ວັນທີ 30 ກໍລະກົດນີ້, ຢູ່ນະຄອນຫຼວງເລີແກປະເທດເອຢິບ, ທ່ານອາເມັດ ອາບູນ ເກັດ ເລຂາທິການໃຫຍ່ສັນນິບາດປະເທດອາຣັບ ໄດ້ພົບປະກັບທ່ານເຊິ້ນໄຫຊົງ ຮອງຫົວໜ້າຄະນະໂຄສະນາອົບຮົມສູນກາງພັກກອມມູນິດຈີນ, ຜູ້ອຳນວຍການໃຫຍ່ວິທະຍຸໂທລະພາບສູນກາງຈີນ ຫຼື CMG. ສອງຝ່າຍໄດ້ລົງເລິກແລກປ່ຽນຄວາມເຫັນ ກ່ຽວກັບວັດທະນະທຳ, ກິລາ, ການຮ່ວມມືດ້ານສື່ມວນຊົນ, ການໄປມາຫາສູ່ກັນດ້ານບຸກຄະລາກອນ ແລະອື່ນໆ ພ້ອມທັງໄດ້ເຊັນບົດບັນທຶກຄວາມເຂົ້າໃຈວ່າດ້ວຍການຮ່ວມມື.

ອີງຕາມບົດບັນທຶກຄວາມເຂົ້າໃຈສະບັບນີ້, ສອງຝ່າຍຈະດຳເນີນການຮ່ວມມືໃນດ້ານການສ້າງ, ແລກປ່ຽນ ແລະ ຫັນເປັນແບບດີຈີຕອນຂອງສຳເນົາເອກະສານ, ການຮ່ວມກັນຖ່າຍທຳເນື້ອໃນຂອງສື່ມວນຊົນ, ການຄົ້ນຄວ້າປະດິດສ້າງໃໝ່ດ້ານເຕັກນິກສື່ມວນຊົນ ແລະ ການຢ້ຽມຢາມແລະແລກປ່ຽນດ້ານບຸກຄະລາກອນເປັນຕົ້ນ. ໃນຂະນະດຽວກັນ, ສອງຝ່າຍຈະຖືເອົາໂອກາດວັນສ້າງຕັ້ງເວທີເປິກສາຫາລືການຮ່ວມມືຈີນ-ອາຣັບຄົບຮອບ 20 ປີ, ຮ່ວມກັນຖ່າຍທຳສາລະຄະດີ ເພື່ອບັນທຶກຜົນງານການຮ່ວມມືໃນອະດີດ ແລະ ຈ້ອງມອງການພັດທະນາໃນອະນາຄົດ.

ມື້ດຽວກັນ, ທ່ານອາເມັດ ອາບູນ ເກັດ ຍັງໄດ້ມອບໃບຢັ້ງຢືນ “ທູດມິດຕະພາບຈີນ-ອາຣັບ” ໃຫ້ແກ່ CMG ເພື່ອຍ້ອງຍໍສັນລະເສີນ CMG ທີ່ໄດ້ທຳຄວາມພະຍາຍາມເພື່ອຊຸກຍູ້ມິດຕະພາບຈີນ-ອາຣັບ.