ຕອນບ່າຍວັນທີ 31 ກໍລະກົດແລ້ວນີ້, ໂດຍຕອບສະໜອງຕາມຄຳຮຽກຮ້ອງຂອງອີຣານ ຈີນ ອານເຊຣີ ແລະ ຣັດເຊຍ, ສະພາຄວາມໝັ້ນຄົງອົງການສະຫະປະຊາຊາດໄດ້ຈັດກອງປະຊຸມສຸກເສີນກ່ຽວກັບເຫດການທີ່ທ່ານອິສມາອິວ ຮານີເຢ ຜູ້ນຳກຸ່ມຮາມາສຖືກລອບສັງຫານ. ທ່ານຟູ້ຊົ່ງ ຜູ້ຕາງໜ້າຖາວອນຂອງຈີນປະຈຳອົງການສະຫະປະຊາຊາດໄດ້ປະກອບຄຳເຫັນໃນກອງປະຊຸມດັ່ງກ່າວວ່າ, ຈີນເດັດດ່ຽວຄັດຄ້ານ ແລະ ກ່າວປະນາມການລອບສັງຫານທ່ານຮານີເຢ, ເຊິ່ງເປັນການທຳລາຍຄວາມພະຍາຍາມເພື່ອບັນລຸສັນຕິພາບນັ້ນຢ່າງບັງອາດ, ເປັນການຢຽບຢ່ຳຫຼັກການພື້ນຖານໃນ “ກົດບັດສະຫະປະຊາຊາດ” ທີ່ຕ້ອງເຄົາລົບອະທິປະໄຕ ແລະ ຜືນແຜ່ນດິນອັນຄົບຖ້ວນຂອງບັນດາປະເທດນັ້ນຢ່າງປ່າເຖື່ອນ. ຈີນຮູ້ສຶກວິຕົກກັງວົນວ່າ ເຫດການດັ່ງກ່າວອາດຈະເຮັດໃຫ້ສະຖານະການຢູ່ພາກພື້ນເກີດຄວາມປັ່ນປ່ວນຂຶ້ນຕື່ມອີກ.

ທ່ານ ຟູ້ຊົ່ງເນັ້ນໜັກວ່າ, ເມື່ອຜະເຊີນໜ້າກັບສະພາບຄວາມເປັນຈິງອັນຂ້ຽວຂາດ, ຝ່າຍທີ່ກ່ຽວຂ້ອງຄວນຕອບສະໜອງຕາມສຽງຮຽກຮ້ອງຂອງປະຊາຄົມໂລກທີ່ໃຫ້ຍຸດຕິສົງຄາມ , ປະຕິບັດຕາມມະຕິຂອງສະພາຄວາມໝັ້ນຄົງອົງການສະຫະປະຊາຊາດຢ່າງຮອບດ້ານ, ຕັ້ງໜ້າໃຫ້ຄວາມຮ່ວມມື ແລະ ສະໜັບສະໜູນຄວາມພະຍາຍາມໃນການໄກ່ເກ່ຍຂອງປະຊາຄົມໂລກ, ນຳໃຊ້ການກະທຳຕົວຈິງເພື່ອຫຼຸດຜ່ອນຄວາມເຄັ່ງຕຶງຂອງສະຖານະການ ແລະ ຟື້ນຟູສັນຕິພາບໃນພາກພື້ນ. ຫາກບໍ່ແມ່ນໃຊ້ການກະທຳທີ່ທ້າທາຍເກາະຜິດ ແລະ ສ່ຽງໄພຕາມລຳພັງໃຈ, ເຮັດໃຫ້ສະຖານະການເຄັ່ງຕຶງຂຶ້ນອີກ.