ວັນທີ 27 ກໍລະກົດນີ້, ກອງປະຊຸມລັດຖະມົນຕີຕ່າງປະເທດຂອງກອງປະຊຸມສຸດຍອດອາຊີຕາເວັນອອກຄັ້ງທີ 14 ໄດ້ຈັດຂຶ້ນຢູ່ນະຄອນຫຼວງວຽງຈັນ. ທ່ານ ຫວາງຢີ້ ກໍາມະການກົມການເມືອງສູນກາງພັກຄອມມູນິດຈີນ, ລັດຖະມົນຕີກະຊວງການຕ່າງປະເທດຈີນໄດ້ເຂົ້າຮ່ວມກອງປະຊຸມ ແລະ ກ່າວຄໍາປາໄສ.

   ໃນໂອກາດນີ້, ທ່ານ ຫວາງຢີ້ ກ່າວວ່າ: ປັດຈຸບັນ, ສະພາບການສາກົນມີຄວາມສັບສົນ ແລະ ປັ່ນປ່ວນ, ບັນຫາຈຸດສຸມມີຄວາມເຄັ່ງຮ້ອນຂຶ້ນ ແລະ ຍາກທີ່ຈະໄດ້ຮັບການແກ້ໄຂ. ກອງປະຊຸມສຸດຍອດອາຊີຕາເວັນອອກຄວນກໍາແໜ້ນທິດທາງທີ່ຖືກຕ້ອງ, ເພີ່ມທະວີຄວາມສາມັກຄີ ແລະ ການປະສານງານ ເພື່ອຊຸກຍູ້ສັນຕິພາບ ແລະ ຄວາມຈະເລີນຮຸ່ງເຮືອງທີ່ຍາວນານໃນພາກພື້ນ ກໍຄືປົກປັກຮັກສາຄວາມຍຸຕິທໍາ ແລະ ຄວາມເປັນທໍາຂອງສາກົນ. ດ້ວຍເຫດຜົນນີ້, ຈີນຈຶ່ງສະເໜີ 4 ຂໍ້ສະເໜີຄືດັ່ງນີ້: 1.ຮ່ວມກັນປົກປັກຮັກສາໂຄງລ່າງໃນພາກພື້ນທີ່ເປີດປະຕູ ແລະ ກວມລວມ; 2.ຮ່ວມກັນປະຕິບັດຕາມກົດລະບຽບໃນພາກພື້ນທີ່ຝ່າຍຕ່າງໆຮັບຮູ້ເປັນເອກະພາບກັນ; 3.ຮ່ວມກັນເພີ່ມທະວີແຮງຂັບເຄື່ອນໃນຄຸນນະພາບໃໝ່ດ້ານການເຊື່ອມໂຍງເຊື່ອມຈອດກັນ; 4.ຮ່ວມກັນຂຸດຄົ້ນປະສິດທິພາບ ແລະ ຄວາມມີຊີວິດຊີວາຂອງກອງປະຊຸມສຸດຍອດອາຊີຕາເວັນອອກ.

   ນອກນີ້, ທ່ານ ຫວາງຢີ້ ໄດ້ຕອບໂຕ້ອັນທີ່ເອີ້ນວ່າຄວາມເປັນຫ່ວງຂອງບາງປະເທດທີ່ມີຕໍ່ສະຖຽນລະພາບຢູ່ຊ່ອງແຄບໄຕ້ຫວັນຢ່າງຮຸນແຮງ, ພ້ອມທັງກ່າວເນັ້ນໜັກວ່າ: ບັນຫາໄຕ້ຫວັນເປັນວຽກງານພາຍໃນຂອງຈີນ ແລະ ອິດທິກໍາລັງພາຍນອກໃດໆລ້ວນແຕ່ບໍ່ມີສິດເຂົ້າມາແຊກແຊງ, ແຕ່ຄວນປະຕິບັດຕາມຫຼັກການພື້ນຖານສາກົນທີ່ບໍ່ເຂົ້າແຊກແຊງວຽກງານພາຍໃນຂອງປະເທດອື່ນຢ່າງແທ້ຈິງ ແລະ ປະຕິບັດຕາມຫຼັກການປະເທດຈີນດຽວທີ່ເປັນຄວາມຮັບຮູ້ໂດຍທົ່ວໄປຂອງປະຊາຄົມໂລກ.