທື່ອນີ້ມີຜູ້ມີສິດປ່ອນບັດຫຼາຍກວ່າ 61 ລ້ານຄົນ, ອີຣານໄດ້ຕັ້ງຈຸດປ່ອນບັດລວມທັງໝົດ 6 ໝື່ນແຫ່ງຢູ່ພາຍໃນອີຣານ ແລະ ຕ່າງປະເທດ.

ວັນທີ 29 ມິຖຸນາ2024, ກະຊວງພາຍໃນອີຣານປະກາດວ່າ, ວຽກງານນັບບັດເລືອກຕັ້ງປະທານາທິບໍດີຄັ້ງນີ້ໄດ້ສຳເລັດແລ້ວ. ຜູ້ສະໝັກຮັບເລືອກຕັ້ງ 4 ທ່ານບໍ່ມີຜູ້ໃດໄດ້ຈຳນວນບັດເລືອກຕັ້ງຫຼາຍກວ່າເຄິ່ງໜຶ່ງ, ສະນັ້ນ, ຜູ້ສະໝັກຮັບເລືອກຕັ້ງສອງທ່ານທີ່ໄດ້ຈຳນວນບັດເລືອກຕັ້ງຫຼາຍກວ່າໝູ່ນັ້ນຈະເຂົ້າສູ່ການປ່ອນບັດເລືອກຕັ້ງຮອບທີສອງ.

ການເລືອກຕັ້ງປະທານາທິບໍດີອີຣານຊຸດທີ 14 ຕາມກຳນົດຈະຈັດຂຶ້ນໃນປີ 2025, ເນື່ອງຈາກວ່າທ່ານໄຊອິດ ອີບຣາຮີມ ຣາຍຊີ ປະທານາທິບໍດີອີຣານໄດ້ເສຍຊີວິດຈາກອຸບັດເຫດຍົນເຮລີກົບແຕຕົກ ເມື່ອວັນທີ 19 ພຶດສະພາປີນີ້, ສະນັ້ນ, ການເລືອກຕັ້ງເທື່ອນີ້ຈຶ່ງຖືກຈັດຂຶ້ນກ່ອນກຳນົດ.

ການເລືອກຕັ້ງປະທານາທິບໍດີອີຣານໄດ້ຈັດຂຶ້ນ 4 ປີເທື່ອໜຶ່ງ, ປະທານາທິບໍດີຈະຖືກເລືອກຕັ້ງມາຈາກປະຊາຊົນໂດຍກົງ, ແລະສາມາດດຳລົງຕຳແໜ່ງອີກສະໄໝໜຶ່ງ. ໃນການປ່ອນບັດເລືອກຕັ້ງຮອບທຳອິດ, ຜູ້ສະໝັກຮັບເລືອກຕັ້ງທີ່ໄດ້ຈຳນວນບັດເລືອກຕັ້ງຫຼາຍກວ່າເຄິ່ງໜຶ່ງຈະສາມາດໄດ້ຮັບເລືອກຕັ້ງເປັນປະທານາທິບໍດີໂດຍກົງ.