ຕອນບ່າຍວັນທີ 27 ກໍລະກົດນີ້, ທ່ານຮານເຈີ້ງ ຮອງປະທານປະເທດຈີນ ທີ່ເປັນຜູ້ຕາງໜ້າພິເສດຂອງທ່ານສີຈິ້ນຜິງ ປະທານປະເທດຈີນ ໄດ້ພົບປະກັບທ່ານໂທມັສ ບາກ ປະທານຄະນະກຳມະການໂອລິມປິກສາກົນຢູ່ນະຄອນຫຼວງປາຣີຂອງຝຣັ່ງ.

ກ່ອນອື່ນ, ທ່ານຮານເຈີ້ງໄດ້ນຳເອົາຄວາມຢື້ຢາມຖາມຂ່າວຢ່າງອົບອຸ່ນຈາກທ່ານສີຈິ້ນຜິງຕໍ່ທ່ານບາກ ແລະ ກ່າວວ່າ: ພິທີໄຂງານກິລາໂອລິມປິກໃນຄັ້ງນີ້ມີຈຸດເດັ່ນຫຼາຍ, ຈີນຂໍສະແດງຄວາມຊົມເຊີຍ. ພາຍໃຕ້ສະພາບການສາກົນໃນປັດຈຸບັນ ຍິ່ງຕ້ອງສົ່ງເສີມຈິດໃຈໂອລິມປິກ, ສະນັ້ນ, ງານກິລາໂອລິມປິກໃນຄັ້ງນີ້ຈຶ່ງມີຄວາມໝາຍເປັນພິເສດ. ຈີນຈະເປັນເຈົ້າພາບຈັດງານກິລາລະດູໜາວອາຊີໃນປີໜ້າ ແລະ ຍິນດີສືບຕໍ່ເປີດກວ້າງ ແລະ ລົງເລິກການຮ່ວມມືແບບມີໄມຕີຈິດມິດຕະພາບໃນລະດັບສູງກັບຄະນະກຳມະການໂອລິມປິກສາກົນ.

ທ່ານໂທມັສ ບາກ ໄດ້ຝາກຄວາມຢື້ຢາມຖາມຂ່າວຢ່າງຈິງໃຈເຖິງທ່ານປະທານສີຈິ້ນຜິງ ແລະ ກ່າວວ່າ: ຈີນໄດ້ສະໜັບສະໜູນພາລະກິດໂອລິມປິກສາກົນຢ່າງສະເໝີຕົ້ນສະເໝີປາຍ ໂດຍໄດ້ຈັດງານກິລາໂອລິມປິກລະດູໜາວປັກກິ່ງ 2022 ຢ່າງສຳເລັດຜົນພາຍໃຕ້ສະພາບຄວາມຫຍຸ້ງຍາກຂອງການແພ່ລະບາດຂອງພະຍາດໂຄວິດ-19 ເຊິ່ງເປັນບົດຮຽນອັນສຳຄັນໃຫ້ແກ່ການຈັດງານກິລາໂອລິມປິກຂອງບັນດາປະເທດໃນໂລກ. ເຊື່ອໝັ້ນວ່າຜົນງານອັນດີເດັ່ນຂອງຄະນະນັກກິລາຂອງຈີນຈະປະກອບສ່ວນອັນສຳຄັນໃຫ້ແກ່ງານກິລາໂອລິມປິກໃນຄັ້ງນີ້.