ໃນງານວາງສະແດງສິນຄ້າຈີນ-ອາຊີໃຕ້ຄັ້ງທີ 8 ທີ່ໄຂຂຶ້ນຢູ່ນະຄອນຄຸນມິງ ແຂວງຢູນນານຂອງຈີນໃນວັນທີ 23 ກໍລະກົດນີ້, ຮ້ານວາງສະແດງຂະແໜງການກາເຟໄດ້ຖືກຈັດເປັນຮ້ານວາງສະແດງຜະລິດຕະພັນສະເພາະເປັນຄັ້ງທຳອິດ, ໃນຮ້ານນີ້ ມີເຂດວາງສະແດງທີ່ມີເອກະລັກພິເສດແຫ່ງໜຶ່ງຊື່ວ່າ: “ເອົາກາເຟມານຸ່ງ” ເຊິ່ງໄດ້ດຶງດູດສາຍຕາຜູ້ເຂົ້າຊົມທັງຫຼາຍ. ຝີມືຕ່ຳຫູກເຜົ່າຫວາຂອງເມືອງປົກຄອງຕົນເອງ ເຜົ່າຫວາສີ່ເມີງ ນະຄອນຜູເອີ ແຂວງຢູນນານຂອງຈີນ ແມ່ນໜຶ່ງໃນໂຄງການທີ່ມີລັກສະນະຕົວແທນຂອງມໍລະດົກວັດທະນະທຳນາມມະທຳລະດັບຊາດຂອງຈີນ, ມັນໄດ້ປະສົມປະສານກັບເສດກາເຟ ແລະ ກາຍເປັນແຟຊັ້ນແປກໃໝ່.

    ຜະລິດຕະພັນຜ້າໄໝເຜົ່າຫວາທີ່ໄດ້ວາງສະແດງຢູ່ໃນງານ, ບໍ່ແມ່ນຕ່ຳດ້ວຍວັດສະດຸດັ້ງເດີມ, ຫາກແມ່ນດ້າຍທີ່ເຮັດດ້ວຍສິ່ງເສດເຫຼືອຈາກກາເຟດ້ວຍເຕັກນິກພິເສດ. ເສັ້ນດ້າຍຊະນິດນີ້ບໍ່ພຽງມີຈຸດພິເສດໃນການດູດຊຶມເຫື່ອ, ຕ້ານເຊື້ອພະຍາດ, ລະບາຍອາກາດ ແລະ ເບົາເທົ່ານັ້ນ ຍັງມີກິ່ນຫອມຂອງກາເຟອີກດ້ວຍ ເຊິ່ງສາມາດຜະລິດເປັນເສື້ອຜ້າ, ເກີບ, ຜ້າປູຕຽງ, ຜ້າກັ້ງ ແລະ ຕຸກກະຕາເປັນຕົ້ນ.

    ຕາມຂ່າວລາຍງານວ່າ: ເຖິງວ່າເສດກາເຟບໍ່ເປັນມົນລະພິດຕໍ່ສິ່ງແວດລ້ອມໂດຍກົງກໍຕາມ, ແຕ່ຖ້າວ່າແກ້ໄຂບໍ່ຖືກຕ້ອງ ຕົວຢ່າງຄື ຖິ້ມຊະຊາຍ ຫຼື ຝັງລົງໃນດິນຊື່ໆ ກໍອາດຈະເກີດມີອາຍອຸ່ນເຮືອນແກ້ວ ເຊິ່ງຈະສົ່ງຜົນກະທົບຕໍ່ສິ່ງແວດລ້ອມ.  ແຕ່ຖ້າເອົາມາເຮັດເປັນເສັ້ນດ້າຍແລ້ວ ບໍ່ພຽງແຕ່ສາມາດຫຼຸດຜ່ອນຜົນກະທົບຕໍ່ສິ່ງແວດລ້ອມເທົ່ານັ້ນ ຍັງສາມາດເປັນຊ່ອງທາງໃໝ່ດ້ານການສ້າງລາຍໄດ້ໃຫ້ຊາວກະສິກອນທ້ອງຖິ່ນອີກດ້ວຍ.

    ແຂວງຢູນນານແມ່ນແຫຼ່ງປູກກາເຟໃຫຍ່ທີ່ສຸດຂອງຈີນ, ເນື້ອທີ່ການປູກກາເຟ ແລະ ຍອດຜົນຜະລິດກາເຟລ້ວນແຕ່ກວມຫຼາຍກວ່າ 98% ຂອງທົ່ວປະເທດຈີນ. ໃນນັ້ນ, ຍອດຜົນຜະລິດເມັດກາເຟຂອງແຂວງຢູນນານມີຫຼາຍກວ່າເຄິ່ງໜຶ່ງແມ່ນມາຈາກນະຄອນຜູເອີ ເຊິ່ງຖືກຂະໜາມນາມວ່າ “ເມືອງແຫ່ງກາເຟຂອງຈີນ”.

    ປັດຈຸບັນ, ເສັ້ນດ້າຍທີ່ເຮັດດ້ວຍເສດກາເຟຂອງຢູນນານ ໄດ້ນໍາມາຜະລິດເປັນຜະລິດຕະພັນຜ້າໄໝທີ່ທັນສະໄໝຊະນິດຕ່າງໆຂອງເຜົ່າຫວາ. ຜະລິດຕະພັນຜ້າໄໝທີ່ຕ່ຳດ້ວຍເສັ້ນດ້າຍກາເຟທີ່ມີເອກະລັກພິເສດເຫຼົ່ານີ້ ໄດ້ຮັບຄວາມສົນໃຈຢ່າງກວ້າງຂວງຈາກລູກຄ້າ ແລະ ສື່ມວນຊົນພາຍໃນ ແລະ ຕ່າງປະເທດ.