ວັນທີ 27 ກໍລະກົດນີ້, ທ່ານ ຫວາງຢີ້, ກຳມະການກົມການເມືອງສູນກາງພັກກອມມູນິດຈີນ, ລັດຖະມົນຕີກະຊວງການຕ່າງປະເທດຈີນໄດ້ເຂົ້າຮ່ວມກອງປະຊຸມອາຊຽນ ແລະຈີນ, ຍີ່ປຸ່ນ ແລະສ.ເກົາຫຼີ (10+3) ທີ່ນະຄອນຫຼວງວຽງຈັນ.

ທ່ານ ຫວາງຢີ້ ກ່າວວ່າ: 10+3 ເປັນກົນໄກສຸກງ່ອມທີ່ສຸດອັນໜຶ່ງຂອງການຮ່ວມມືພາກພື້ນອາຊີຕາເວັນອອກ, ໃນ 20 ກວ່າປີມາໄດ້ປະຕິບັດການຮ່ວມມືຢ່າງແທດຈີງໃນຂົງເຂດຕ່າງໆ, ໄດ້ນຳພາປະເທດໃນພາກພື້ນຮັບມືກັບການທ້າທາຍຕ່າງໆເຊັ່ນວິກິດການການເງິນແລະການແຜ່ລະບາດຂອງພະຍາດໂຄວິດເປັນຕົ້ນ. ປັດຈຸບັນ, ເສດຖະກິດໂລກເຕີບໂຕຊ້າລົງ, ສະຖານະການສາກົນສັບສົນປ່ຽນແປງ,ຄວາມຮຽກຮ້ອງຂອງບັນດາປະເທດທີ່ມີຕໍ່ສະຖຽນລະພາບແລະການພັດທະນານັບມື້ນັບແຮງກ້າ, ແລະມີຄວາມຮີບດ່ວນຕໍ່ການຮັບມືກັບຄວາມສ່ຽງແລະການທ້າທາຍຕ່າງໆ. ຈີນຍິນດີຮ່ວມກັບທຸກຝ່າຍສືບຕໍ່ສະໜັບສະໜູນຖານະໃຈກາງຂອງອາຊຽນໃນພາກພື້ນ, ສົ່ງເສີມບົດບາດຂອງກົນໄກ 10+3, ລົງເລິກການຮ່ວມມືໃນຂົງເຂດທ່າແຮງດັ້ງເດີມແລະບຸກເບີກການຮ່ວມມືໃນຂົງເຂດຈະເລີນໃໝ່. ຝ່າຍຈີນຂໍສະເໜີ 4 ຢ່າງໃນການຮ່ວມມືໃນໄລຍະຕໍ່ໄປ:

ໜຶ່ງ ແມ່ນລົງເລິກການເຊື່ອມໂຍງເສດຖະກິດເປັນເອກະພົບດຽວ, ຊຸກຍູ້ການເຊື່ອມຕໍ່ພາກພື້ນ. ຈີນສະໜັບສະໜູນການເພີ່ມທະວີການເຊື່ອມຕໍ່ຕ່ອງໂສ້ການສະໜອງຂອງພາກພື້ນ ແລະຈະຈັດກອງປະຊຸມການເຊື່ອມຕໍ່ຕ່ອງໂສ້ການຜະລິດກັບການສະໜອງ10+3ພາຍໃນປີນີ້, ຍິນດີຮ່ວມມືກັບທຸກຝ່າຍເພື່ອຮັກສາລະບົບຕ່ອງໂສ້ການສະໜອງໃຫ້ໝັ້ນຄົງແລະຄ່ອງຕົວ. ສົ່ງເສີມ RCEP, ຊຸກຍູ້ການປະຕິບັດດ້ວຍຄຸນນະພາບສູງ, ເລັ່ງລັດຟື້ນຟູການເຈລະຈາເຂດການຄ້າເສລີຈີນ-ຍີ່ປຸ່ນ-ສ.ເກົາຫຼີ ເພື່ອຍົກສູງລະດັບເສດຖະກິດອາຊີຕາເວັນອອກເປັນເອກະພົບດຽວ.

ສອງ, ເພີ່ມຄວາມສາມາດໃນການແກ້ໄຂວິກິດການ ແລະຮັກສາສະຖຽນລະພາບຂອງພາກພື້ນ. ຈີນຊົມເຊີຍຂໍ້ລິເລີ່ມການຮ່ວມຫຼາຍຝ່າຍ “ຊຽງໃໝ່” ທີ່ຈະສ້າງເຄື່ອງມືດ້ານການເງິນຢ່າງວ່ອງໄວ  ແລະຫວັງວ່າຈະຮ່ວມມືກັບທຸກຝ່າຍໃນການປັບປຸງຕາໜ່າງຄວາມປອດໄພດ້ານການເງິນຂອງພາກພື້ນ ເພື່ອຮັບມືກັບຄວາມປັ່ນປ່ວນດ້ານເສດຖະກິດ ແລະການເງິນສາກົນ. ຈີນໄດ້ປະຕິບັດການບໍລິຈາກເຂົ້າສານໃນປີນີ້ໃຫ້ແກ່ກົນໄກສຳຮອງເຂົ້າສຸກເສີນ10+3 ແລະຍິນດີຊອກຫານະວັດຕະກໍາກົນໄກເພື່ອປັບປຸງຄວາມໝັ້ນຄົງດ້ານສະບຽງອາຫານຂອງພາກພື້ນ.

ສາມ, ເປີດກວ້າງການຮ່ວມມືໃນຂົງເຂດຈະເລີນໃໝ່ ແລະ ນຳພາການພັດທະນາພາກພື້ນ. ຈີນຍິນດີເປີດກວ້າງການຮ່ວມມືກັບທຸກຝ່າຍກ່ຽວກັບການຫັນເປັນດິຈິຕອນ ແລະການຫັນເປັນສີຂຽວ, ປະຕິບັດຖະແຫຼງການກ່ຽວກັບການພັດທະນາລະບົບນິເວດລົດໄຟຟ້າ. ຈີນຈະຈັດກິດຈະກຳຕ່າງໆເຊັ່ນ: ການສົນທະນາໂຕະມົນພະລັງງານສະອາດ10+3 ແລະການສົນທະນາກ່ຽວກັບປຼາສະຕິກທາງທະເລກັບການປ່ຽນແປງຂອງດິນຟ້າອາກາດຢູ່ບັນດາຕົວເມືອງແຄມທະເລອາຊີຕາເວັນອອກແລະອື່ນໆ,  ເພື່ອຊຸກຍູ້ການພັດທະນາເສດຖະກິດກາກບອນຕ່ຳ. ຈີນຍິນດີເສີມຂະຫຍາຍບົດບາດຂອງພັນທະມິດການບໍລິການວິສາຫະກິດຂະໜາດກາງແລະນ້ອຍໃນ10+3 ຕື່ມອີກ.

ສີ່, ຊຸກຍູ້ການພົບປະແລກປ່ຽນວັດທະນະທຳສັງຄົມ ແລະສ້າງຄວາມເຫັນດີເຫັນພ້ອມໃນພາກພື້ນ. ຈີນສະໜັບສະໜູນເສີມຂະຫຍາຍບົດບາດຂອງກົນໄກຮ່ວມມືວຽກງານລັດຖະກອນ10+3 ຕື່ມອີກ, ສະໜັບສະໜູນໂຄງການວິທະຍາເຂດອາຊີ ສືບຕໍ່ລວມເອົານັກສຶກສາຈາກບັນດາປະເທດອາຊຽນ, ຈັດເວທີປາໄສກ່ຽວກັບນະໂຍບາຍຄຸ້ມຄອງຄົນເຂົ້າເມືອງ ແລະຮັບມືກັບຜູ້ສູງອາຍຸ, ຊຸກຍູ້ການແລກປ່ຽນ ແລະ ຮ່ວມມືໃນຂົງເຂດສາທາລະນະສຸກ, ຂໍ້ມູນຂ່າວສານ, ວັດທະນະທຳ, ທ່ອງທ່ຽວ, ຊາວໜຸ່ມ, ແມ່ຍິງ, ວຽກງານແນວຄິດ, ແລະອື່ນໆ, ລວມທັງຮັດແໜ້ນພື້ນຖານສັງຄົມໃຫ້ແກ່ການຮ່ວມມືອາຊີຕາເວັນອອກ.

ບັນດາປະເທດອາຊຽນຕ່າງກໍ່ຍິນດີຕໍ່ກອງປະຊຸມຜູ້ນຳຈີນ-ຍີ່ປຸ່ນ-ສ.ເກົາຫຼີໃນເດືອນພຶດສະພາປີນີ້ຢ່າງສຳເລັດຜົນ, ຊົມເຊີຍຈີນ, ຍີ່ປຸ່ນ ແລະສ.ເກົາຫຼີ ໃຫ້ການສະໜັບສະໜູນດ້ານຄວາມເປັນໃຈກາງຂອງອາຊຽນ ແລະການພັດທະນາແບບຍືນຍົງ, ອາຊຽນຍັງຕີລາຄາສູງຄວາມເປັນເອກະລັກສະເພາະ ແລະໝາກຜົນອັນຈົບງາມຂອງກົນໄກ10+3 ແລະເຫັນດີເປັນເອກະພາບປະຕິບັດ RCEP ໃຫ້ມີຄຸນນະພາບສູງ ແລະການຮັກສາຄວາມໝັ້ນທ່ຽງດ້ານເສດຖະກິດ, ການເງິນ ແລະຕ່ອງໂສ້ການສະໜອງທີ່ສະດວກ, ພ້ອມທັງຫວັງວ່າກົນໄກ10+3 ຈະສືບຕໍ່ສະໜອງການຊ່ວຍເຫຼືອຢ່າງແຂງແຮງ ເພື່ອເພີ່ມທະວີຄວາມຍືນຍົງຂອງພາກພື້ນ ແລະຮັບປະກັນຄວາມໝັ້ນຄົງດ້ານສະບຽງອາຫານ, ຊຸກຍູ້ການເຊື່ອມໂຍງ ແລະບັນລຸການພັດທະນາສີຂຽວ.