ວັນທີ 27 ກໍລະກົດນີ້, ທ່ານຫວາງຢີ້ ກຳມະການກົມການເມືອງສູນກາງພັກຄອມມູນິດຈີນ ລັດຖະມົນຕີກະຊວງການຕ່າງປະເທດຈີນໄດ້ເຂົ້າຮ່ວມກອງປະຊຸມລັດຖະມົນຕີກະຊວງການຕ່າງປະເທດກ່ຽວກັບການຮ່ວມມືອາຊີຕາເວັນອອກ ຢູ່ທີ່ນະຄອນຫຼວງວຽງຈັນ, ໂດຍໄດ້ບັນລະຍາຍຫຼັກໝັ້ນຂອງຈີນກ່ຽວກັບບັນຫາທະເລຈີນໃຕ້.

ທ່ານຫວາງຢີ້ກ່າວວ່າ: ອະທິປະໄຕເໜືອຜືນແຜ່ນດິນ ແລະ ສິດຜົນປະໂຫຍດດ້ານທະເລຂອງຈີນຢູ່ທະເລຈີນໃຕ້ໄດ້ມີປະຫວັດສາດອ້າງອີງ ແລະ ກົດໝາຍຢ່າງເຕັມສ່ວນ. ຈີນໄດ້ພິຈາລະນາເລີ່ມຈາກພາກສ່ວນລວມເພື່ອຮັກສາມິດຕະພາບກັບປະເທດອ້ອມຂ້າງ ແລະ ການຮ່ວມມືໃນພາກພື້ນ, ໂດຍຮ່ວມກັບປະເທດສະມາຊິກອາຊຽນລົງນາມໃນ “ຖະແຫຼງການຮ່ວມແຫ່ງການປະພຶດຂອງບັນດາຝ່າຍຢູ່ທະເລຈີນໃຕ້”, ຈັດຕັ້ງປະຕິບັດ “ຖະແຫຼງການ” ດັ່ງກ່າວຢ່າງຮອບດ້ານ ແລະ ມີປະສິດທິຜົນມາໂດຍຕະຫຼອດ, ພ້ອມທັງຍຶດໝັ້ນສົນທະນາ ແລະ ເປິກສາຫາລືກັບປະເທດທີ່ກ່ຽວຂ້ອງໂດຍກົງເພື່ອຄຸ້ມຄອງ-ຄວບຄຸມບັນຫາທີ່ຂັດແຍ້ງກັນຢ່າງເໝາະສົມ. ຈີນ ແລະ ປະເທດສະມາຊິກອາຊຽນພວມຊຸກຍູ້ການເປິກສາຫາລືກ່ຽວກັບ “ຫຼັກການການເຄື່ອນໄຫວຢູ່ທະເລຈີນໃຕ້” ຢ່າງຕໍ່ເນື່ອງ, ດຳເນີນການຮ່ວມມືຕົວຈິງທາງທະເລຢ່າງຕັ້ງໜ້າ, ຮ່ວມກັນປົກປັກຮັກສາສັນຕິພາບ ແລະ ສະຖຽນລະພາບຢູ່ທະເລຈີນໃຕ້. ປະເທດໃນພາກພື້ນນີ້ມີຄວາມໝັ້ນໃຈ ມີສະຕິປັນຍາ ແລະ ມີຄວາມສາມາດຢ່າງເຕັມສ່ວນເພື່ອແກ້ໄຂບັນຫາທະເລຈີນໃຕ້ໃຫ້ດີ.

ທ່ານຫວາງຢີ້ກ່າວຕື່ມວ່າ, ທະເລຈີນໃຕ້ເປັນໜຶ່ງໃນທາງຜ່ານເທິງທະເລທີ່ປອດໄພທີ່ສຸດ ແລະ ເສລີທີ່ສຸດ, ສິດເສລີດ້ານການເດີນເຮືອ ແລະ ການບິນຜ່ານທະເລຈີນໃຕ້ແມ່ນບໍ່ມີບັນຫາແມ່ນແຕ່ໜ້ອຍດຽວ. ບາງປະເທດຢູ່ນອກພາກພື້ນເຈຕະນາປຸກປັ່ນສ້າງຄວາມປັ່ນປ່ວນໄປທົ່ວທີບ, ຈົນກະທັ້ງມຸ້ງໝາຍຢາກຕິດຕັ້ງຂີປະນາວຸດໄລຍະກາງຢູ່ພາກພື້ນນີ້, ປຸກປັ່ນໃຫ້ສ້າງຄວາມເປັນປໍລະປັກກັນ ແລະ ການປະທະກັນ, ເຊິ່ງເປັນປັດໄຈຮ້າຍແຮງທີ່ສຸດເພື່ອທຳລາຍສັນຕິພາບຢູ່ທະເລຈີນໃຕ້.