ວັນທີ 27 ກໍລະກົດນີ້, ທ່ານ ຫວາງຢີ້ ກຳມະການກົມການເມືອງສູນກາງພັກຄອມມູນິດຈີນທັງເປັນລັດຖະມົນຕີກະຊວງການຕ່າງປະເທດຈີນ ໄດ້ພົບປະກັບທ່ານ ວິວຽນ ບາລັກຣິສນັນ ລັດຖະມົນຕີກະຊວງການຕ່າງປະເທດສິງກະໂປ ທີ່ນະຄອນຫຼວງວຽງຈັນ.

ທ່ານ ຫວາງຢີ້ ກ່າວວ່າ: ຈີນ ແລະສິງກະໂປລ້ວນແຕ່ມີມໍລະດົກວັດທະນະທຳຕາເວັນອອກທີ່ເລິກເຊິ່ງ, ແລະໄດ້ພົບເຫັນເສັ້ນທາງພັດທະນາທີ່ເໝາະສົມກັບສະພາບແຫ່ງຊາດຂອງຕົນ ແລະໄດ້ຮັບການສະໜັບສະໜູນຢ່າງກວ້າງຂວາງຈາກປະຊາຊົນ. ປະຈຸບັນ, ກອງປະຊຸມຄົບຄະນະຄັ້ງທີ 3 ຂອງຄະນະກຳມະການສູນກາງພັກຄອມມູນິດຈີນສະໄໝທີ 20 ໄດ້ອັດລົງຢ່າງສຳເລັດຜົນ, ເຊິ່ງໄດ້ເຕົ້າໂຮມນ້ຳໃຈຂອງພັກແລະປະຊາຊົນຢ່າງແໜ້ນແຟ້ນ, ໄດ້ສ້າງກຳລັງແຮງອັນໜັກແໜ້ນໃຫ້ແກ່ການຊຸກຍູ້ຄວາມທັນສະໄໝແບບຈີນຢ່າງຮອບດ້ານ.  ສິງກະໂປໄດ້ສຳເລັດການໝອບຮັບໜ້າທີ່ຂອງນາຍົກລັດຖະມົນຕີ, ການພັດທະນາປະເທດຊາດຈະໄດ້ເປີດໜ້າໃໝ່. ຈີນຍິນດີຮ່ວມກັບສິງກະໂປຊຸກຍູ້ການຮ່ວມມືຮອບດ້ານ, ມີຄຸນນະພາບສູງ ແລະກ້າວໄປໜ້າ, ປະກອບສ່ວນເຂົ້າໃນສັນຕິພາບ, ສະຖຽນລະພາບ ແລະຄວາມຈະເລີນຮຸ່ງເຮືອງຂອງພາກພື້ນ.

ທ່ານ ຫວາງຢຢີ້ ກ່າວຕື່ມວ່າ: ການພົວພັນຈີນ-ສິງກະໂປມີທ່ວງທ່າພັດທະນາທີ່ດີ ແລະສອງປະເທດຮັກສາການແລກປ່ຽນລະດັບສູງຢ່າງໃກ້ຊິດ. ສອງຝ່າຍຄວນສົມທົບກັນກໍ່ສ້າງ “ໜຶ່ງແລວໜຶ່ງເສັ້ນທາງ” ດ້ວຍຄຸນນະພາບສູງ, ຍົກສູງຄຸນນະພາບ ແລະ ຍົກລະດັບການຮ່ວມມືລະຫວ່າງສອງປະເທດ, ສ້າງບັນດາໝາກຜົນຢ່າງຕັ້ງໜ້າໃຫ້ຫຼາຍຂຶ້ນຕື່ມອີກເຊັ່ນ: ປັນຍາປະດິດ, ເສດຖະກິດດິຈີຕອນ, ການພັດທະນາສີຂຽວ, ແລະ ການຮ່ວມມືທາງທະເລ, ເພີ່ມທະວີການແລກປ່ຽນໃນບັນດາແນວຄິດ, ນັກວິຊາການ, ແລະສື່ມວນຊົນ.

ທ່ານ ວິວຽນ ບາລັກຣິສນັນ ກ່າວວ່າ: ສິງກະໂປ ແລະຈີນລ້ວນແຕ່ມີຮາກຖານວັດທະນະທຳອາຊີ ແລະຍຶດໝັ້ນທີ່ຈະຊ່ວຍໃຫ້ປະຊາຊົນມີຊີວິດທີ່ດີຂຶ້ນ. ສອງຝ່າຍເອົາໃຈໃສ່ເປັນຢ່າງດີຕໍ່ການສ້າງແຜນການພັດທະນາໃນໄລຍະຍາວ ແລະ ໃຫ້ຄຳໝັ້ນສັນຍາຈະປະຕິບັດ. ສິງກະໂປເອົາໃຈໃສ່ຕໍ່ການພົວພັນສອງຝ່າຍ, ຍຶດໝັ້ນນະໂຍບາຍຈີນດຽວ, ເດັດດ່ຽວຄັດຄ້ານ "ເອກະລາດໄຕ້ຫວັນ". ດີໃຈທີ່ສິງກະໂປ ແລະຈີນເຂົ້າໃຈແລະໄວ້ເນື້ອເຊື່ອໃຈເຊິ່ງກັນແລະກັນ, ຮັກສາການແລກປ່ຽນລະດັບສູງ, ບັນລຸການຍົກເວັ້ນວີຊາເຊິ່ງກັນແລະກັນ, ແລະຟື້ນຟູການບິນໂດຍກົງ. ສິງກະໂປຍິນດີຖືເອົາວັນສ້າງຕັ້ງສາຍພົວພັນທາງການທູດລລະຫວ່າງສິງກະໂປກັບຈີນຄົບຮອບ 35 ປີໃນປີໜ້າເປັນໂອກາດຊຸກຍູ້ການຮ່ວມມືໃນດ້ານຕ່າງໆໃຫ້ບັນລຸໄດ້ໝາກຜົນຫຼາຍກວ່າເກົ່າ.