ບໍລິສັດ ABC ອາເມລິກາໄດ້ລາຍງານໂດຍອີງຕາມຂໍ້ມູນຈາກເຈົ້າໜ້າທີ່ອາເມຣິກາວ່າ: ວັນທີ 21 ກໍລະກົດນີ້ຢູ່ນະຄອນຟິລາເດວເຟຍ ປະເທດອາເມຣິກາ ໄດ້ເກີດມີເຫດການຍິງກັນໃນງານສະຫຼອງງານໜຶ່ງ, ເຮັດໃຫ້ມີ 9 ຄົນຖືກຍິງ, ໃນນັ້ນ 3 ຄົນເສຍຊີວິດ.
ອີງຕາມເຈົ້າໜ້າທີ່ຕໍາຫຼວດນະຄອນຟິລາເດວເຟຍແຈ້ງໃຫ້ຮູ້ວ່າ: ເຫດການຍິງກັນຂະໜາດໃຫຍ່ຄັ້ງນີ້ເກີດຂຶ້ນໃນເວລາປະມານ 2 ໂມງເຊົ້າເຊິ່ງໃນເວລານັ້ນມີ 100 ກວ່າຄົນເຂົ້າຮ່ວມງານສະຫຼອງດັ່ງກ່າວ. ເມື່ອເຈົ້າໜ້າທີ່ຕໍາຫຼວດໄປເຖິງສະຖານທີ່ເກີດເຫດ, ພວກເຂົາເຈົ້າໄດ້ພົບເຫັນວ່າ: ຜູ້ເສຍຊີວິດ ແລະ ຜູ້ບາດເຈັບມີບາດແຜຖືກລູກບືນຍິງ, ນອກນັ້ນຍັງໄດ້ພົບເຫັນປອກລູກບືນຕົກເຮ່ຍກະຈາຍຕາມພື້ນແບບຊະຊາຍຢູ່ສະຖານທີ່ດັ່ງກ່າວ.
ເຈົ້າໜ້າທີ່ສືບສວນພວມພະຍາຍາມນໍາຫາບຸກຄົນທີ່ກ່ຽວຂ້ອງກັບເຫດການຍິງກັນຄັ້ງນີ້. ແນວໃດກໍຕາມ, ປັດຈຸບັນ ເຈົ້າໜ້າທີ່ຍັງບໍ່ທັນປະກາດການເຄື່ອນໄຫວຈັບກຸມຜູ້ຕ້ອງສົງໄສເທື່ອ, ຂະນະທີ່ຊື່ ແລະ ນາມສະກຸນຂອງຜູ້ເສຍຊີວິດກໍຍັງບໍ່ທັນເປີດເຜີຍເທື່ອ.