ວັນທີ 27 ກໍລະກົດນີ້, ທ່ານ ຫວາງຢີ້, ກຳມະການກົມການເມືອງສູນກາງພັກຄອມມູນິດຈີນ ລັດຖະມົນຕີກະຊວງການຕ່າງປະເທດຈີນໄດ້ພົບປະກັບທ່ານ ອັນໂຕນີ ບລິນເຄນ ລັດຖະມົນຕີກະຊວງການຕ່າງປະເທດອາເມລິກາ. ສອງຝ່າຍໄດ້ແລກປ່ຽນຄວາມຄິດຄວາມເຫັນກ່ຽວກັບການພົວພັນລະຫວ່າງຈີນ-ອາເມລິກາໃນປະຈຸບັນ ແລະເຫັນດີສືບຕໍ່ຮັກສາການແລກປ່ຽນໃນທຸກຂັ້ນ, ປະຕິບັດຄວາມເຫັນທີ່ເປັນເອກະພາບກັນທີ່ສຳຄັນຂອງປະມຸກລັດສອງປະເທດທີ່ຕົກລົງກັນໃນການພົບປະຢູ່ນະຄອນຊານຟຣານຊິສໂກ.

ທ່ານ ຫວາງຢີ້ ກ່າວວາ: ໃນສາມເດືອນຜ່ານມາ, ທິມງານການພົວພັນທາງການທູດ, ການເງິນ, ການປະຕິບັດກົດໝາຍ, ການປ່ຽນແປງດ້ານດິນຟ້າອາກາດຂອງສອງຝ່າຍ ແລະສອງກອງທັບໄດ້ຮັກສາການແລກປ່ຽນກັນ, ການໄປມາຫາສູ່ກັນລະຫວ່າງປະຊາຊົນສອງປະເທດກໍ່ເພີ່ມຂຶ້ນ. ແຕ່ຕ້ອງຊີ້ໃຫ້ເຫັນວ່າ, ອາເມລິກາບໍ່ໄດ້ຢຸດຕິການສະກັດກັ້ນຕໍ່ຈີນ, ຫາກຍັງໄດ້ເພີ່ມຄວາມແຮງຂຶ້ນຕື່ມອີກ. ຄວາມສ່ຽງຕໍ່ການພົວພັນລະຫວ່າງຈີນກັບອາເມລິກາຍັງຄົງສະສົມເພີ່ມຂຶ້ນ ການທ້າທາຍກໍ່ເພີ່ມຂຶ້ນ, ການພົວພັນສອງປະເທດຍັງຢູ່ໃນຈຸດເວລາທີ່ມີລັກສະນະຂໍກຸນແຈສໍາຄັນທີ່ຟື້ນຟູດີຂຶ້ນ, ຈໍາເປັນຕ້ອງໄດ້ປັບປຸງທິດທາງໃຫ້ຖືກຕ້ອງຢ່າງຕໍ່ເນື່ອງ, ຄຸ້ມຄອງ-ຄວບຄຸມຄວາມສ່ຽງ, ແກ້ໄຂຄວາມເຫັນທີ່ຂັດແຂ້ງກັນຢ່າງເໝາະສົມ, ລົບລ້າງສິ່ງລົບກວນ, ແລະຊຸກຍູ້ການຮ່ວມມື.

ທ່ານ ຫວາງຢີ້ ກ່າວຕື່ມວ່າ, ນະໂຍບາຍຂອງຈີນທີ່ມີຕໍ່ອາເມລິກາແມ່ນສະເໝີຕົ້ນສະເໝີປາຍ, ແລະຍຶດໝັ້ນຫຼັກການທີ່ເຄົາລົບເຊິ່ງກັນແລະກັນ, ຢູ່ຮ່ວມກັນໂດຍສັນຕິ ແລະ ຮ່ວມມືແບບຕ່າງຝ່າຍຕ່າງມີຜົນປະໂຫຍດ. ອາເມລິກາຄວນປະຕິບັດຄຳໝັ້ນສັນຍາຂອງປະທານາທິບໍດີໂຈໄບເດນຢ່າງເປັນຮູບປະທຳ ແລະກັບຄືນສູ່ນະໂຍບາຍຕໍ່ຈີນທີ່ສົມເຫດສົມຜົນແລະຕິດແທດຕົວຈີງ. ສອງຝ່າຍຄວນຮ່ວມກັນຊຸກຍູ້ການພົວພັນຈີນ-ອາເມລິກາພັດທະນາຢ່າງໝັ້ນທ່ຽງ, ປອດໄສ ແລະແບບຍືນຍົງ.

ທ່ານ ຫວາງຢີ້ ຊີ້ອອກວ່າ, ອາເມລິກາຊູຊີຖືຄວາມຮັບຮູ້ທີ່ຜິດພາດຕໍ່ປະເທດຈີນ, ມັກໃຊ້ໂລຊິດແບບມະຫາອຳນາດຂອງຕົນໄປວາດພາບຈີນ. ຈີນບໍ່ແມ່ນອາເມລິກາ, ກໍ່ບໍ່ຢາກກາຍເປັນແບບອາເມລິກາ. ຈີນບໍ່ສະແຫວງຫາມະຫາອຳນາດ, ເປັນປະເທດທີ່ມີສະຖິຕິດີທີ່ສຸດໃນໂລກກ່ຽວກັບບັນຫາສັນຕິພາບແລະຄວາມໝັ້ນຄົງ. ກອງປະຊຸມຄົບຄະນະຄັ້ງທີ 3 ຂອງຄະນະກຳມະການສູນກາງພັກຄອມມູນິດຈີນສະໄໝທີ 20 ໄດ້ຮັບຮອງເອົາຂໍ້ຕົກລົງທີ່ສຳຄັນໃນການລົງເລິກການປະຕິຮູບຢ່າງຮອບດ້ານຕື່ມອີກເພື່ອຊຸກຍູ້ຄວາມທັນສະໄໝແບບຈີນ. ຈີນຍຶດໝັ້ນອຸດົມການແຕ່ຫົວທີຂອງຕົນ, ຕັ້ງໃຈສະແຫວງຫາຄວາມຜາສຸກໃຫ້ແກ່ປະຊາຊົນ ແລະຟື້ນຟູຄວາມຈະເລີນຮຸ່ງເຮືອງຂອງປະເທດຊາດ, ຍຶດໝັ້ນເດີນຕາມເສັ້ນທາງທີ່ພັດທະນາໂດຍສັນຕິ, ຊຸກຍູ້ການສ້າງປະຊາຄົມຮ່ວມຊາຕາກໍາມວນມະນຸດ. ຫວັງວ່າອາເມລິກາຈະເຂົ້າໃຈຍຸກປະຈຸບັນ ແລະອະນາຄົດຂອງພັກຄອມມູນິດຈີນ ແລະ ປະເທດຈີນຈາກຂໍ້ຕົກລົງດັ່ງກ່າວນີ້.

ທ່ານ ຫວາງຢີ້ ກ່າວເນັ້ນວ່າ: ໄຕ້ຫວັນເປັນພາກສ່ວນໜຶ່ງຂອງຈີນ, ໃນອະດີດບໍ່ແມ່ນ  ໃນອະນາຄົດຍິ່ງຈະບໍ່ແມ່ນປະເທດໜຶ່ງ. ການແບ່ງແຍກ "ໄຕ້ຫວັນເປັນເອກະລາດ" ແມ່ນບໍ່ສອດຄ່ອງກັບສັນຕິພາບໃນຊ່ອງແຄບໄຕ້ຫວັນ. ທຸກໆຄັ້ງທີ່ອິດທິກຳລັງແບ່ງແຍກ “ໄຕ້ຫວັນເປັນເອກະລາດ” ທ້າທາຍເກາະຜິດ, ພວກເຮົາຈະຕອບໂຕ້ຄືນຢ່າງແນ່ນອນ, ແລະຈະສືບຕໍ່ຫຼຸດຊ່ອງຫວ່າງທີ່ແບ່ງແຍກ “ໄຕ້ຫວັນເປັນເອກະລາດ”, ແລະຈະສຸມຄວາມພະຍາຍາມເພື່ອບັນລຸໝາຍທີ່ທ້ອນໂຮມປະເທດຊາດໃຫ້ເປັນເອກະພາບຢ່າງເຕັມສ່ວນ.

ທ່ານ ຫວາງຢີ້ ຍັງໄດ້ຊີ້ແຈງ ກ່ຽວກັບບັນຫາຫາດຕື້ນເຢິນອ້າຍທີ່ຢູ່ທະເລຈີນໃຕ້, ທ່ານໄດ້ຊີ້ອອກວ່າ: ຈີນໄດ້ບັນລຸຂໍ້ຕົກລົງຊົ່ວຄາວກັບຟີລິບປິນເພື່ອຄວບຄຸມສະຖານະການ, ຟີລິບປິນຄວນເຮັດຕາມຄຳໝັ້ນສັນຍາຂອງຕົນ ແລະຢຸດການຂົນສົ່ງວັດສະດຸກໍ່ສ້າງ, ອາເມລິກາກໍ່ຄວນຢຸດການຍຸແຍ່, ກໍ່ຄວາມວຸ້ນວາຍ ແລະທຳລາຍສະຖຽນລະພາບຢູ່ທະເລດັ່ງກ່າວ.

ທ່ານ ຫວາງຢີ້ ກ່າວອີກວ່າ: ຫຼັກໝັ້ນຂອງຈີນກ່ຽວກັບບັນຫາອູແກຣນແມ່ນມີຄວາມເປີດກວ້າງ ແລະກົງໄປກົງມາ ພ້ອມທັງຈະສືບຕໍ່ຊຸກຍູ້ສັນຕິພາບ ແລະການເຈລະຈາ. ອາເມລິກາຄວນຢຸດຕິບັນດາມາດຕະການລົງໂທດພຽງລຳພັງແຕ່ຝ່າຍດຽວ, ຈີນຄັດຄ້ານການໃສ່ຮ້າຍປ້າຍສີ ແລະບໍ່ຍອມຮັບເອົາແຮງກົດດັນ ແລະນາບຂູ່ຢ່າງເດັດດ່ຽວ, ທັງຈະໃຊ້ມາດຕະການເດັດຂາດ ເພື່ອປົກປັກຮັກສາຜົນປະໂຫຍດ ແລະສິດອັນຊອບທຳຂອງຕົນ.

ທ່ານອັນໂຕນີ ບຣິນເຄນ ກ່າວວ່າ, ອາເມລິກາຕັ້ງໜ້າ ຮັກສາຄວາມໝັ້ນທ່ຽງຂອງ ການພົວພັນຈີນ-ອາເມລິກາ, ຍຶດໝັ້ນນະໂຍບາຍປະເທດຈີນດຽວ, ແລະຫວັງວ່າຈະຮັກສາການພົວພັນກັບຈີນເປັນປົກກະຕິ, ສືບຕໍ່ດຳເນີນການຮ່ວມມືດ້ານການປາບປາມຢາເສບຕິດ, ສົ່ງເສີມປັນຍາປະດິດ AI ແລະອື່ນໆ. ອາເມລິກາຍິນດີຈະຄວບຄຸມຄວາມເຫັນທີ່ຂັດແຍ້ງກັນລະຫວ່າງສອງຝ່າຍໃຫ້ດີ ແລະຫຼີກເວັ້ນການເຂົ້າໃຈຜິດ ແລະການວິນິດໄສທີ່ບໍ່ຖືກຕ້ອງ.

ສອງຝ່າຍຍັງໄດ້ແລກປ່ຽນຄວາມເຫັນກ່ຽວກັບສະຖານະການຢູ່ເຂດກາຊາ, ສະຖານະການແຫຼມເກົາຫຼີ, ແລະບັນຫາມຽນມາ.