ວັນທີ 23 ກໍລະກົດນີ້, ທ່ານ ສີຈິ້ນຜິງ ປະທານປະເທດຈີນໄດ້ສົ່ງໂທລະເລກຊົມເຊີຍເຖິງທ່ານ ພາວ ຄາກາເມ ທີ່ໄດ້ຮັບເລືອກຕັ້ງເປັນປະທານາທິບໍດີແຫ່ງສາທາລະນະລັດຣູວັນດາອີກສະໄໝ.

   ເນື້ອໃນໂທລະເລກຊົມເຊີຍຂອງທ່ານ ສີຈິ້ນຜິງ ລະບຸວ່າ: ຣູວັນດາເປັນປະເທດເພື່ອນມິດທີ່ເປັນມູນເຊື້ອຂອງຈີນ. ໃນຊຸມປີມໍ່ໆມານີ້, ການພົວພັນລະຫວ່າງສອງປະເທດໄດ້ຮັບການພັດທະນາຢ່າງວ່ອງໄວ, ການຮ່ວມມືໃນຂົງເຂດຕ່າງໆໄດ້ຮັບໝາກຜົນອັນອຸດົມສົມບູນ, ມິດຕະພາບທີ່ເປັນມູນເຊື້ອລະຫວ່າງສອງປະເທດໄດ້ຮັບການລົງເລິກຢ່າງບໍ່ຢຸດຢັ້ງ. ຂ້າພະເຈົ້າຍິນດີພະຍາຍາມຮ່ວມກັບທ່ານປະທານາທິບໍດີ, ເພີ່ມທະວີຄວາມໄວ້ເນື້ອເຊື່ອໃຈກັນທາງການເມືອງລະຫວ່າງສອງຝ່າຍຕື່ມອີກ, ເປີດກວ້າງ ແລະ ລົງເລິກການຮ່ວມມືຕົວຈິງໃນຂົງເຂດຕ່າງໆ ເພື່ອຊຸກຍູ້ການພົວພັນລະຫວ່າງສອງປະເທດໃຫ້ຂະຫຍາຍຕົວກ້າວຂຶ້ນສູ່ລະດັບໃໝ່.