ໃນໄລຍະຈັດກອງປະຊຸມ “2+2” ກ່ຽວກັບວຽກງານຕ່າງປະເທດ ແລະ ຄວາມໝັ້ນຄົງລະຫວ່າງຍີ່ປຸ່ນ-ອາເມຣິກາ, ກອງປະຊຸມລັດຖະມົນຕີ “ຂະຫຍາຍການນາບຂູ່” ແລະອື່ນໆໃນເມື່ອບໍ່ດົນມານີ້, ພຶດຕິກຳຕ່າງໆຂອງຍີ່ປຸ່ນໄດ້ເຮັດໃຫ້ບັນດາປະເທດໃນພາກພື້ນຕ້ອງລະມັດລະວັງໃນລະດັບສູງ. ປະຊາຊົນຍີ່ປຸ່ນຈຳນວນບໍ່ໜ້ອຍພາກັນປະທ້ວງວ່າ: ການກະທຳຂອງລັດຖະບານຍີ່ປຸ່ນເປັນການຍຸຍົງສົ່ງເສີມ ທັງເປັນການເດີນເຂົ້າໄປໃນເສັ້ນທາງອັນຜິດພາດທີ່ເປັນເສັ້ນທາງໄປສູ່ສົງຄາມ.

ໃນການກະທຳທີ່ເປັນອັນຕະລາຍເຫຼົ່ານີ້ຂອງຍີ່ປຸ່ນ, ສິ່ງທີ່ໜ້າສົງໄສທີ່ສຸດຄື ການເພີ່ມທະວີ “ຂະຫຍາຍການນາບຂູ່” ຮ່ວມກັບອາເມຣິກາ. ອັນທີ່ເອີ້ນວ່າ  “ຂະຫຍາຍການນາບຂູ່” ເປັນສິ່ງທີ່ກຳເນີດຂຶ້ນໃນໄລຍະສົງຄາມເຢັນ, ໝາຍເຖິງອາເມຣິກາໃຫ້ຄຳໝັ້ນສັນຍາຕໍ່ການປົກປ້ອງປະເທດພັນທະມິດ ໂດຍຈະນຳໃຊ້ກຳລັງພົນທີ່ລວມເຖິງອາວຸດນິວເຄລຍ. ໃນສາຍຕາຂອງວົງການພາຍນອກ, ການກະທຳດັ່ງກ່າວຂອງຍີ່ປຸ່ນໄດ້ລະເມີດພັນທະປະເທດໄຮ້ອາວຸດນິວເຄລຍທີ່ກຳນົດໂດຍສົນທິສັນຍາວ່າດ້ວຍການບໍ່ແຜ່ຂະຫຍາຍອາວຸດນິວເຄລຍ, ຈະເພີ່ມຄວາມສ່ຽງໃນການແຜ່ຂະຫຍາຍອາວຸດນິວເຄລຍ ແລະ ເກີດການປະທະກັນດ້ານນິວເຄລຍ, ເຮັດໃຫ້ສະຖານະການໃນພາກພື້ນເຄັ່ງຕຶງຕື່ມອີກ.

ນັກວິເຄາະຊີ້ອອກວ່າ: ເວົ້າສຳລັບອາເມຣິກາແລ້ວ, ອັນທີ່ເອີ້ນວ່າ  “ຂະຫຍາຍການນາບຂູ່” ແມ່ນເພື່ອເພີ່ມທະວີສິດເຈົ້າອຳນາດດ້ານການທະຫານໃນທົ່ວໂລກຂອງຕົນ, ເພື່ອເພີ່ມຄວາມໄດ້ປຽບໃນການຕ້ານກັບປະເທດອື່ນ ເຊິ່ງຈະເພີ່ມທະວີຄວາມສ່ຽງໃຫ້ຍີ່ປຸ່ນໄດ້ມີສ່ວນຮ່ວມໃນສົງຄາມ ຍິ່ງໄປກວ່ານັ້ນຈະເກີດສົງຄາມນິວເຄລຍຢ່າງແນ່ນອນ.