ວັນທີ 28 ກໍລະກົດນີ້, ໃນເວລາພົບປະທ່ານເຊີເກ ລັຟລົຟ ລັດຖະມົນຕີກະຊວງການຕ່າງປະເທດຣັດເຊຍທີ່ໄປຢ້ຽມຢາມມະເລເຊຍ, ທ່ານອັນວາ ບິນ ອີບຣາຮິມ ນາຍົກລັດຖະມົນຕີມະເລເຊຍກ່າວວ່າ: ມະເລເຊຍຍິນດີເຂົ້າຮ່ວມກົນໄກຮ່ວມມືປະເທດບຣິກສ.

ປີ 2006, ລັດຖະມົນຕີການຕ່າງປະເທດປະເທດບຣິກສໄດ້ຈັດການພົບປະກັນຄັ້ງທຳອິດ, ໄດ້ໄຂສັງກາດແຫ່ງການຮ່ວມມືປະເທດບຣິກສ. ມາຮອດປັດຈຸບັນ, ຜູ້ນຳປະເທດບຣິກສໄດ້ຈັດການພົບປະຢ່າງເປັນທາງການ ແລະ ບໍ່ເປັນທາງການທັງໝົດ 15 ຄັ້ງ. ໃນເດືອນສິງຫາປີ 2023, ກອງປະຊຸມພົບປະຄັ້ງທີ 15 ຂອງຜູ້ນຳປະເທດບຣິກສຈັດຂຶ້ນຢູ່ນະຄອນໂຈຮັນເນັສເບີກປະເທດອາຟຣິກາໃຕ້, ໂດຍໄດ້ຕົກລົງທີ່ຂະຫຍາຍສະມາຊິກຂອງກົນໄກດັ່ງກ່າວ. ວັນທີ 1 ມັງກອນ 2024, ອາຣັບບີ ຊາອຸດິດ ເອຢິບ ສະຫະລັດອາຣັບເອມີເຣດ ອີຣານ ເອທິໂອປີໄດ້ກາຍເປັນສະມາຊິກທາງການຂອງກົນໄກຮ່ວມມືປະເທດບຣິກສ.

ນັບແຕ່ສ້າງຕັ້ງກົນໄກຮ່ວມມືປະເທດບຣິກສເປັນຕົ້ນມາ, ບຣິກສມີພື້ນຖານການຮ່ວມມືທີ່ນັບມື້ນັບໜັກແໜ້ນຍິ່ງຂຶ້ນ, ຂົງເຂດການຮ່ວມມືເປີດກວ້າງອອກເທື່ອລະກ້າວ, ກາຍເປັນກຳລັງສ້າງສັນທີ່ຊຸກຍູ້ການເຕີບໂຕຂອງເສດຖະກິດໂລກ ປັບປຸງການຄຸ້ມຄອງໂລກໃຫ້ສົມບູນຂຶ້ນ ແລະ ຊຸກຍູ້ສາຍພົວພັນສາກົນຫັນເປັນແບບປະຊາທິປະໄຕ.