ຫວ່າງມໍ່ໆມານີ້, ການຮ່ວມກັນສຳຫຼວດແຫຼ່ງແມ່ນ້ຳລ້ານຊ້າງຂອງ 6 ປະເທດແມ່ນ້ຳລ້ານຊ້າງ-ແມ່ນ້ຳຂອງ ໄດ້ເລີ່ມຂຶ້ນຢູ່ແຂວງຊິງໄຮຂອງຈີນ. ຜູ້ແທນຂອງ 5 ປະເທດລຸ່ມແມ່ນ້ຳຂອງໄດ້ແບ່ງປັນປະສົບການ ແລະ ຈຸດຢືນຂອງຕົນ ໃນການສຳຫຼວດຄັ້ງນີ້.

ທ່ານສີວັນນະກອນ ມາລີວານ ຮອງຫົວໜ້າກອງເລຂາທິການໃຫຍ່ຄະນະກຳມາການແມ່ນ້ຳຂອງແຫ່ງຊາດລາວໄດ້ເນັ້ນໜັກເຖິງຄວາມສຳຄັນຂອງໂຄງການເຂື່ອນໄຟຟ້າພະລັງງານນ້ຳຕາມແມ່ນ້ຳລ້ານຊ້າງ. ແຕ່ກ່ອນ, ທ່ານສີວັນນະກອນ ມາລີວານເປັນຜູ້ໜຶ່ງທີ່ເຄີຍມີທ່າທີສົງໄສຕໍ່ຜົນສະທ້ອນຂອງເຂື່ອນໄຟຟ້າພະລັງງານນ້ຳຂອງຈີນທີ່ມີຕໍ່ແມ່ນ້ຳລ້ານຊ້າງ ແລະ ເປັນຫ່ວງວ່າ, ເຮັດແບບນີ້ຈະເຮັດໃຫ້ປະລິມານນ້ຳຂອງແມ່ນ້ຳລ້ານຊ້າງໜ້ອຍລົງ. ແຕ່ວ່າ, ພາຍຫຼັງໄດ້ຮັບຂໍ້ມູນຂ່າວສານຫຼາຍກວ່າເກົ່າໃນການສຳຫຼວດຮ່ວມກັນຄັ້ງນີ້ແລ້ວ, ທ່ານໄດ້ເຊື່ອໝັ້ນວ່າ: ໂຄງການເຫຼົ່ານີ້ສາມາດຊ່ວຍປັບປະລິມານນ້ຳໃຫ້ໄດ້ດີກວ່າເກົ່າ ແລະ ປ້ອງກັນການເກີດໄພນ້ຳຖ້ວມຢູ່ຍ່ານໃຕ້.

ທ່ານຫງວຽນດິງດັດໃນຄະນະກຳມາທິການແມ່ນ້ຳຂອງແຫ່ງຊາດຫວຽດນາມໄດ້ເນັ້ນໜັກເຖິງຜົນປະໂຫຍດທີ່ແທ້ຈິງຂອງເຂື່ອນໄຟຟ້ານ້ຳຕົກຕາມລຳແມ່ນ້ຳລ້ານຊ້າງ-ແມ່ນ້ຳຂອງ ໂດຍກ່າວວ່າ: ປີ 2016, ໄດ້ເກີດປາກົດການເອີນີໂນ ເຊິ່ງເຮັດໃຫ້ຫຼາຍປະເທດລຸ່ມແມ່ນ້ຳຂອງ ລວມທັງຫວຽດນາມ ເກີດໄພແຫ້ງແລ້ງຢ່າງໜັກໜ່ວງ. ເຂື່ອນໄຟຟ້ານ້ຳຕົກຢູ່ຍ່ານເໜືອແມ່ນ້ຳລ້ານຊ້າງຂອງຈີນກໍໄດ້ປ່ອຍນ້ຳລົງມາໃນຍາມເກີດໄພແຫ້ງແລ້ງ ເຊິ່ງໄດ້ຫຼຸດຜ່ອນຜົນເສຍຫາຍຈາກໄພດັ່ງກ່າວໃຫ້ໜ້ອຍລົງຢ່າງຫຼວງຫຼາຍ.

ແມ່ນ້ຳລ້ານຊ້າງ-ແມ່ນ້ຳຂອງເປັນແມ່ນ້ຳສຳຄັນທີ່ໄຫຼຜ່ານຈີນ, ມຽນມາ, ລາວ, ໄທ, ກຳປູເຈຍ ແລະ ຫວຽດນາມ. ໃນຊຸມປີຜ່ານມາ, ຈີນໄດ້ແບ່ງປັນຂໍ້ມູນນ້ຳຕະຫຼອດປີຂອງແມ່ນ້ຳລ້ານຊ້າງໃຫ້ບັນດາປະເທດທີ່ຕັ້ງຢູ່ລຽບຕາມລຳແມ່ນ້ຳຂອງ, ທັງໄດ້ເສີມຂະຫຍາຍບົດບາດ “ການປັບປະລິມານນ້ຳ” ຂອງລະບົບຊົນລະປະທານຢູ່ຍ່ານເໜືອ ເພື່ອຮ່ວມກັນກັບປະເທດຕ່າງໆຕ້ານໄພແຫ້ລແລ້ງ-ໄພນ້ຳຖ້ວມ. ນອກນີ້, ຍັງໄດ້ດຳເນີນໂຄງການຕ່າງໆ ເຊັ່ນ: “ແຜນການສ້າງຜົນປະໂຫຍດໃຫ້ແກ່ປະຊາຊົນດ້ວຍນ້ຳຈາກແມ່ນ້ຳລ້ານຊ້າງ-ແມ່ນ້ຳຂອງ” “ແຜນດຳເນີນງານບໍ່ນ້ຳຈາກແມ່ນ້ຳລ້ານຊ້າງ-ແມ່ນ້ຳຂອງ”, “ການກວດກາຄວາມປອດໄພຂອງເຂື່ອນໄຟຟ້າ” ແລະອື່ນໆ ເພື່ອເພີ່ມຄວາມຜາສຸກໃຫ້ແກ່ປະຊາຊົນໃນພາກພື້ນແຫ່ງນີ້.

ນອກນີ້, 6 ປະເທດຍັງໄດ້ສ້າງກົນໄກທີ່ກ່ຽວຂ້ອງ ໂດຍປິ່ນອ້ອມການຮ່ວມມືດ້ານຊັບພະຍາກອນນ້ຳ ເຊັ່ນ: ຈັດກອງປະຊຸມຂັ້ນລັດຖະມົນຕີວ່າດ້ວຍການຮ່ວມມືຊັບພະຍາກອນນ້ຳຕາມແມ່ນ້ຳລ້ານຊ້າງ-ແມ່ນ້ຳຂອງ, ສ້າງຕັ້ງສູນຮ່ວມມືຊັບພະຍາກອນນ້ຳຕາມແມ່ນ້ຳລ້ານຊ້າງ-ແມ່ນ້ຳຂອງ ແລະອື່ນໆ ເຊິ່ງໄດ້ເສີມຂະຫຍາຍບົດບາດສຳຄັນ ໃນການຊຸກຍູ້ການແບ່ງປັນຂໍ້ມູນຂ່າວສານ, ຄວາມຮູ້, ບົດຮຽນ ແລະ ເຕັກນິກໃນຂົງເຂດຊັບພະຍາກອນນ້ຳລະຫວ່າງ 6 ປະເທດຢ່າງຮອບດ້ານ ເຊັ່ນ: ການສຳຫຼວດໄລຍະໄກຜ່ານດາວທຽມ, ການຕິດຕາມດ້ວຍຖານຂໍ້ມູນມະຫາສານ ແລະ ວິທີອື່ນໆໄດ້ເປັນເຄື່ອງມືທີ່ສຳຄັນໃນການຮ່ວມກັນຄຸ້ມຄອງຊັບພະຍາກອນນ້ຳຕາມຫຼັກວິທະຍາສາດ. ຜ່ານການຮ່ວມມືຢ່າງໃກ້ຊິດມາເປັນເວລາຫຼາຍປີ, ກົນໄກການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຍັງໄດ້ໃຫ້ການອົບຮົມຜູ້ຊ່ຽວຊານດ້ານຊົນລະປະທານໃຫ້ແກ່ 6 ປະເທດເປັນຈຳນວນຫຼວງຫຼາຍ ແລະ ຜ່ານຈາກການສຶກສາອົບຮົມນັກຮຽນນັກສຶກສາລຸ້ນໃໝ່ ເພື່ອສ້າງໃຫ້ພວກເຂົາເຈົ້າໄດ້ມີຄວາມຮູ້ຄວາມສາມາດດ້ານຊົນລະປະທານ.

ແນ່ນອນແລ້ວວ່າ, ການຮ່ວມມືດ້ານຊັບພະຍາກອນນ້ຳຕາມແມ່ນ້ຳລ້ານຊ້າງ-ແມ່ນ້ຳຂອງກໍໄດ້ປະເຊີນກັບສິ່ງທ້າທາຍຕ່າງໆນາໆ. ໂດຍປະເຊີນໜ້າກັບອາກາດທົ່ວໂລກຮ້ອນຂຶ້ນ ແລະ ໄພແຫ້ງແລ້ງ-ໄພນ້ຳຖ້ວມທີ່ເກີດຂຶ້ນເລື້ອຍໆ, ປະເທດຕ່າງໆຕ້ອງເພີ່ມທະວີການຮ່ວມມືກັນ ເພື່ອປ້ອງກັນ ແລະ ຫຼຸດຜ່ອນໄພພິບັດ ພ້ອມທັງການສ້າງສາຄືນໃໝ່ຫຼັງເກີດໄພພິບັດ. ນອກນີ້, ການຮ່ວມມືດ້ານຊັບພະຍາກອນນ້ຳຕາມແມ່ນ້ຳລ້ານຊ້າງ-ແມ່ນ້ຳຂອງ ກໍຖືກອິດທິກຳລັງພາຍນອກເຂົ້າມາລົບກວນ ແລະ ປຸກປັ່ນເລື່ອງຂຶ້ນຢູ່ເລື້ອຍໆ ເພື່ອຍຸແຍ່ແບ່ງແຍກການພົວພັນລະຫວ່າງບັນດາປະເທດໃນພາກພື້ນນີ້ ແລະ ທຳລາຍບັນຍາກາດແຫ່ງການຮ່ວມມືລະຫວ່າງປະເທດແມ່ນ້ຳລ້ານຊ້າງ-ແມ່ນ້ຳຂອງ ໂດຍຜ່ານຈາກການປັ້ນແຕ່ງຫົວຂໍ້ຕ່າງໆກ່ຽວກັບຊັບພະຍາກອນນ້ຳຂຶ້ນມາ, ແຕ່ 6 ປະເທດໃນພາກພື້ນໄດ້ເປິກສາຫາລືກັນ, ເຂົ້າໃຈເຊິ່ງກັນແລະກັນ ແລະ ຮັບມືຢ່າງສົມເຫດສົມຜົນ, ຄວາມໄວ້ເນື້ອເຊື່ອໃຈກັນ ແລະ ການຮ່ວມມືກັນລະຫວ່າງ 6 ປະເທດກໍໄດ້ນັບມື້ນັບໝັ້ນຄົງຂະໜົງແກ່ນ.

ສະຫຼຸບແລ້ວວ່າ, ພາຍໃຕ້ການຊຸກຍູ້ຢ່າງຕັ້ງໜ້າຈາກ 6 ປະເທດແມ່ນ້ຳລ້ານຊ້າງ-ແມ່ນ້ຳຂອງ, ການຮ່ວມມືດ້ານຊັບພະຍາກອນນ້ຳໄດ້ພັດທະນາດ້ວຍຄຸນນະພາບສູງ ແລະ ປະສົບຜົນສຳເລັດອັນອຸດົມສົມບູນ ເຊິ່ງໄດ້ຮັບການຕີລາຄາຢ່າງສູງຈາກຜູ້ນຳ ແລະ ລັດຖະມົນຕີກະຊວງການຕ່າງປະເທດຂອງ 6 ປະເທດ ໃນກອງປະຊຸມສຸດຍອດວ່າດ້ວຍການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ແລະ ກອງປະຊຸມລັດຖະມົນຕີການຕ່າງປະເທດວ່າດ້ວຍການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ, ການຮ່ວມມືດ້ານຊັບພະຍາກອນນ້ຳໄດ້ກາຍເປັນເນື້ອໃນສຳຄັນ ແລະ ຂົງເຂດໃຈກາງແຫ່ງການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ. ເຂດລ້ອງແມ່ນ້ຳລ້ານຊ້າງ-ແມ່ນ້ຳຂອງໄດ້ກາຍເປັນໜຶ່ງໃນອະນຸພາກພື້ນທີ່ມີຄວາມສາມາດບົ່ມຊ້ອນດ້ານການພັດທະນາເສດຖະກິດທີ່ໃຫຍ່ທີ່ສຸດໃນໂລກໃນປັດຈຸບັນ, ການຮ່ວມມືດ້ານຊັບພະຍາກອນນ້ຳຈະເສີມຂະຫຍາຍບົດບາດລັກສະນະພື້ນຖານທີ່ເປັນຂໍກະແຈໃນດ້ານການປັບຕົວເຂົ້າໃນສະພາບການປ່ຽນແປງດິນຟ້າອາກາດ, ການປ້ອງກັນແລະຄວບຄຸມໄພນ້ຳຖ້ວມແລະໄພແຫ້ງແລ້ງ, ຄວາມປອດໄພດ້ານທັນຍາຫານ, ຄວາມປອດໄພດ້ານພະລັງງານ, ຄວາມປອດໄພດ້ານການສະໜອງນ້ຳ, ການອະນຸລັກລະບົບນິເວດ, ການຄ້ຳປະກັນການພັດທະນາແບບຍືນຍົງດ້ານເສດຖະກິດສັງຄົມ ແລະ ການຮັບໃຊ້ຊີວິດການເປັນຢູ່ຂອງປະຊາຊົນໃນພາກພື້ນແມ່ນ້ຳລ້ານຊ້າງ-ແມ້ນ້ຳຂອງ ເຊິ່ງຈະເພີ່ມພະລັງຂັບເຄື່ອນທີ່ບໍ່ເຫືອດແຫ້ງໃຫ້ແກ່ການພັດທະນາເສດຖະກິດສັງຄົມຂອງບັນດາປະເທດແມ່ນ້ຳລ້ານຊ້າງ-ແມ່ນ້ຳຂອງ.