ເນື່ອງໃນໂອກາດທີ່ທ່ານສີຈິ້ນຜິງ ປະທານປະເທດຈີນເຂົ້າຮ່ວມກອງປະຊຸມຄັ້ງທີ24ຂອງສະພາມົນຕີປະເທດສະມາຊິກອົງການຮ່ວມມືຊຽງໄຮແລະຢ້ຽມຢາມກາຊັກສະຖານທາງລັດຖະກິດ, ວິທະຍຸໂທລະພາບສູນກາງຈີນຫຼືCMGໄດ້ຈັດກິດຈະກຳແລກປ່ຽນວັດທະນະທຳຈີນ-ກາຊັກສະຖານພາຍໃຕ້ຫົວຂໍ້ “ເພື່ອນບ້ານທີ່ມີສາຍພູສາຍນ້ຳຕິດຈອດກັນຂຽນປະຫວັດສາດໜ້າໃໝ່” ໃນວັນທີ2ກໍລະກົດນີ້ຢູ່ນະຄອນຫຼວງອັສນາທາ ປະເທດກາຊັກສະຖານ. ທ່ານຄາຊິມ ໂຈມາດ ໂຕຄາເຢັຟ ປະທານາທິບໍດີກາຊັກສະຖານໄດ້ສົ່ງສານຊົມເຊີຍເພື່ອອວຍພອນໃຫ້ກິດຈະກຳຄັ້ງນີ້ຈົ່ງປະສົບຜົນສຳເລັດຢ່າງຈົບງາມ ພ້ອມທັງສົ່ງພອນໄຊອັນປະເສີດໄປຍັງບັນດາແຂກຜູ້ມີກຽດທີ່ເຂົ້າຮ່ວມກິດຈະກຳ.

ໃນໂອກາດດັ່ງກ່າວ, ບຸກຄົນຜູ້ມີຊື່ສຽງເກືອບ100ທ່ານຈາກວົງການຕ່າງໆຂອງກາຊັກສະຖານໄດ້ເປັນສັກຂີພິຍານໃຫ້ແກ່ສອງປະເທດບັນລຸການຮ່ວມມືຕົວຈິງໃນຂົງເຂດທີ່ກ່ຽວຂ້ອງຈຳນວນຫຼາຍປະການ ພ້ອມດ້ວຍການເລີ່ມອອກອາກາດຂອງຟີມສາລະຄະດີເລື່ອງ “ຄວາມໃຝ່ຝັນຮ່ວມກັນ” ທີ່ຈີນແລະກາຊັກສະຖານຮ່ວມກັນຖ່າຍທຳ.

ນອກນີ້, ສະຖາບັນຄົ້ນຄວ້າCMGແລະມະຫາວິທະຍາໄລເອີຣົບ-ອາຊີແຫ່ງຊາດກາຊັກສະຖານໄດ້ບັນລຸຄວາມເປັນເອກະພາບກັນກ່ຽວກັບການລົງເລິກການຮ່ວມມືຕື່ມອີກ ໂດຍສອງຝ່າຍໄດ້ແລກປ່ຽນບົດບັນທຶກຄວາມເຂົ້າໃຈການຮ່ວມມືຢູ່ສະຖານທີ່ຈັດກິດຈະກຳ. ຂະນະທີ່ໂຄງການ “ເຂົ້າເຖິງຂໍ້ມູນຂ່າວສານເສດຖະກິດຈີນ-ກາຊັກສະຖານໂດຍກົງ”ກໍໄດ້ເລີ່ມຂຶ້ນໃນວັນດຽວກັນ.