ນັບແຕ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 18 ຂອງພັກກອມມູນິດຈີນ ເມື່ອປີ 2012 ເປັນຕົ້ນມາ, ທ່ານສີຈິ້ນຜິງ ເລຂາທິການໃຫຍ່ ຄະນະກຳມະການ ສູນກາງພັກກອມມູນິດຈີນໄດ້ກ່າວ ຄຳປາໄສສຳຄັນ ແລະ ຂຽນບົດຄວາມສຳຄັນ ຕ່າງໆ ເຊິ່ງມີເອກະລັກທີ່ໂດດເດັ່ນ, ມີທັດສະນະຄະຕິອັນເລິກແລບ ແລະ ມີເນື້ອໃນອັນເລິກເຊິ່ງ, ຖືປະຫວັດສາດ ເປັນແວ່ນແຍງ, ສ່ອງເຫັນສະພາບຄວາມ ເປັນຈິງໃນປັດຈຸບັນແລະຈ້ອງມອງ ເບິ່ງອະນາຄົດ, ເຊິ່ງໄດ້ສ່ອງແສງໃຫ້ເຫັນເຖິງ ສັດຈະທຳຂອງລັດທິມາກ. ຄຳປາໄສ ແລະ ບົດຄວາມສຳຄັນເຫຼົ່ານີ້ລ້ວນແຕ່ເຕັມໄປດ້ວຍພາສາທີ່ມີມົນ ສະເໜ່ ເຊິ່ງໄດ້ສ່ອງແສງໃຫ້ເຫັນຢ່າງແທ້ຈິງເຖິງແນວຄິດການ ບໍລິຫານປະເທດ ຂອງທ່ານສີຈິ້ນຜິງ, ທັງເປັນການສ່ອງແສງໃຫ້ເຫັນຢ່າງມີຊີວິຊີວາເຖິງມົນສະເໜ່ ທາງບຸກຄະລິກກະພາບ.ຕໍ່ໄປພວກເຮົາຈະພາທ່ານ ໄປສຳຜັດກັບ ມົນສະເໜ່ດ້ານສັບສຳນວນຂອງ ທ່ານສີຈິ້ນຜິງຜ່ານຈາກແງ່ມູມ ຕ່າງໆ ເພື່ອຮັບຮູ້ທັດສະນະຂອງທ່ານສີຈິ້ນຜິງໃນການປົກປັກຮັກສາປ່າໂກງກາງ.

ປ່າໂກງກາງເປັນກຸ່ມພືດທີ່ມີສະເພາະແຕ່ຢູ່ແຄມຝັ່ງທະເລເຂດຮ້ອນ ແລະພື້ນທີ່ເຄິ່ງເຂດຮ້ອນເທົ່ານັ້ນ. ໃນໄລຍະເບື້ອງຕົ້ນທີ່ສປຈີນສະຖາປະນາຂຶ້ນ, ເນື້ອທີ່ປ່າໂກງກາງຂອງຈີນມີປະມານ 50.000 ເຮັກຕາ. ແຕ່ວ່າ ໄປຄຽງຄູ່ກັບການສ້າງສາພັດທະນາເຂດແຄມຝັ່ງທະເລ, ໄລຍະຜ່ານມາ, ເນື້ອທີ່ປ່າໂກງກາງໄດ້ຫຼຸດລົງຢ່າງຫຼວງຫຼາຍເຫຼືອພຽງ 22.000 ເຮັກຕາເທົ່ານັ້ນ.

ປ່າໂກງກາງຢູ່ນະຄອນເຊ້ຍເມີນໃນປັດຈຸບັນ

ໃນຊຸມປີ1980, ຕອນເຮັດວຽກຢູ່ນະຄອນເຊ້ຍເມີນ ແຂວງຟູຈ້ຽນ, ທ່ານສີຈິ້ນຜິງໄດ້ຊຸກຍູ້ການປົກປັກຮັກສາ ແລະ ຟື້ນຟູການປູກຕົ້ນໂກງກາງໃຫ້ເປັນປ່າ. ຫຼັງຈາກດຳລົງຕຳແໜ່ງເປັນເລຂາທິການໃຫຍ່ຄະນະກຳມະການສູນກາງພັກຄອມມູນິດຈີນນັບແຕ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ18ຂອງພັກຄອມມູນິດຈີນເມື່ອປີ2012ເປັນຕົ້ນມາ, ເພິ່ນໄດ້ມີຄຳຊີ້ນຳລະອຽດ ແລະ ສະເໜີຂໍ້ຮຽກຮ້ອງຢ່າງຈະແຈ້ງຫຼາຍເທື່ອຕໍ່ກັບວຽກງານປົກປັກຮັກສາປ່າໂກງກາງ.

ປ່າໂກງກາງນະຄອນຈ້ານຈ່ຽງ

ເຂດສະຫງວນທຳມະຊາດປ່າໂກງກາງລະດັບຊາດຈ້ານຈ່ຽງແຂວງກວາງຕຸ້ງເປັນເຂດສະຫງວນທຳມະຊາດທີ່ມີປ່າໂກງກາງກວມເນື້ອທີ່ຫຼາຍທີ່ສຸດຂອງຈີນ. ເດືອນເມສາປີ2023, ທ່ານສີຈິ້ນຜິງໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ເຂດປ່າໂກງກາງເກາະຈິ່ນນິວຕາແສງຫູກວ່າງເມືອງມ໋າຈ່າງ ທາງພາກຕາເວັນອອກຂອງເຂດສະຫງວຽນທຳມະຊາດແຫ່ງນີ້, ເພິ່ນໄດ້ເນັ້ນໜັກວ່າ: ປ່າໂກງກາງຜືນນີ້ເປັນສິ່ງປະເສີດຂອງຊາດ,ຕ້ອງປົກປັກຮັກສາໃຫ້ດີປານກັບຮັກສາດວງຕາຂອງຕົນ.

ຄຳວ່າ “ສິ່ງປະເສີດຂອງຊາດ” ໄດ້ເນັ້ນໜັກເຖິງຄຸນຄ່າທີ່ບໍ່ສາມາດຄາດຄະເນໄດ້ ກໍຄື  ຖານະບົດບາດອັນສຳຄັນຂອງປ່າໂກງກາງໃນການພັດທະນາແຫ່ງຊາດ. ສ່ວນຄຳວ່າ “ປົກປັກຮັກສາໃຫ້ດີປານກັບຮັກສາດວງຕາຂອງຕົນ” ໄດ້ເນັ້ນໜັກຄືນເຖິງຄວາມເລັ່ງດ່ວນ ແລຄວາມສຳຄັນຂອງການປົກປັກຮັກສາປ່າໂກງກາງ.

ຄຳວ່າ “ປ່າໂກງກາງ” ໃນພາສາຈີນ ແມ່ນ ປ່າໄມ້ແດງ. ເມື່ອເບິ່ງຈາກຮູບນອກແລ້ວເຫັນວ່າ: ຕົວຈິງແລ້ວ ປ່າໂກງກາງແມ່ນເປັນສີຂຽວ. ຄົນຈີນເອີ້ນປ່າໂກງກາງເປັນປ່າໄມ້ແດງ ກໍເປັນຍ້ອນວ່າ ພືດເຫຼົ່ານີ້ຖືກນ້ຳທະເລໜູນຂຶ້ນເປັນລັກສະນະຮອບວຽນ, ຈຶ່ງອຸດົມສົມບູນໄປດ້ວຍທາດຕານນິກອາຊິດ (Tannicacid). ເມື່ອໃດທີ່ເປືອກໄມ້ຖືກຂຸຫຼົ່ນອອກ, ລຳຕົ້ນທີ່ມີທາດຕານນິກອາຊິດໄດ້ຕາກຢູ່ກາງອາກາດ,ປະສົມເຂົ້າກັບອົກຊີແຊນຈຶ່ງກາຍເປັນສີແດງ.

ປ່າໂກງກາງບໍ່ແມ່ນປ່າທີ່ມີຕົ້ນໄມ້ພຽງຊະນິດດຽວເທົ່ານັ້ນ, ຫາກແມ່ນກວມເຖິງພືດຊະນິດຕ່າງໆເຊັ່ນ: ຟຸ່ມໄມ້ຕ່ຳ, ຕົ້ນໄມ້ໃຫຍ່ສູງ, ຫຍ້າ ແລະ ຫວາຍເປັນຕົ້ນ. ລະບົບຮາກເຫງົ້າຂອງພືດເຫຼົ່ານີ້ມີຄວາມດົກໜາແລະໜຽວແໜ້ນດີ ສາມາດຈັບຕົວໃຫ້ໝັ້ນຄົງຢູ່ໃນດິນຕົມ. ເມື່ອເກີດໄພທຳມະຊາດຕ່າງໆເຊັ່ນ: ຄື້ນຊືນະມິ, ລົມພາຍຸ ແລະອື່ນໆ, ປ່າໂກງກາງແມ່ນສາມາດເສີມຂະຫຍາຍບົດບາດສຳຄັນ ເປັນ “ຜູ້ປົກປ້ອງຝັ່ງທະເລ” ໄດ້.

ຕົວຢ່າງ: ປີ2014, ລົມພາຍຸຮຸນແຮງ “ຣາມມະສູນ” ໄດ້ພັດທະຫຼົ່ມເຂດຝັ່ງທະເລແຂວງກວາງຕຸ້ງຈີນ. ເມື່ອທຽບໃສ່ເຂດແຄວ້ນອື່ນໆ ທີ່ໄດ້ຮັບຜົນເສຍຫາຍຢ່າງໜັກໜ່ວງແລ້ວ, ຄັນຄູປ້ອງກັນບ້ານຈິ່ນຈີ່, ບ້ານເຈ່ຍຜິງ, ບ້ານຕົ່ງສົ່ງຕາວ ແລະ ບ້ານອື່ນໆທີ່ມີປ່າໂກງກາງຂອງເມືອງສວີເວີນນະຄອນຈ້ານຈ່ຽງແມ່ນໄດ້ຮັບຜົນເສຍຫາຍອ່າວໜ້ອຍຢ່າງຊັດເຈນ. ຕອນນັ້ນ, ໜັງສືພິມຈ້ານຈ່ຽງລາຍວັນຍັງໄດ້ລົງບົດຄວາມທີ່ພາດຫົວຂໍ້ວ່າ: “ສະກັດຕີຖອຍ ‘ຣາມມະສູນ’ ເປັນຍ້ອນມີເຈົ້າ ”  ທີ່ນີ້ ຄຳວ່າ “ເຈົ້າ” ກໍແມ່ນໝາຍເຖິງ ປ່າໂກງກາງ ນັ້ນເອງ.

ຊັບພະຍາກອນປ່າໂກງກາງຢູ່ແຜ່ນດິນໃຫຍ່ຂອງຈີນຕົ້ນຕໍແມ່ນແຈກຢາຍຢູ່ 5 ເຂດແຂວງຄື ແຂວງກວາງຕຸ້ງ, ເຂດປົກຄອງຕົນເອງເຜົ່າຈ້ວງກວາງຊີ, ແຂວງໄຫຫຼຳ, ແຂວງຟູຈ້ຽນ ແລະ ແຂວງເຈີ້ຈ່ຽງ, ໃນນີ້, ເນື້ອທີ່ປ່າໂກງກາງຂອງນະຄອນຈ້ານຈ່ຽງແຂວງກວາງຕຸ້ງແມ່ນກວມ33%ຂອງເນື້ອທີ່ປ່າໂກງກາງທັງໝົດໃນທົ່ວປະເທດຈີນ.

ປີ2023, ທ່ານສີຈິ້ນຜິງລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ເຂດສະຫງວນທຳມະຊາດປ່າໂກງກາງລະດັບຊາດຈ້ານຈ່ຽງແຂວງກວາງຕຸ້ງ

ປີ2023, ໃນເວລາລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ເຂດສະຫງວນທຳມະຊາດປ່າໂກງກາງລະດັບຊາດຈ້ານຈ່ຽງແຂວງກວາງຕຸ້ງ, ທ່ານສີຈິ້ນຜິງໄດ້ຊີ້ນຳເປັນພິເສດວ່າ: “ການຜະລິດ ແລະ ປະຊາກອນຢູ່ເຂດແຄມຝັ່ງທະເລແມ່ນມີຄວາມໜາແໜ້ນທີ່ສຸດ ຂະນະດຽວກັນ, ຍັງມີຜົນກະທົບອ່າວຫຼາຍຕໍ່ສິ່ງແວດລ້ອມທຳມະຊາດນຳອີກ, ສະນັ້ນ, ຕ້ອງໃຫ້ຄວາມສຳຄັນຢ່າງແທ້ຈິງ, ນຳໃຊ້ມາດຕະການທີ່ມີປະສິດທິຜົນຢ່າງແທ້ຈິງເພື່ອເພີ່ມທະວີການປົກປັກຮັກສາ.”

ຕົ້ນປີ2024, ນະຄອນຈ້ານຈ່ຽງໄດ້ວາງກົດລະບຽບວ່າດ້ວຍການປົກປັກຮັກສາດິນບໍລິເວນນ້ຳປ່າໂກງກາງນະຄອນຈ້ານຈ່ຽງ, ເຊິ່ງເປັນກົດລະບຽບທ້ອງຖິ່ນທີ່ແນໃສ່ປົກປັກຮັກສາດິນບໍລິເວນນ້ຳປ່າໂກງກາງສະບັບທຳອິດຂອງແຂວງກວາງຕຸ້ງ. ນອກນີ້, ເພື່ອດຳເນີນວຽກງານປົກປັກຮັກສາປ່າໂກງກາງໃຫ້ດີຢ່າງໜັກແໜ້ນ, ນະຄອນຈ້ານຈ່ຽງໄດ້ນຳໃຊ້ມາດຕະການຄຸ້ມຄອງ ແລະ ປົກປັກຮັກສາແບບປະດິດສ້າງຕ່າງໆເຊັ່ນ: ການສຳຫຼວດໄລຍະໄກຜ່ານດາວທຽມ, ການລາດຕະເວນປົກປັກຮັກສາດ້ວຍເຮືອບິນແບບບໍ່ມີຄົນຂັບ ຫຼື ໂດຣນ ເປັນຕົ້ນ, ເຊິ່ງໄດ້ເຮັດໃຫ້ການປົກປັກຮັກສາປ່າໂກງກາງມີຄວາມຖືກເປົ້າໝາຍຫຼາຍຂຶ້ນຕື່ມອີກ.

ປ່າໂກງກາງບໍ່ພຽງແຕ່ເປັນປ່າໄມ້ເທົ່ານັ້ນ ຫາກຍັງເປັນດິນບໍລິເວນນ້ຳອີກດ້ວຍ, ນອກຈາກເສີມຂະຫຍາຍບົດບາດສຳຄັນເປັນ “ຜູ້ປົກປ້ອງຝັ່ງທະເລ” ແລ້ວ, ຍັງມີບົດບາດສຳຄັນໃນການດັດສົມລະບົບນິເວດນຳອີກ ແລະເຮັດໃຫ້ຊີວະນານາພັນມີຄວາມອຸດົມສົມບູນ.

ອີງຕາມຂໍ້ມູນສະຖິຕິສະແດງໃຫ້ເຫັນວ່າ: ປັດຈຸບັນ, ສີ່ງມີຊີວີດຈຳນວນ 341 ຊະນິດຢູ່ໃນທົ່ວໂລກທີ່ພວມຖືກໄພຄຸກຄາມຕໍ່ການຄົງຕົວນັ້ນແມ່ນຖືເອົາປ່າໂກງກາງເປັນບ່ອນເພິ່ງພາອາໄສຕົ້ນຕໍ. ເຖິງວ່າ ປ່າໂກງກາງກວມເນື້ອທີ່ປ່າເຂດຮ້ອນໃນທົ່ວໂລກພຽງແຕ່ 0,7% ເທົ່ານັ້ນ, ແຕ່ຊ້ຳພັດສະໜອງອາຫານໃຫ້ແກ່ສິ່ງທີ່ມີຊີວິດໃນທະເລກວມເຄິ່ງໜຶ່ງຂອງລະບົບນິເວດຢູ່ແຄມຝັ່ງທະເລທົ່ວໂລກ.

ໄລຍະຊຸມປີຜ່ານມາ, ຈີນໄດ້ເພີ່ມທະວີການປົກປັກຮັກສາປ່າໂກງກາງຢ່າງບໍ່ຢຸດຢັ້ງ. ຕົວຢ່າງ: ຈີນໄດ້ວາງແຜນແມ່ບົດສະເພາະກິດວ່າດ້ວຍການປົກປັກຮັກສາ ແລະ ຟື້ນຟູປ່າໂກງກາງ(2020-2025) ເຊິ່ງໄດ້ວາງແຜນຢ່າງເປັນລະບົບກ່ຽວກັບການປົກປັກຮັກສາໂດຍລວມ ແລະ ຟື້ນຟູສິ່ງແວດລ້ອມທຳມະຊາດຂອງປ່າໂກງກາງ ກໍຄືລະບົບກົດໝາຍ ແລະ ລະບຽບການທີ່ກ່ຽວຂ້ອງ. ທຸກມື້ນີ້, ເນື້ອທີ່ປ່າໂກງກາງຂອງຈີນໄດ້ບັນລຸເຖິງ 27.000 ເຮັກຕາ, ເພີ່ມຂຶ້ນ 5.000 ເຮັກຕາເມື່ອທຽບໃສ່ຕົ້ນສະຕະວັດນີ້. ຈີນຍັງໄດ້ກາຍເປັນໜຶ່ງໃນຈຳນວນພຽງບໍ່ພໍເທົ່າໃດປະເທດຢູ່ໃນໂລກເທົ່ານັ້ນທີ່ມີເນື້ອທີ່ປ່າໂກງກາງເພີ່ມຂຶ້ນ. ຂະນະທີ່ ອັດຕາສ່ວນ ປ່າໂກງກາງຖືກຈັດເຂົ້າໃນຂອບເຂດອະນຸລັກທຳມະຊາດ ແມ່ນສູງກວ່າລະດັບສະເລ່ຍຂອງໂລກຢ່າງຫຼວງຫຼາຍ.

ໃນຍຸກໃໝ່, ຄົນກັບທຳມະຊາດຢູ່ຮ່ວມກັນຢ່າງກົມກຽວ ໄດ້ກາຍເປັນຄວາມຮັບຮູ້ຮ່ວມຂອງທົ່ວສັງຄົມຈີນແລ້ວ. ພາຍໃຕ້ການຊີ້ນຳນຳພາຈາກແນວຄິດການພັດທະນາແບບ “ພູຂຽວນ້ຳໃສກໍແມ່ນພູເງິນພູຄຳ”, ຖານະບົດບາດຂອງປ່າໂກງກາງທີ່ເປັນສິ່ງປະເສີດຂອງຊາດນັບມື້ນັບພົ້ນເດັ່ນຂຶ້ນ.

ປ່າໂກງກາງຟູຖຽນນະຄອນເຊິ່ນເຈີ້ນ

ຢູ່ນະຄອນເຊ້ຍເມີນແຂວງຟູຈ້ຽນ, ການຟື້ນຟູສິ່ງແວດລ້ອມທຳມະຊາດປ່າໂກງກາງຢູ່ລຽບຕາມແຄມຝັ່ງທະເລຕາເວັນອອກໄດ້ຊຸກຍູ້ໃຫ້ຄຸນນະພາບດ້ານສະພາບແວດລ້ອມທີ່ຢູ່ອາໄສຂອງປະຊາຊົນຢູ່ເຂດບໍລິເວນອ້ອມຂ້າງໄດ້ຮັບການປັບປຸງໃຫ້ດີຂຶ້ນ; ຢູ່ນະຄອນເປີຍໄຫເຂດປົກຄອງຕົນເອງເຜົ່າຈ້ວງກວາງຊີ, ມີທິວທັດທຳມະຊາດອັນສວຍງາມແບບນ້ຳໃສຫາດຊາຍສະອາດ, ຝູງນົກຍາງບິນເວີ່ນໄປມາຢ່າງເສລີ. ຢູ່ຕາມປ່າໂກງກາງ, “ການເຜີຍແຜ່ຄວາມຮູ້ວິທະຍາສາດດ້ານສິ່ງແວດລ້ອມທຳມະຊາດ + ການທ່ອງທ່ຽວແບບພັກຜ່ອນຢ່ອນອາລົມ” ຕາມປ່າໂກງກາງໄດ້ກາຍເປັນສັນຍາລັກອັນໃໝ່ຂອງການພັດທະນາທ້ອງຖິ່ນແຫ່ງນີ້; ຢູ່ເມືອງຟູຖຽນ ນະຄອນເຊີ່ນເຈີ້ນ, ການປະມູນຂາຍສິດປ່ອຍກາກບອນຜ່ານການປົກປັກຮັກສາປ່າໂກງກາງລາຍທຳອິດໃນທົ່ວປະເທດຈີນສາມາດປະມູນຂາຍໄດ້ໃນລາຄາເຖິງ 485 ຢວນຕໍ່ໂຕນ ເຊິ່ງໄດ້ສ້າງສະຖິຕິລາຄາສູງສຸດໃນຕະຫຼາດຊືຶ້ຂາຍສິດປ່ອຍກາກບອນໃນທົ່ວປະເທດຈີນ… ສາມາດເວົ້າໄດ້ວ່າ: ການປົກປັກຮັກສາປ່າໂກງກາງໃຫ້ດີປານຮັກສາດວງຕາຂອງຕົນ, ຈຸດປະສົງບໍ່ພຽງແຕ່ເພື່ອຮັກສາສິ່ງກຳບັງດ້ານຄວາມປອດໄພຂອງເຂດແຄມຝັ່ງທະເລ ແລະ ລະບົບໃຫຍ່ແຫ່ງການຢູ່ຮ່ວມກັນຢ່າງກົມກຽວລະຫວ່າງຄົນກັບທຳມະຊາດເທົ່ານັ້ນ, ຫາກຍັງເປັນການຮັກສາຈຸດເຕີບໂຕດ້ານຊີວິດການເປັນຢູ່ທີ່ມີຄວາມສຸກຂອງປະຊາຊົນນຳອີກ.

ປ່າໂກງກາງນະຄອນເປີຍໄຫ