ວັນທີ 27 ກໍລະກົດນີ້ຢູ່ນະຄອນບາເຊໂລນາຂອງແອັດສະປາຍ, ວິທະຍຸໂທລະພາບສູນກາງຈີນ ຫຼື CMG ແລະ ກຸ່ມ MEDIAPRO ຂອງແອັດສະປາຍໄດ້ຮ່ວມກັນລົງນາມໃນບົດບັນທຶກຄວາມເຂົ້າໃຈວ່າດ້ວຍການຮ່ວມມື. ສອງຝ່າຍໄດ້ບັນລຸຄວາມເປັນເອກະພາບກັນໃນການຮ່ວມມືໃນຂົງເຂດຕ່າງໆ ເຊັ່ນ: ການແບ່ງປັນຊັບພະຍາກອນດ້ານສື່ມວນຊົນ, ການຜະລິດລາຍການວິດີໂອ ແລະ ສຽງ, ການປະດິດສ້າງ ແລະ ການນໍາໃຊ້ເຕັກໂນໂລຊີໃໝ່ ເປັນຕົ້ນ. ທ່ານ ເຊີ້ນໄຫສົງ ຮອງຫົວໜ້າຄະນະໂຄສະນາອົບຮົມສູນກາງພັກຄອມມູນິດຈີນ, ຜູ້ອໍານວຍການໃຫຍ່ CMG ແລະ ທ່ານ ຕັດໂສ ບີເນດ ປະທານກຸ່ມບໍລິສັດ MEDIAPRO ໄດ້ຕາງໜ້າສອງຝ່າຍລົງນາມໃນບົດບັນທຶກຄວາມເຂົ້າໃຈ.

   ອີງຕາມບົດບັນທຶກດັ່ງກ່າວ, ສອງຝ່າຍຈະດໍາເນີນການຮ່ວມມືໃນຂອບເຂດທົ່ວໂລກ ເຊັ່ນ: ຮ່ວມກັນຊົມໃຊ້ອຸປະກອນສື່ມວນຊົນ ແລະ ຊັບພະຍາກອນເຕັກໂນໂລຊີ, ດໍາເນີນການແລກປ່ຽນລະຫວ່າງນັກວິຊາການ, ຮ່ວມກັນຜະລິດລາຍການຂ່າວ, ລະຄອນໂທລະພາບ, ສາລະຄະດີ, ລາຍການຄໍລໍາສະເພາະ ແລະອື່ນໆ, ເພີ່ມທະວີການຮ່ວມມືດ້ານອຸດສາຫະກໍາ ເຊັ່ນ: ອຸດສາຫະກໍາກິລາເປັນຕົ້ນ, ຕ່າງຝ່າຍຕ່າງເສີມຂະຫຍາຍທ່າແຮງຂອງຕົນເພື່ອຮ່ວມກັນບຸກເບີກຕະຫຼາດການສື່ສານ.