ວັນທີ 31 ກໍລະກົດທີ່ຜ່ານມາ, ທ່ານລິນຈ້ຽນ ໂຄສົກກະຊວງການຕ່າງປະເທດຈີນໄດ້ຈັດກອງປະຊຸມຖະແຫຼງຂ່າວ. ມີນັກຂ່າວຖາມວ່າ: ວັນທີ 30 ກໍລະກົດນີ້, ພາຍຫຼັງການເຈລະຈາ “2+2” ລະຫວ່າງລັດຖະມົນຕີຕ່າງປະເທດ ແລະ ລັດຖະມົນຕີປ້ອງກັນປະເທດຂອງຟີລິບປິນ ແລະ ອາເມຣິກາ, ທ່ານເອນຣິເກ້ ເອ ມານາໂລ ລັດຖະມົນຕີກະຊວງການຕ່າງປະເທດຟີລິບປິນກ່າວວ່າ: ອາເມຣິກາເຂົ້າໄປຕິດຕັ້ງລະບົບລູກສອນໄຟນຳວິຖີໄລຍະກາງຢູ່ຟີລິບປິນແມ່ນເພື່ອສ້າງຄວາມສາມາດປ້ອງກັນຕົວໃຫ້ຟີລິບປິນ, ແຕ່ບໍ່ໄດ້ມີຈຸດປະສົງເພື່ອໃຊ້ໂຈມຕີແຕ່ຢ່າງໃດ ແລະ ຈະບໍ່ກໍ່ໃຫ້ເກີດມີການແຂ່ງຂັນດ້ານອາວຸດຍຸດໂທປະກອນ. ຈີນມີຄວາມເຫັນແນວໃດຕໍ່ກັບເລື່ອງນີ້?

ທ່ານລິນຈ້ຽນກ່າວວ່າ: ຟີລິບປິນອະນຸຍາດໃຫ້ອາເມຣິກາເຂົ້າໄປຕິດຕັ້ງລະບົບລູກສອນໄຟນຳວິຖີໄລຍະກາງຢູ່ໃນປະເທດຕົນ ເປັນການຝືນກັບກະແສຍຸກສະໄໝ ທີ່ດຶງເອົາອິດທິກຳລັງພາຍນອກເຂົ້າມາສ້າງຄວາມເຄັ່ງຕຶງ ແລະ ສ້າງຄວາມເປັນປໍລະປັກກັນຢູ່ໃນພາກພື້ນຕື່ມອີກ, ຍຸຍົງສົ່ງເສີມໃຫ້ຕໍ່ຕ້ານກັນ ແລະ ແຂ່ງຂັນກັນດ້ານອາວຸດຍຸດໂທປະກອນ. ພວກເຮົາເຕືອນໃຫ້ປະເທດທີ່ກ່ຽວຂ້ອງຈົ່ງປະຕິບັດຕາມຄວາມຮຽກຮ້ອງຈາກບັນດາປະເທດໃນພາກພື້ນ, ດັດແກ້ການກະທຳທີ່ຜິດພາດໂດຍໄວ, ຖອນການຕິດຕັ້ງລະບົບລູກສອນໄຟນຳວິຖີອອກຈາກພາກພື້ນໂດຍດ່ວນ ໂດຍອີງຕາມຄຳໝັ້ນສັນຍາໃນກ່ອນໜ້ານີ້, ຢ່າງສູ່ເດີນຕາມເສັ້ນທາງທີ່ຜິດພາດໄປຫຼາຍກວ່ານີ້ຕື່ມອີກ.